يا جماعة انا قرفت من العربية 127

**magedm2007** · 13-07-2008 08:47 AM

انا عندى عربية 127 مو 82 المهم انا من كذا يوم كتبت موضوع انى كنت عايز اشترى كربراتير ولا اصل القديم المهم انا رسيت على انى اصل القديم رحت للميكانيكى فك الكربراتير وقالى روح ودية عند الحاج ابراهيم اللى فى شبرا رحت وديتة واستلمتة واديتة للميكانيكى ركبة وغير الاربع بوجيهات المهم بحس ان العربية بتنخع بعد ما انقل الفتيس يعنى مش مظبوطة وفى ريحة بنزين جامدة غير محروق جوة العربية
انا قرفت من الصنيعية ومن العربية ومن حياتى والمفروض انى اسافر بيها الاسكندرية يوم الجمعة اللى جاية اية العمل اروح لبتاع الكربراتير يضبطة تاعنى ولا للميكانيكى الميزة الوحيدة بعد تصليح الكربراتير انها بتدور الصبح كويس يعنى اكارك مرتين وادور بتدور على طول
ياريت تفدونى
شكرا

**bassem.naguib** · 13-07-2008 09:16 AM

الأخ ماجد ..

مشكلتك أنك ممكن تكون ما ببتعاملش مع صنايعي كويس .. أو مش فاهم المشكلة من الأساس .. فبتلاقي العملية بتفتح معاك .. وأكيد أي واحد لما بيلاقي العربية بتاعته مش مظبوطة بيتعكنن وبيكره اليوم اللي اشترى فيه العربية حتى لو كانت لمبورجيني .

ولو عاوز حاجة أنا تحت أمرك .. أعرف ميكانيكي كويس .

**MMIsmail** · 13-07-2008 10:05 AM

لو مشكلة فى الكرابرتير غيروا بواحد استيراد احسن واشترى دماغك بس ممكن تكون بنزين 80 او ضبط كهرباء ولو فى رايحة بنزين شوف التسريب ممكن يكون من تنك البنزين او الخراطيم الواصلة .ربنا يوافقك

**yaskhl** · 13-07-2008 12:34 PM

بناء عن تجربة احذر كل اعضاء المنتدى من ورشة الحاج ابراهيم بتاع الكربراتير اللى فى شبرا همهم دلوقتى يلموا فلوس وخلاص.
من 6 شهور الميكانيكى اللى بااتعامل معاه قالى الكربراتير بتاعك لازم يروح عند الحاج ابراهيم اللى فى شبرا وبعتنا الكربراتير مع صبى الميكانيكى واخد 120 جنيه وربنا مايوريك على اللى حصل بعد كده العربية بقت تنطط وهى ماشية وموش عاوزة تظبط خالص. المهم الميكانيكى قالى ارجع له وخليه يظبط الكربراتير وهو راكب فى العربية رجعتله وفيه واحد رفيع هناك واصلع شويه عامل فيها لواء شرطة وبيتعامل مع الناس بكل قرف المهم قال لى ماله الكربراتير زى الفل دا عيب ميكانيكى موش عارف يظبط الهوا وراح عامل كده حركتين بالمفكات وظبط العربيه يومين بالظبط والعربيه رجت تانى زى الزفت رجعت له مرة تانية وقعد يجيب شمال ويمين وموش عاوز يعترف ان العيب منهم المهم علشان يعجزنى قالى الكربراتير كويس انت عندك المشكلة فى طقم الكهربا وسلوك البوجيهات روح اشتريهم وتعالى وانا هااظبطلك العربية قولت له والله انا غيرت البوجيهات اكتر من مرة بسبب الكربراتير ولو جبت دلوقت بوجيهات تانية وسلوك والحاجات دى كلها وماظبطتش العربية يبقى انت غرمتنى على الفاضى قالى خلاص اشترى بوجيهات شامبيون من الراجل اللى على اول الشارع وانا هااجيب السلك من عندى ونجرب المهم ماظبطتش برضه واخيرا على مضض فك الكربراتير مره اخرى وظبطه فى الورشه بالعافيه واشتغل بس موش بالكفائة المطلوبة. من الملاحظ وانت واقف فى الورشة بتلاقى ناس كتيرة راجعا له لانه موش بيظبط الكربراتير كويس.انا صرفت فى حكايه الكربراتير ده حوالى 240 جنية غير الوقت اللى ضاع فى المشاوير. مع العلم ان الاستيراد لن يتجاوز 500 جنيه لان عربيتى شاهين. نصيحة شرا العبد ولا ترييته.

**hazem_khidr** · 13-07-2008 05:02 PM

ضبط الكاربيراتير مفيش منه فايده
هات واحد جديد احسن ليك او استيراد علي تجربه
و للاسف فلوسك راحت علي الارض:(

**mohamed2002** · 13-07-2008 05:14 PM

هات لك واحد استيراد وريح دماغك وشوف الفرق في السعر بينه وبين الجديد لو مش كبير يبقي هات جديد وريح دماغك

**mohamed ibiza** · 13-07-2008 05:26 PM

يا اما تعمله طقم اصلاح يا اما تجيب واحد استيراد اوفر او لو هتتبه نظام حقي و حقك تروح للراجل و تقوله انا مش دافع فلوس عشان اخده زي ما وديته و تخليه يبص عليه تاني و تقف علي ايده و تشوفه بيعمل ايه

**ahmedsrs** · 13-07-2008 10:34 PM

اصلاح الكربيراتير عن تجارب كتير جدا غير مفيد بالمرة هاوت واحد جديد فى علبته احسن

**aid904** · 14-07-2008 12:52 AM

كلام الاستاذ yaskhl بخصوص ورشه الحاج إبراهيم شبرا صحيح مئه في المئه وأنا سبق أن ذكرت لك في موضوعك السابق ان الورشه لم تعد ذي زمان وفقدت مصداقيتها .
المهم خلاصه الكلام بيع القديم واشتري جديد و سيبك من الاستيراد ممكن يكون متصلح متركبله أكس وباب ودة مش هيعيش كتير وهيأكل بنزين ودة اللي هأعمله بس مستني أقبض أول الشهر