الموضوع: تقريرى عن عمل صيانة 10000 فى السبع

السلام عليكم و رحمة الله و بركاته

انا كنت عملت صيانة 1000 و 5000 فى اوتو ايجيبت ده بالأضافة ان كنت رحت مرة فى الأول خالص فى اوتو ايجيبت علشان زجاج الشراعة كان اتكسر و عملته هناك
فقلت الواحد لازم يغير و يشوف بنفسه السبع عامل ايه هل احسن او نفس المستوى
المهم رحت السبع فى صيانة 10000
طبعا اول حاجة لاحظتها فى الحجز انى يوم ما اتصلت تانى يوم كان ميعادى و دى ميزة الصراحة فى السبع
روحت التوكيل فى الميعاد اتصلوا بيا فى توقيت ميعادى و قالوا انت حاجز النهاردة فحضرتك هتيجى و لا مش هتيجى و كدا قلت بالفعل انا وصلت الحمد الله
قبلت مهندس الاستقبال و قلت له عاوز اعمل الصيانة و كمان كان فى صوت صفارة فى الفرامل و ده غير ان الفيبر مكنش متقفل كويس من ساعت ما عملت فرش الارضية و ده بيعمل صوت برضو.
كان ساعتها المهندس وائل موجود برة فى الاستقبال و اتكلمت معاه و هو الصراحة شخصية محترمة جدا.
المهم استلموا العربية و تم تسليمها حوالى الساعة 3 و انا كنت مسلمها حوالى الساعة 11 و طبعا دى برضوا نقطة تحسب للسبع .
و لكن هنا فى نقطة فى موضوع الاصوات فى اوتوا كانوا بيقولوا تعالى معانا و نجرب و ايه الاخبار دلوقتى و ده للأسف محصلش فى السبع و دى تحسب لاوتو.
بعد ما استلمت السيارة اصوات الفيبر كانت تقريبا راحت و صوت الصفارة بتعات الفرامل راحت.
شوية و لقيت الدنيا رجعت زى ما كانت اصوات برضو فى الفيبر اتصلت بيهم قالوا لى مفيش مشكلة تعالى بكرة
رحت هناك كان يوم خميس و الميعاد اصلا الساعة 2 فالدنيا كانت متكربسة
المهم قابلت هناك المهندس وائل و قلت له قل حاجة زى ما هى
قالى طب تعالى معايا نطلع نجرب بعد ما طلعنا قالى هو تقفيل الفيبر مش معمول صح و وقفنا و الراجل ظبطه بنفسه فى الطريق بعد كدا لقيت الاصوات راحت الحمد الله
و بعدين قالى بص تعالى يوم كدا من اول النهار و احنا نراجعلك على الفيبر كله قلت ماشى و حجزت ميعاد تانى
و بعدين رحت و قبلت مهندس الاستقبال و سألته على المهندس وائل قالى للأسف هو مش موجود بس فى مهندسين تانين قلت له اكيد بس علشان هو اللى نزل و جرب معايا
المهم استلموا العربية و بعديها بساعتين سلموا ليا العربية و لكن من غير ما يعملوا اى حاجة خالص بتاتا ما نابنى غير تضيع الوقت
هو الحمد الله الاصوات خفت كتير بس هى القصة الضمير فى الشغل ممكن حد يشوف حاجة يقولك دى بسيطة و مش مستهلة مشى حالك
و هى دى المشكلة العامة اللى فى مصر مشى حالك

ملخص التقرير
الاستقبال : بالنسبة للأستقبال و النظام فى الاستقبال اوتو ايجيبت تتفوق بمراحل
السرعة : السبع اسرع فى الانجاز و حجز المواعيد
المتابعة : متبعة ما بعد الصيانة السبع عندهم متابعة جيدة جدا اوتو تقريبا مبيتصولش بيك خالص
فنيا : اوتو ايجيبت افضل من السبع و لكن انا لسة الموضوع ده محتاج منى مرجعة و تدقيق اكتر.
المعاملة : اوتوا افضل بمراحل
مهندس الاستقبال : فى المركزين نفس المستوى مقبول بس ده اللى انا قبلتهم
قاعة الانتظار : فى اوتو اكبر بكتير و افخم بس للأسف مش باين لى جميع مراحل الصيانة زى السبع ببقى قاعد شايف العربية لحد ما تتغسل
الغسيل : السبع افضل من اوتو و لكن للأسف هما بيغسلوا الموتور بالمية و الصابون و ده معجبنيش انما اوتوا مش بيغسلوا تقريبا


نصيحة متواضعة من عبد فقير لمركز السبع

شىء جميل الانجاز فى الوقت مع الاتقان فى العمل

نصيحة متواضعة من عبد مسكين لمركز اوتو ايجيبت

الوقت عامل مهم جدا مع الاهتمام برأي العميل بعد الصيانة

انما بشكل عام كلمة حق المركزين فعلا كويسين و احسن من توكيلات تانية
و لكن المطلوب انى ابقى كويس جدا مش ابقى احسن الموجوديين و خلاص.

مبروك الصيانة يا باشا ..