ايه رايكم في الحوار ده بخصوص ال ٤٠٦

**kms_matrix** · 13-11-2012 01:29 AM

السلام عليكم جميعا
انا عضو جديد بالمنتدي اسمي كريم
انا ناوي ان شاء الله اشتري عربيه وديه حتكون اول عربيه خاصه بيا وكنت معجب اوي بالبيجو ال ٤٠٦ خصوصا الموديلات ال ٢٠٠٤\٢٠٠٥\٢٠٠٦ وكنت قريت كلام الاعضاء هنا عن مميزات العربيه وكنت قريت راي المهندس هيثم عنها بس انا متحير لان في ناس كتير اصحابي قالولي ان بفلوس العربيه ديه ممكن تجيب عربيه ياباني او كوري موديل حديث تكون قطع غيارها ارخص واي حد يكون بيعرف يشتغل فيها ولو حبيت تبيعها بعد كده يكون الموضوع سهل خصوصا اني من طنطا وقليل اللي بيفهموا في البيجو وفي ناس قالولي انهم مش كويسين وحاسس انه حيبقي صعب كل ما يحصل حاجه في العربيه بعد ما اجبها اسافر مصر علشان اصلحها في اي مركز خدمه بيجو هناك فانا كنت عايز اعرف رايكم وشكرا واسف علي الاطاله وللعلم العربيه عاجباني اوي

**egyptiandiver** · 13-11-2012 02:04 AM

وأنا كمان أعتقد إن 406 حاجة شيك و برستيج! بس يا رت تكشف على العربية كويس قبل الشرة و اتأكد حضرتك بردو من قصة قطع الغيار و اسعارها عشان تكون على نور من أولها و مبروك مقدماً

**kms_matrix** · 13-11-2012 02:35 AM

يا باشا تسلم علي الرد وعلي ذوقك في الكلام بس انا متحير مش عارف اجيب حاجه عاجباني وحلوه وناس كتير بيشكروا فيها بس ساعتها حبقي خايف ادوخ عليها لو عطلت او حصلها حاجه او اجيب عربيه من العربيات المنتشره زي الكوري او الياباني اللي اي حد بيفهم فيها ومش حتبقي عجباني اوي بس حبقي انسان عملي

**م.احمد زكريا** · 13-11-2012 09:25 AM

لو انت ربنا كرمك واشتريت عربية موديل من 2004 وحتى 2006 وبحالة جيدة

يعني صاحبها محافظ عليها مش مطنشها ولا لاعب فيها

يبقى مش هاتحتاج تنزل مصر او توصل لأقرب مركز خدمة جيد الا كل 10,000 كم عند الصيانة فقط

بالنسبة لقطع الغيار والصيانة فتكلفتها اكتر طبعا من الكوري وليست اكثر بكثير من الياباني

بس فرق الركوبة كبيييييييييير

وربنا يوفقك ان شاء الله