مرجع عملي لأعطال ستروينيه وحلولها

**melkhayat83** · 26-11-2012 03:45 PM

انا فكرت نعمل الموضوع ده كمساعده لتسهيل تشخيص الأعطال ونقلل دائرة الأحتمالات الخاصه بالعطل الي بيظهر فايريت كل واحد يحب يساهم في المرجع ده يقولنا
1- موديل العربيه ؟؟
2- العطل الي قابله؟؟
3- الحل الي وصلتله؟؟
وانا هابتدي بنفسي
-----------------------------------------------------------------------------------------------

العربيه اكسارا 2 اوتوماتيك
المشاكل والحلول
1- لمبه air bag منورة باستمرار والكلاكس فاصل : تم تغيير شريط air bag ب 300 جنيه
2- لمبه الزيت بتنور علي فترات لما ادوس فرامل واهدي العربيه : تم تغيير زيت وفلتر بس للأسف نورت تاني بعدها بيوم مرة واحده هاجرب اشيل نصل لتر زيت واشوف النتيجه
لأن الزيت عندي معدي ال max بحوالي 1.5 سم
3- المشكله الغربيه بقي ظهور شويه اعراض ابتدت بأني اجي ادور العربيه الصبح الاقي البطاريه نايمه
والعربيه وانا ماشي علي السلانسيه بتبطل بعد الكشف لقيت العربيه مديه عطل علي الكمبيوتر battery Voltage too low وشكيت في الدينامو بس لقيت الكابل بتاعه مهزوز
وفيه زيت نضفناه وظبطناه واختفي الموضوع ليوم ورجع ظهر تاني اول ماهدي واقف بالعربيه وهي سخنه العربيه بتبطل بعد شويه متابعه مني لاحظت انها بتبطل وانا علي السلانسيه
في لحظه دوران مروحه التبريد قولت يمكن بطاريه بتودع وجت في دماغي فكرة اني اول مااشتريت العربيه كانت كشافات الشبوره كابلاتها مفصوله وكل الي عملته اني وصلتها
فاقولت افصل كابل كشافات الشابورة واجرب وارد يكون في علاقه او وارد تكون صدفه بس الوضع لحد دلوقتي تمام وماحصلش حاجة ولسه تحت الأختبار

**Mohab.Nabil** · 26-11-2012 04:33 PM

فكرة الموضوع ممتازة و فعلا هيكون مرجع لناس كتير

1- موديل العربيه ؟؟

ستروين سى فور 2006

2- العطل الي قابله؟؟

العطل الاول : لمبة check injection نورت بس العربية كانت شغالة عادى خالص

العطل التانى : العربية فصلت خالص و مكانتش بتسجيب لاى حاجة و مفيش اى شاشة شغالة و الدركسيون مقفول

3- الحل الي وصلتله؟؟

الحل بتاع العطل الاول : رحت لمركز صيانة و كشفوا على العربية و لغوا الـ error و الحمد لله مرجعش تانى

الحل بتاع العطل التانى : روحت عشان اجيب حد من صحابى بوصلة بطارية نشحن البطارية لأنى كنت شاكك انها نايمة اول ما وصلت دورت العربية دارت لوحدها خالص الحمد لله من غير اى مشاكل و مش عارف لحد دلوقتى ايه اللى حصل او ايه اللى خلاها ترجع لوحدها

