الموضوع: بتسيب عربيتك مفتوحة و تنزل تشتري حاجة؟

متهيالى ساعت كدة وساعات كدة حسب الظروف وحسب المكان الى هشترى منة .. بعيد ولا لا .. وهل هشوف العربية منة ولا لا؟؟

على حسب العربيه وحسب المكان يعنى لو الريتمو مفيش حاجه جواها اساسا تتسرق لكن الشاهين ببقى سايب جواها كل حاجه (الموبايل والرخص وسماعة البلوتوث .... الخ) فبقفلها لانها بريموت ووحدات رفع وسهله فى القفل مش زى الريتمو

حسب المكان
بس مره كنت بشتري حجات انا و مراتي
وسايب عمر سنه ونص وملك 2 شهر في العربيه ومشغل التكيف فخد الرموت وقفلت البا ونزلت وعين علي العربيه

أنا ممكن أسيبها مفتوحة لأني منفضها من جوه مابسيبش حاجة في العربية. لكن بيبقى عندي شعور أني قصرت في حاجة

لكن أسيبها دايرة أو أسيب المفتاح فيها مستحيل مستحيل لو حتى هانزل أزود كاوتش

لو هاسيبها فترة طويلة طبعاً باقفلها.

لو سايبها في مكان غير الشغل أو البيت باقفلها + باستخدم العصاية اللي برتبط طارة الدركسيون في الدبرياج + عامل مفتاح يفصل سلك الإشعال عن البوبينة بافصله و أنا نازل و أقفل عليه

لو هجيب حاجة من الكشك عالسريع غير كدة مستحيل
ولو هسيب في العربية امي مثلا أو اختي باقفل الشباك بتاع السواق والباب وبقية الشبابيك نص قفلة كدة لأن في ثانية برضة ممكن تلاقي واحد نط او اتنين وخدوا العربية بالناس اللي فيها
ونصيحة محدش يسيبها ولا دايرة ولا مفتوحة لو فيها رفايع زي M.Mokhtar عشان الدنيا بقت مفيهاش أمان والحرامي في ثانية بينجز مهمته
انا كنت باكسل بس سمعت موقف برضة واحد نزل يجيب علبة سجاير من كشك - في شيراتون برضة - وفي ثانية العربية طارت بس لاقاها تاني ومش عارف تفاصيل اوي هو كان واحد واقف عند الكشك وانا سايب العربية دايرة فقاللي انا معايا اللانسر دي وحصل فيها كذا كذا ومتسيبشي عربيتك دايرة ابدا
بصراحة حسبتها :تطفي العربية واقفل الشبابيك والاربع ابواب (معنديش ولا سنتر ولا شبابيك كهربا) وابقى واقف متطمن على عربيتي ولا اكسل وفجأة ادور وشي اركب العربية مالقيهاش واقفة مطرح ماركنتها والاقيها بتبعد عنيييييييييييييييي

انا كنت زمان بقول ايه اللى هيحصل! بسيبها مفتوحه و بس اخذ كل المحتويات المهمه منها

بس كنت مره عند كشك فى مدان المحكمه و صاحبى و انا قاعدين بنشرب بيبسى :) و الاقيلك واحد شمام ابن.... بيفتح العربية اللى اودمنا! انا و صاحبى طبعا فاكرين ان دا صاحبها على الرغم من اننا مستغربين ان ازاى واحد معفن كدا يركب لانوس و ساعتها كانت اللانوس تو لسه نازلة :) المهم الاقى الراجل بيبص بصات غريبة! فانا ابتديت اشك! فحاولت انده شوية شباب عشان نتلم عليه و نظبطه لو هو حرامى!! بس قلت استنا لاقيته فتح الباب و دخل فى ثوانى نضف العربية و خذ المحفظة و الموبيل! انا شفتو بيشيل الحاجة فى جيبو فنزلت من عربيت صاحبى و قلت هلم الشباب و نروح نحاول نمسكه!! المهم صاحبى لحق صاحب العربية اللى نايم فى الكشك و بيشرب بيبسى و سجاير ولا على باله العربية! و انا لاقيت عربية 132 فيها 4 شباب تمام التمام ندلتهم و قلت حرامى يا رجاله الراجل كان ضارب حاجة فسرعته كانت بسيطة فأتمسك بسهوله!!طبعا مسكو الراجل عجنووه و خدو منو كل حاجة! موبيلين!! و محفظة! و شوية فلوس (بيقلب الناس من الصبح :))!! و خدو منو السكينة ! الراجل شاف يوم اسود و اتضرب ضرب عمرى ما شفته بس من ساعة الموقف المرعب دا بطلت انزل من العربية الا لما اقفلها تماما و ااخذ كل شئ منها!!

مع احترامى لجميع اللى اختارو الخيار ( اه عادى يعنى ) مش فارقة معاهم العربية حتى لو العربية اتسرقت .... حصل موقف واحد ممكن يخلينى اشيل العربية واطلع بيها شقتنا كمان الموقف هو :
لينا جارنا محترم معاه تاكسى تويوتا كرولا هو قديم بس اتسرق عارفين اتسرق فيييين تخيلو اتسرق فيييين والله ما هتصدقو التاكسى اتسرق فى مرور بين السريات الراجل الغلبان راح يعمل فحص ويعمل تجديد للرخصة ساب التاكسى مفتوح وبطل العربية واخد منها المفتاح وراح داخل جوه المرور بعد ما خلص كله طلع ملاقش التاكسى الراجل طبعا من غير كلام اغم عليه حتى مفكرش انه الونش شاله ولا حاجة طبعا بعد ما فاق راح يعمل محضر وكدا بقى.... طبعا التاكسى زمانه متفكك 1000 حته واتباع ..
لاحول ولا قوة الا بالله
اخوكم يوسف