الموضوع: تقريرى عن صيانة ال 10 الاف كم فى الام 11

بسم الله الرحمن الرحيم

اخوانى الكرام زى ماعودتكم انى اوافيكم باخبار الصيانات الدورية واللى تم فيها عشان كلنا نستفيد .. اسف ان المرة دى مكنتش قادر اوصف اليوم اولا باول من داخل مركز الصيانة بأبو رواش لان الرفيق المرة دى كانت المدام مش واحد صاحبى فمش عاوز اقولكم اليوم كان عامل ازاى

انا هلخص اليوم برغم انه كان طويل وهتكلم على النقاط الرئيسية لان بصفة عامة معظم الملاحظات اللى اشتكيت منها اتحلت والحمد لله ويبقى 3 نقاط احب اعرضها عليكم

طبعا انا حجزت مع المهندس ابو بكر الصديق اللى معظمنا عارفه تقريبا بجد راجل محترم وذوق واخلاق وفاهم كمان وصبور وصدره رحب وبيشرحلك كل حاجة بالتفصيل وبيرد على كل استفساراتك

انا وصلت المركز الساعة 7:40 صباحا رغم انف جمال وحنية زحمة الطريق الزراعى ونزلة المحور من الدائرى سلمت العربية الساعة 8:20 وبعد صدور امر الشغل حوالى الساعة 9 صباحا غادرت متجها الى كارفور عشان افطر واضيع الوقت لان المهندس قالى هتستلم الساعة 4 عصرا لان كانت ملاحظاتى كتيرة وكمان كان فيه بلية بطاحة هتتغير

المهم نيجى لل 3 نقاط الرئيسية:

1. تغيير بلية بطاحة امامى شمال على الضمان وكنت حاجزها من اول صيانة من 6 شهور بس مكنتش متوفرة ولكن ربنا كرم والحمد لله اتوفرت بعد طول غياب!! غيروا البلية وصوت التزييق راح مع لفة الطارة ناحية الشمال ولكن فوجئت انه لسه موجود مع لفتها ناحية اليمين فالبديهى ان بلية البطاحة اليمين كمان عاوزة تتغير!! اللى غايظنى ان مفيش افندى من اللى اشتغلوا فى تغيير البلية كلف خاطره مثلا يجرب الطارة بعدها وسمع صوت التزييق ناحية اليمين وكتب فى التقرير انها تحتاج بلية بطاحة يمين او هو سمع فعلا الصوت وكبر دماغه!! المهم قولت اريح شوية من المشوار وبعد فترة احجز ميعاد واقولهم على الموضوع ده ونغير البلية بردو على الضمان بس يارب تفضل متوفرة

2. ماكنتش ملاحظة ولكن كان سؤال ودى بينى وبين المهندس لانى كنت محرج يقول عليا فلاح ومعرفش يعنى ايه abs, لو تفتكروا كنت عملت موضوع بخصوص ال abs وقولت انى لما بكبس فرامل جامد بحس بدربكة جامدة اوى واصوات احتكاك حديد فى حديد وان دواسة الفرامل زى ماتكون بتتكسرتحت رجلى وبعد بحث طويل فى المنتدى وعلى مواقع النت وسؤال اصحاب العربيات اكدولى ان دى طبيعة عمل ال abs لكن انا قولت أسأله حتى يطمأن قلبى .. هو قاللى نفس الكلام ولكن قالى زيادة اطمئنان هزودلك فى امر الشغل مراجعة غربلة فى الفرامل والكشف على abs وكان التقرير العجيب بأن كنترول ال abs عاوز يتغير انا مش بشتكى من ضعف فى الفرامل ولكن هو القلق من اللى بيحصل لما بكبس جامد بحس ان الاصوات مش طبيعية وان الفرامل مش مظبوطة ولكن على كل حال تم حجز كنترول abs على الضمان لانه كالعادة مش متوفر وهبقى اروح اغيره لما يتوفر .. الغريب ان لمبة ال abs منورتش ولا مرة اطلاقا من ساعة ما اشتريت العربية -- تفتكروا ايه؟