**haissam24h** · 26-11-2012 06:16 PM

بعض المشاكل الى واجهتنى
كثير
1 المروحه بتاعت التبريد فصلت مرة وبشيك عليها لقيت الكتاوت الى فى علبه الفيوزات الى فى جنب الماتور بايز بدلته وكملت مشوار واشتغلت
2 الاشارات فصلت لوحدها هى والكاسيت والصالون ولطع العيب فيوزات
3-مرة العربيه مش رديت تدور نهائى نهائى نهائى
ومفيش كهربه واصله للراشاشات
المهم شيكت على الوصلات لقتها تمام
قومت جبت سلكه ووصلتها فى الرشاش والطرف الثانى على الكهربه فى البطاريه قامت العربيه دارت عملت كهربه للرشاشات لحد لما ودتها للكمبيوتر وطلع المشكله فى الارضى بتاع الكمبيوتر واتغير
4فجاء بدور العربيه لقيت المواشرات كلها بتلعى وتوطى والعربيه تبرجل وتبطل بالكشف طلع الارضى بتاع الماتور سايب
وحجات كثير كل ما اافتكر هشارك باذن الله وموضوع جيد

**Mohab.Nabil** · 26-11-2012 06:21 PM

المشاركة الأصلية كتبت بواسطة haissam24h

بعض المشاكل الى واجهتنى
كثير
1 المروحه بتاعت التبريد فصلت مرة وبشيك عليها لقيت الكتاوت الى فى علبه الفيوزات الى فى جنب الماتور بايز بدلته وكملت مشوار واشتغلت
2 الاشارات فصلت لوحدها هى والكاسيت والصالون ولطع العيب فيوزات
3-مرة العربيه مش رديت تدور نهائى نهائى نهائى
ومفيش كهربه واصله للراشاشات
المهم شيكت على الوصلات لقتها تمام
قومت جبت سلكه ووصلتها فى الرشاش والطرف الثانى على الكهربه فى البطاريه قامت العربيه دارت عملت كهربه للرشاشات لحد لما ودتها للكمبيوتر وطلع المشكله فى الارضى بتاع الكمبيوتر واتغير
4فجاء بدور العربيه لقيت المواشرات كلها بتلعى وتوطى والعربيه تبرجل وتبطل بالكشف طلع الارضى بتاع الماتور سايب
وحجات كثير كل ما اافتكر هشارك باذن الله وموضوع جيد

عربية حضرتك نوعها ايه ؟

**mangawy2012** · 27-11-2012 12:40 AM

لمبة ال check نورت ورجرجه جامده اول لما دورت وكنت راكنها بقالي 3 ايام المهم فصلت الكونتاكت ودورت تاني الرجرجه راحت ولمبة ال check رراحت ياترى ده من ايه؟

**mangawy2012** · 27-11-2012 12:43 AM

عربيتي c4

**melkhayat83** · 27-11-2012 09:36 AM

المشاركة الأصلية كتبت بواسطة mangawy2012

لمبة ال check نورت ورجرجه جامده اول لما دورت وكنت راكنها بقالي 3 ايام المهم فصلت الكونتاكت ودورت تاني الرجرجه راحت ولمبة ال check رراحت ياترى ده من ايه؟

وارد جدا انه يكون تهييس كهرباء نتيجه للركن تكون البطاريه ريحت شويه وانا قريت قبل كده في منتدي انجليزي عن الستروين عموما انها حساسه جدا لكهرباء البطاريه بمعني ان بطاريتك تكون علي الشعرة والله أعلم

**samyyousef** · 27-11-2012 09:59 AM

موضوع مفيد
تحياتي

**mangawy2012** · 27-11-2012 11:13 AM

بس هل الكهربا ليها علاقه بان لمبة ال engine check تنور؟

**melkhayat83** · 27-11-2012 12:04 PM

المشاركة الأصلية كتبت بواسطة mangawy2012

بس هل الكهربا ليها علاقه بان لمبة ال engine check تنور؟

بص ياباشا علي حد علمي check engine معناها ان في مشكله في سنسور معين ولما السنسور قرائته بقت صح للكمبيوتر فالعطل اختفي او بمعني اصح اللمبه طفت فلو عاوز راي قدامك حل من اتنين
ياتكبر دماغك احتمال مايظهرش تاني ولو ظهر تاني تروح تشوفها مسجله ايه علي الكمبيوتر
ياتروح من دلوقتي وتشوفها مسجله ايه