الموضوع: Fiat/Seat 127-133

بص انا مش هازود كتير عن اللي اتقال :) المبلغ ده فعلاً لو جاب هاتبقى حاجة تعبانة.. لسة واحد قريبي صارف على عربيته ال 127 7000 جنية عشان تتظبط " ده بغض النظر عن انك عايز حاجات زي الزجاج الفيمية و السبويلر و الشكمان بأد كده, ده غير لو هاتسقط موتور والتكاليف بتاعته, ده غير ان مفيش حاجة اسمها 127 او 133 بتكييف و باور !! ", و اصلاً اديتله كلمتين حلوين عشان انا شايفة انه صرف المبلغ ده على الأرض !!

بص, بجد نصيحة اتقل شويتين لحد ما يبقى معاك فلوس أكتر وتجيب حاجة متبهدلكش, خاصة انك اكيد لسة طالب و مش هايبقى معاك الألافات اللي تخليك كل يوم و التاني عند الميكانيكي.. يعني سوري الواحد بيبقى بيشتغل وساعات العربية بتزنقه في فلوس و بيبقى محتاس..!! و متقلقش مش فايتك كتير يعني السواقة في مصر مش متعة زي مانت متحيل "biggrin"

المشاركة الأصلية كتبت بواسطة transhat

بأمانه احبطوني خااااااالص
طيب الماروتي يتجبلها تكيف و دركسيون باور ؟
واهى عربيه محترمه و ماسكه نفسها و جديده و مش هتطلب كتير
بس ممكن اسقطلها ماتور ؟ (الفلوس متوفره)

لا الماروتى اخرك حتركبلها تكيف جديد ب 3000 تقريبا لكن ولا باور ولا غيره وعشان تجيب ماوتى بحاله كويسه حتبتدى من 20 او 25 الف

خليك دلوقتى فى ال 127 وشوف حتنفع معاك ولالا ومصاريفها مش غاليه بالنسبه للمرايات والفوانيس والكلام ده لكن لو حنتلم عن تسقيط مواتير وكده فده كلام تانى خالص ال 127 بيتسقط فيها مواتير وتيربو كمان بس كله بتمنه يعنى عاوزه 20 باكو عشان تبقى اللى فى دماغك يعنى 20 الف +5 او 7 الاف تمنها يعنى 27 الف ودول يجيبولك عربيه حديثه فيها باور وتكييف ازاز كهربا وخلافه
انا كان معايا 128 صرفت عليها 10 الاف تقريبا ولما جيت ابيعها خسرت فيها + انها برضه كان 128 اينعم كانت مميزه جدا جدا وغيرت شكلها خالص من جوه ومن بره بس برضه اسمها 128 ولا تكييبف ولا باور وعيوبها هى هى

المشاركة الأصلية كتبت بواسطة transhat

ولله شكراً لمتبعتك ياميسوالكس
و انا فعلاً احبط لل127 من ناحية اني اشتريها
فقررت اجيب متسوبيشي كولت لأمي لو قفلت معايا هجيب 127
طيب لو حبيت انعم دركسيون ال 127 و اغير التابلو دا مش غالي اوي :) ياعني ممكن يكلفني في حدود ال 5 باكو
انا معايا 10 الف حالياً قولت اطلع 5 منهم و اسيب التانين تظبيط .
و في فلوس تصليح
فأيه رأيك , كولت بردو كويسه , بس بتسحب و هطلع عيني و لا خفيفه زى ال127؟
و تصليحها برضو
و كده انا اخدت المعلومات الكافيه و اشكرك جداً يارت بس تاتبع اخر اسأله
و صرفت فكرة ال كرولا.

دركسيون ال 127 مش تقيل اوى زى عربيات تانيه طبعا لو العفشه مظبوطه صح من ناحيه الاسكاترا والمقصات وخلافه وتغسل وتشحم العربيه من تحت بأستمرار لكن برضه هو مش ناعم اوى زى الباور ومينفعش تركب باور فى ال 127 خالص لان حوضها ضيق ومش حتلاقى اسكاترا باور على ادها الا بقى لو عملت تعديلات وحوارات كتيييييييير انت فى غنى عنها لان فى الاخر الباور برضه مش حيشتغل صح فيها زى العربيه اللى نازله فابريكه باور
انا عن تغيير التابلوه فينفع تركب ليها تابلوه ال 127 السوبر فيورا او الفيورا اللى هى ال 127 النصر ال 4 باب اكيد عارفها ده التابلوه اللى ينفع فى ال 127 فقط او ممكن تابلو فيات اونو بس ده حيحتاج تعديلات فى اقواعد بتاعته والضفيره بتاعه الكهربا وخلافه

المتسوبيشى الكولت معنديش خلفيه كبيره عنها لانها مش منتشره وقطع غيارها الطبيعى حتلاقيها غاليه جدا جدا لانها يابانى ومش منتشره كتير
ده غير انى اللى اعرفه ان المتسوبيشى الكولت موديل تسعينات حتعمل 17 الف اقل واجب ده فيه ناس طالبه فيها 25 الف واكتر كمان
اللى يخليك تدفع المبلغ ده فى الكولت هاتلك فيات بونتو او تيمبرا او بلاش فيات خالص ممكن تجيب هيونداى اكسيل هاتش باك فيها باور وتكييف فى حدود 25 الى 28 الف

