الموضوع: لمحترفي القيادة الاوتوماتيك فقط !!!

طيب حضرتك ممكن تقول الملاحظات علشان نرد ونقول طبيعى ولا لاء ؟
السلام عليكم

مش عارف اجري العربية وقت مانا عاوز العربية بتجري لما تكون هي عاوزة
ولما احاول بحس اني بادوس بنزين على الفاضي يعني مافيش كبس
آدي عيب من العيوب
مثلا

وحاجات تانية
كتيييييييييييييير
انا عاوز اعرف اسرار وخبايا التعامل مع الفتيس الاوتو
مش ان الd بيمشي العربية
والp بتاع الركن
والكلام ده مش ده اللي عاوز اعرفه
ببساطة لاني عارفه
انا اللي مش عارفه
انا مش عارف ابقى شاطر في التعامل مع العربية

ده مش عيب ولا حاجة ، معروف ان الاوتو مش بيجمع بسرعه وبيحتاج وقت علشان يبقى زى العادى وبالذات لو 1300 ، العيب لو حضرتك بتدوس بنزين وrpm بيعلى معاك ومفيش سحب يبقى كده عيب ،

هقولك سر التعامل مع الأتوماتك
لو انت مثلا ماشى ثابت على 100 وعايز تسرع فجاة وكبست بنزين هتلاقيها مش راضية تجرى ودة طبيعى فى أى أوتو فبتعمل أية أن أنت تعمل pump لبدال البنزين والحرفنة بقى أن أنت الحركة دى على خفيف مش بغشامة يعنى أية أنت دايس ربع البدال مثلا تقوم كابس لحد النص وبعدين تشيل رجلك تانى للربع وترجع تانى على النص الحركة دى هى ألى بتخلى الأوتو يسحب
بس أهم حاجة تتعمل من غير غشومية لانى شفت واحد بيدوس لاخر البدال ويشيل رجلة على الأخر لحد ما العربية جابت فتيس

السلام عليكم أخى الكريم

أولا مبروك على العربية وربنا يديك خيرها ويكفيك شرها

ثانيا بالنسبة للفيتيس الأوتوماتيك أنا هشرح لحضرتك باختصار ايه اللى المفروض تعرفة :
- الفتيس الأوتوماتيك مافيهوش دبرياج , بيستعمل حاجة اسمها Torque converter جوة الفتيس , دة همزة الوصل بين الموتور وبين تروس الفتيس
طبعا هتلاقى الحروف دى (أكيد حضرتك عارفها بس الشئ بالشئ يذكر ) :
P : أختصار لكلمة Parking , يستخدم فقط عند توقف السيارة
R : أختصار لكلمة Reverse , المارشدير , للرجوع للخلف , لازم تكون العربية فى حالة توقف كامل قبل ادخال عصا الفتيس علي ال R
N : اختصار لكلمة Neutral , أو المور , يفصل الموتور عن الفتيس ويسمح للسيارة انها تتحرك ( يعنى ممكن العربية تتزق لو ركنت صف تانى انك تخليها على ال N وطبعا تسيب الهاندبريك ) , عكس ال P اللى لا يسمح للعربية بالتحرك
D : أختصار لكلمة Drive , وهى دى النقلة اللى حضرتك دايما هتستعملها
1,2,3 أو 2,L : لما تجيب عصاية الفتيس على رقم منهم دة معناة انك مش هتسمح للعربية انها تجيب غيار أعلى من الرقم دة مهما كان دوسة حضرتك على البنزين (1 مناظر لل L بالمناسبة) , ودة حضرتك نادرا ما هتستعملة الا فى حالة انك طالع مطلع شديد وطويل والعربية محملة وكل متخف رجلك من على البنزين تنقل للغيار اللى بعدة (زى ما هنشوف حالا ) , فالتسارع يبطأ , ساعتها تجيب 3 أو 2

2)الفتيس الأوتوماتيك بينقل (للغيار الأعلى أو الأقل) على حسب مقدار العزم الواصل من الموتور لل Torque converter دة , لو العزم قليل ( لأن السائق خفف رجلة من على دواسة البنزين شوية) ينقل للغيار الأعلى , ولو العزم زاد (أو السائق داس بنزين أوى) الفتيس بينقل للنقلة الأقل مع (الحرق على الغيار) ان جاز التعبير , ولو العزم كان أقصى مقدار ( يعنى السواق جاب آخر دواسة البنزين ) الفتيس بينقل لأقل نقلة ممكنة بحيث لا يزيد عدد لفات الموتور عن حوالى 4500 لحظة النقلة ويحافظ على نفس النقلة الى ان تصل لآخر مدى على عداد ال RPM (مثلا 6000) - والأخيرة دى اللى بتتسمى كيك داون ( kick down) .
أو بمعنى آخر انت اللى بتتحكم امتى الفتيس ينقل على حسب ضغطة حضرتك على البنزين

الطبيعى فى الفتيس الأتوماتيك
1) أنة ينقل من الأولانى للتانى عند 15كم فى الساعة أو عند 55 , أو أنة ينقل من التانى للتالت عند 25 كم فى الساعة أو عند 80 أو أى رقم فى النص ( طبعا على حسب ضغطتك على البنزين زى ما اتفقنا)
2) أنك الصبح تلاقى العربية بتنقل متأخر شوية (بتحرق شوية فى الغيارات , أو ممكن تلاقى الغيارات بتخبط شوية) دة لأن المحرك بيكون لسة بارد وعلى ما يسخن بتلاقي النقلات اتظبطت
3) لما تبقى على ال N وتنقل لل D تلاقى ال RPM نزل شوية (حوالى 200) , وكذلك ال R .


أتمنى أنى أكون عرفت أفيد حضرتك
وطبعا فى انتظار ردود باقى الأخوة الزملاء
تقبل تحياتى