3. عمل مفتاح اصلى مشفر بدل اللى ضاع مع شنطة المدام لما اتسرقت وده بقى اكبر واغرب حوار فى اليوم ده حكاية ليها العجب .. طلبت اعمل مفتاح قالى تمام هنبيعلك مفتاح فاضى (علبه بسلاح المفتاح) وانت تخرطه على المفتاح الاصلى عند خراط كويس برة قال ايه لان التوكيل مفيهوش خراطة مفاتيح وحط يا سيدى تلاتين الف علامة تعجب ادام النقطة دى !!!!!!!! لكن قولت ومالوا مااااشى .. المهم قالى تيجى يوم تانى من بدرى ومعاك صورة بطاقتك (لدواع امنية!!) عشان نحطلك البوردة بتاعة الريموت والجزء بتاع التكويد (التشفير) ونحطلك اكواد الابواب ودوران العربية (المفتاح فاضى 130 جم والبوردة والتكويد حوالى 350 جم يعنى اجمالى المفتاح الخيخة ده 500 جم) قوووولت ماااشى المهم يبقى معايا نسخة تانية لاحسن تبقى مصيبة لو اللى معايا ضاع هو كمان واقعد اغنى ظلمووه
فوجئت الساعة 3:30 عصرا بيندهوا عليا فى الاذاعة الداخلية قولت يا فرج الله هستلم لقيت المهندس ابو بكر باعتلى عشان يقولى على حاجة مهمة قبل ما يصرفلى المفتاح .. قال اااااايه؟؟؟ قالى حبيت اقولك على نقطة هامة قبل ما تاخد المفتاح معاك .. ايه هى؟؟؟ ان لما تيجى نحطلك الاكواد الخاصة بالايموبلايزر وارد جدا انه ميقبلش الاكواد والعربية متدورش بالمفتاح الجديد!!!!!ياحلاوة!!!! وساعتها يبقى ايه العمل يا بشمهندس؟ قال فى الحالة دى (بعد ما اكون لبست تمن المفتاح والتكويد والحوار كله) هنغيرلك كنترول الايموبلايزر وده سعره 180 جنيه بس ربما بردو ميقبلش الاكواد!!! ياحلاوتين تلاتة!!! فى الحالة دى هنغير بقى كنترول المحرك كله وده تمنه 2000 جنيه!! صلاة النبى احسسسسسسسن انا فضلت اتكلم معاه ييجى نص ساعة فى الموضوع ده وبتعجب شديد منى ازاى التوكيل غير قادر على اصدار مفتاح اصلى فى حالة فقدان احد او كلا المفتاحين؟؟؟ اى نظام سيكيوريتى ده اللى يمنع مصنع العربية انه يقدر يعملها مفتاح بديل؟؟؟؟؟ بجد كنت مستغرب اوى اوى وهو مكنش عارف يرد عليا يقول ايه .. معرفش حسيت بشىء غريب فى الموضوع ولكن لقلة الحيلة قولت اخوض التجربة واخد المفتاح واخرطه واجى تانى احطله البوردة والاكواد واكيد مادام نيتى سليمة ربنا مش هيكسفنى والمفتاح هيشتغل .. اخدت المفتاح واستلمت العربية 4:20 عصرا ورجعت على البيت بعد صراع طويل مع المحور والدائرى والزراعى اللى ربنا يولع فيهم بجاز
المهم وانا فى الشغل النهاردة واحد زميلى قالى ان مفتاحه قبل كده اتكسر وراح عند واحد مشهور عندنا فى مفاتيح وابواب السيارات اداله مفتاح زى الاصلى بالظبط وخرطه ونقل البوردة وجزء التشفير فى المفتاح الجديد واشتغل تمام لكن انا قولتله ان حالتى مختلفة انا مش معايا المفتاح اساسا انا عاوز واحد جديد خالص ببوردة جديدة قالى روح بس هو بيعمل كل ده .. سمعت الكلام وروحت ولكن كانت الفاجعة انه ممكن بس يخرط ويحط جزء التكويد ويحمل الاكواد لكن لسه موصلش لانه يجيب بوردة ويحطها فى المفتاح فالبتالى كده مش هيفدنى بحاجة يبقى اروح التوكيل وخلاص واكمل معاهم المشوار (انا زعلت بعد ما حسيت ان فيه امل انى ابعد عن مشوار التوكيل) ومشيت على الشغل تانى وفضلت افكر قولت طيب ايه المشكلة لو هو خرط المفتاح ودخل جوة الكوالين ووفتح وحط جزء التشفير وحمل الكود وبالتالى العربية تدور يعنى باختصار هنفتح الابواب بالمفتاح وندور العربية يبقى ايه اللى ناقص؟؟ الريموت؟؟ طيب ما فى داهية الريموت المهم يكون فيه نسخة استبن فى حالة لا قدر الله ضياع المفتاح اللى معايا .. رجعتله تانى وانا مروح من الشغل وحكيتله على اللى انا عاوزه وقاللى صح ممكن نعمل ده وربنا يسهل ويشتغل وقالى بس هتتكلف 250 جنيه انا قولت مااشى بس اخلص ماهو تقريبا نفس سعر التوكيل .. اخد المفتاح الجديد وخرطه على القديم وجاب جزء التشفير (الترانسبوندر حسب لغته) حطه على المفتاح القديم من بره ولزقه بشكرتون وراح حط المفتاح فى الكونتاك وفضل يفتح ويطفى الكونتاك حوالى 5 مرات متتالية وانا مش فاهم اى حاجة ورجع على المحل فك الترانسبوندر وحط المفتاح القديم على جهاز عنده بيقرأ الشفرات لمدة 10 ثوانى ورجع حد كمان الترنسبوندر على نفس الجهاز بعدين فك المفتاح الجديد وحط الترانسبوندر جواه بعد ما وسعله مكان جوة وظبط الدنيا وقفل المفتاح وراح يجرب .. حطه فى الباب فتح السنتر والحمد لله قعد وحطه فى الكونتاك ودور واذ بالعربية بتدوووووووور قفل وجرب مرة واتنين والحمد لله دارت وكان مبسوط اوى انه عمل اللى التوكيل قال ان ممكن مينجحش! انا اتبسط اوى بصراحة ان العملية نجحت برغم ان مفيش ريموت لان مفيش بوردة لكن المهم فيه نسخة مفتاح تفتح العربية وتدورها

