بيجو 406

**ahmedshaker** · 09-11-2012 03:27 AM

حابب استفسر من اخواتي الكرام ممن يملكون بيجو 406 عن مشكلة جننتني
عربيتي 2001 حالتها جديدة جدا بس فيها حاجه جديدة حصلت ومش عارفلها حل وهي انو العربية لما كنت بلمس دواسه البنزين العربية خفيفة جدا وكانت بتاكل الاسفلت بقالها اسبوع اجي ادوس العربية مخنوقه اوي في الطالعه بس بمجرد لما توصل للغيارا لثالث تبتدي تفوق شوية يعني لو دوست حتي اخر الدواسه وهي علي الاول مش بتمشي خالص طلعيتها ضعيفه وبعد كده بتسحب شوية الموضوع ده لسه حاصل معايا رحت مركز بيجو كشف بالجهاز قالي الحساسات سليمه هي شوية نظافه فك البوابه ونظفها البيجوهات لسه كنت مغيرها من شهربن فقالي لا سليمه للاسف عمل شوية نظافه بس العربية زي ما هي بردو وحسيت انو مش لاقي حل للقصة دي فمشيت مع العلم العربية حريقها مظبوط ولما ولما بطلع علي طريق سريع مش مخنوقه علي السرعات العاليه وعايز استفسر ممكن الرشاشات او الطرمبه يكون ليها عامل في كده .
فلو حد من اخواتي الكرام قبلتو نفس المشكلة دي او يقدر يفيدني يتفضل ولكم جميعا جزيل الشكر .

**benmatar** · 09-11-2012 09:34 AM

زيت الفيتيس عندك عامل إيه؟؟؟؟ الزيت بيعمل كده في الفيتيس الأوتو لو ماغيرتوش في مواعيده
البيجو 406 مفيهاش مشاكل زي ما الناس بتقول سوى إن الزيت لازم يتغير قبل 60 ألف كم بزيت أصلي مش أبو 40ج.م الزيت الأصلي غالي شوية يعني الفيتيس كله بيحتاج زيت بحوالي 1000ج.م
انت عامل كام كيلو ؟؟؟؟
روح واكشف عليه واطمن على البلوف بتاعت الفيتيس لأن لو اتسدت السحب بيضعف قوي، وخير إن شاء الله
نصيحة أخيرة اتعامل مع مركز صيانة أحمد عمارة في مصر القديمة عند حديقة الفسطاط.

**ahmedshaker** · 10-11-2012 05:38 AM

متشكر اوي لحضرتك علي الرد هو عموما بالنسبة للزيت انا مغير زيت الفتيس والبلفين من 5 شهور تقريبا يعني ما عملتش تقريبا 10000 كيلو بعد تغيرهم دي حاجه وانوكمان العربية بتقفل امبير ببساطه انا مشكلتي الخنقة اللي في العربية يعني دوسة البنزين مش رايحه في مكنها مظبوط زي الاول العربية تقيله بس بمجرد لما تنقل تالت بتبقي طبيعية لحد ما

**benmatar** · 10-11-2012 11:53 AM

لو حضرتك متأكد من زيت الفيتيس انه تمام والبلوف، برضه اكشف عليه كمبيوتر وشوف قياسات البلوف كام؟ ولو الحكاية مش فيتيس، اكشف كمبيوتر على حساس الاكسجين او حساس الشكمان، دي من ضمن اعراضه وهتلاحظ إن استهلاك البنزين زاد شويه.
إن شاء الله الأسد يتماثل للشفاء تاني وسهلة ومحلولة.

**ahmedshaker** · 11-11-2012 06:35 AM

لك جزيل الشكر هي عموما المشكلة بداءت تظهر اكتر النهارده بوجود تقطيع بسيط في العربية وهي علي السلانسية ورعشة خفيفة في الار بي ام فانا كان من فترة العربية بتعلي وتوطي رحت مركز بيجو نظف بلف الايدل فاتحلت المشكلة دلوقتي بلاقي الرعشة دي مع تقطيع بسيط في المكنه يعني زي رعشه بس مش واضحه يعني لازم اركز معاها اوي علشان اخد بالي منها فحاسس كده انو بلف الايدل هو السبب مع انو النهارده فكيتو ونظفتو بس للاسف نفس المشكلة فكده الموضوع فعلا محتاج مركز محترم فعايز افاضل بين مركز احمد العسكري ولا مركز احمد ندا اللي في الحرفين وشكر جزيلا علي التواصل

**benmatar** · 24-11-2012 11:14 AM

آسف لتأخري في الرد
أنصح حضرتك بالكشف عليها في مركز أحمد عمارة للبيجو في مصر القديمة، وسمعت كلام كويس عن العسكري ومعرفش ندا
وبصفة عامة متنساش تشوف بوجيهاتك عاملة إيه، وممكن تحط إضافة تنظيف دورة الوقود والانجكشن عشان الحكاية دي لاحظت إنها بتفرق كتير جدا.