الخلاصه مفيش حاجه فى الدنيا بتيجى مره واحده يا اما تصبر المبلغ اللى معاك يبقى فى حدود ال 25 الف عشان تركب عربيه تكون منتشره وقطع غيارها رخيصه وتوفره وفيها تكييف وباور زى هيونداى او فيات او سوزوكى
او تركب دلوقتى 127 وتتعلم فيها وتاخد خبره وبعد كده ربنا يكرمك وتبيعها وتكمل على فلوسها تجيب حاجه بتكييف وباور
وكلنا اكيد عملنا كده فيه اللى ركب حاجه على اد فلوسه فى الاول وفيه مننا اللى قال يا اركب عربيه يا بلاش وصبر لحد ما المبلغ اللى معاه زاد وجاب حاجه نضيفه بالمره

وعلى فكره فيه عربيات ب15 و 17 الف حتلاقى فيها تكييف وباور زى الهوندا التمانينات والمازدا التمنينات والكرولا برضه تمانينات بس العربيات دى عفى عليها الزمن وطالع عينها حتلاقيها مهلوكه وككلها مشاكل فى الغالب الا من رحم ربى وقطع غيارها انقرضت وممكن عربيتك تقف كام اسبوع وتسافر عشان تجيب ليها قطعه غيار ده غير ان شكلها برضه مش حيبقى ظريف يبقى ابعد عنها وريح دماغك انا بقولك كده عن خبره عشان محدش يلعب فى دماغك ويلبسك عربيه ب 15 او 17 الف ويقولك اهى فيها تكييف وباور وانت تلبسها ومتلاقيش ليها قطع غيار بعد كده او تدوخ بيها على الصنايعيه اللى مش بيفهمو فيها وبدل ما يصلحوها يخربوها لان العربيات دى ليها ناس معينه بتشتغل فيها

المشاركة الأصلية كتبت بواسطة transhat

شكراً يا أستاذ ميسوالكس
ولله اكثر الناس احببتهم لأنك ساعدتني و مسبتش الموضوع
بما أنك جربت الفيات 127
ممكن تابلو فيات بونتو الصغيره ؟ او فولكس بولو ؟ او اتوس؟ لأن الأتوس صغنطاطه زي ال 127 كده
و البونتو اكبر شويه و البولو قد ال 127 شويه
و على فكره انا عمري ما أجيب عربيه فيها تاكيف و بور ب 17 الف او 20 حتى , لأنها بتبقى عربيات طالع عينها او زة ماتقول ماقسوما نصفين او ضايعه من حالتها لكن ممكن نقول لو عربيه صغيره زى الأونو شغال.
بردو البياخد الحاجات ديه بيبقى واخدها عشان يعدلها و يخليها مثلاً لانسر ايفو عليها مكنه mivec
عشان كده فكرت في الكولت , لكن ممكن نقول بولو او بونتو او فولكس جولف القديمه
عجبتني اوي بردو الإيبيزا , عربيه ممتازه جداً و صاروخ ارضي جاوي و شبابيه و ممكن تتظبط و قطع غيارها رخيصه بردو
و في بولو ممتازه و شبابيه (بعد التظبيط) و صاروخ صغنطوط
في بردو لانسر بطه ,, شبابيه باجنوط احترافيه من غير تظبيط تبقى تمام
فقادمي 4 منهم 2 او واحده ممكن تيجي
الإيبيزا و ال 127
طبعاً 127 عايزلها تابلوه و اقلهم يبقى بونتو اوإيبيزا!!! او اتوس و فيتيس جميل و كراسي حلوه هتكلفني بتاع 6000 جندي تعديل و 5 باكو
و انا معايا 10000 الف و ممكن ازود 11
بس ياجدعان اخري اخري اخري 12-13 باكو بالكتير
5 للعربيه قريب
و الباقي تعديلات واحده واحده
-----
ايه رأيكم بالزات الإبيزا ؟

العفو على ايه كلنا اخوات
طب الابيزا مش بالسعر اللى انت بتتكلم فيه ده خااااااااالص وهى الابيزا والبولو فعلا افضل اختيار لو انت ناوى تصرف وتعدل بقى ومواتير وفرامل وكراسى والكلام ده كله
بس الابيزا بتبتدى من 94 وسعرها بيبتدى من 25 الف اللى يتقال عليها عربيه ولو نضيفه اوى حتعمل 30 الف

الا بقا لو قصدك على الابيزا اللى قبل 94 اللى هى سيستم بورش ودى مينفعش فيها اى تعديلات خالص
لكن اللى بعد 94 اللى هى المعروفه دى ينفع فيها كل التعديلات باور وتكييف وفتحه سقف وموتور 1800 وتعديل عفشه وفرامل
وده طبعااااااا راجع لان الابيزا اصلا من مجموعه فولكس فاجن وكل قطع غيارها المكانيكيه هى هى بتاعه الجولف فبيركب عليها مواتير وعفشه الجولف
اما عن التابلوه فتابلوه الابيزا بيتشال ويركب بتاع الابيزا 2001 وده شكله حديث جدا زى بتاع اللانوس والنوبيرا كده مثلا

على فكره انت كده بتوه نفسك وبتبعد بعيد عن الموضوع انت دلوقتى معاك 5000 يبقى دور على 127 تبقى حالتها كويسه وبعد كده لما تيجى الفلوس ابقى فكر فى التعديلات
اصلا مفيش عربيه اقل من 10 الاف ينفع فيها تعديلات وكلام من ده غير ال 128 و ال 127 دول اسهل واشهر عربيات بتتعدل فى الرينج ده واللعب فيهم كتييييييييييييير
فلما تجيلك فلوس ساعتها نبقى نتكلم فى اللى ممكن تعمله فى حدود المبلغ بتاعك

ركز تفكيرك دلوقتى فى حاجه واحده بس انك تشترى عربيه نضييييييييييفه ب 5000 جنيه