انا تعبت من كتر الكتابة اسف اعذرونى .. دى كانت تجربتى فى صيانة ال 10 الاف اللى اتكلفت حوالى 105 جم صيانة دورية + 130 جم توريد مفتاح بدون بوردة يعىن اجمالى حوالى 235 جم
محلوظة انا مغيرتش زيت ولا فلتر لان العداد عامل 6000 كم بس انا كنت اضطريت اعمل الصيانة لان كان فاضل اسبوع ويبقى فات 3 شهور على الصيانة اللى قبلها وانتم طبعا عارفين شروط الضمان ووجع الدماغ ده

تحياتى ومرحبا بالتعليقات

المشاركة الأصلية كتبت بواسطة khaled_saga

شكرا هيما لمرورك

1. احتمال مستبعد لا قدر الله سرقة العربية من قبل الفنى لسببين اولهم انه معروف هنا فى بنها وسمعته كويسة وثانيا هو مش قريب منى جدا يعنى لا يعرف بيتى ولا يعرف انا ساكن فين عشان يفكر انه يسرق العربية .. بس هقولك حاجة انى لجأت للحل ده لأن بصراحة فى التوكيل عقدولى الموضوع بشكل مبالغ فيه وعامة ربنا يسترها

2. انا فعلا شاكك فى موضوع كنترول ال abs لان اللمبة مش منورة ولكن بقول فعلا هم مادام قالوا هنغيره هخسر انا ايه؟؟ انا بس قلقان فعلا لانى بحس بدربكة غريبة لما بكبس فرامل جامد وبحس ساعتها الفرامل بتهرب ومش بتقفش كويس وده قالقنى لربما الواحد يتحط فى موقف مفاجىء يضطر يفرمل فجأة .. الغريب ان الفرامل العادية شغالة تمام يعنى قبل مرحلة الكبس الجامد اللى تخلى ال abs يشتغل

هيما انا فكرت فى كلامك تانى لثوانى بعد مارديت عليك واكتشفت ان من المستحيل ان الفنى يسرق العربية لسبب بسيط وهو ان كان معاه كود الايموبلايزر انما مش معاه نسخة من المفتاح اللى يقدر يفتح بيه الابواب اصلا او يدور العربية!!؟؟ صح ولا لأ؟؟