اسئله مبتدأ .. هامة جداً للجميع
السلام عليكم
بعد اذنكم يا شباب عندى كام سؤال عايز استفاد من خبراتكم فيهم
اولاً العربيه عندى كيا ريو 2002 - انجكشن - ماتور 1500 - ماشيه 145 الف - حالة الماتور : كويسه الحمدلله - بحط بنزين 92
ومعلش استحملونى ف الاسئله لانى مبتدأ وحابب استفاد واتعلم
السؤال الاول :
بالنسبه للزيت اللى بتغير كل 3000 ك
لو مثلاً حطيته ومشيت خلال 6 شهور .. 1500 ك بس ، هل لازم اغيرو؟
ولا فكرة انى لازم اغير الزيت كل 6 شهور للزيوت التخليقيه فقط؟
لاننى ببساطه بمشى بالعربيه قليل وال 1500 بعملهم ف 6 او 5 شهور مثلاً ..
السؤال التانى :
انا كنت بحط زيت موبيل اللى بتغير كل 1500 ك ع حد كلام الصنايعى (العلبه لونها ابيض)
بس انا سمعت ان الشل افضل واحسن من الموبيل ، فحابب انى اغير ف الغيار الجاى لشل ان شاء الله
وقريت ان الشل الاحمر بيتغير كل 1500 ك
- فالسؤال هنا : الشل الاحمر ينفع ابدله بالموبيل بالنسبه للعربيه عندى وهيكون افضل؟ ولا مفيش فرق؟
- ولو ينفع اغير الموبيل بالشل ف الغيار الجاى ، التغيير من زيت لزيت تانى لازم اعمل حاجة قبل ما اغيرو؟
يعنى منظف معين بيتحط ع الزيت القديم ولا عادى اخلى الصنايعى ينزل الزيت القديم ويستنى شويه لما ينزل كلو وبعدين يحط زيت الشل الاحمر ، صح كده ولا انا غلطان؟
السؤال التالت:
فى مرة كنت بغير طرمبة الميه ، والميكانيكى وهوه بيفك سير الكاتينه وطلع البلى بتاع الكاتينه
فقالى البلى ده عايز يبأ يتغير قدااام لانه خشن
وسمعنى صوته وفضل يلف فيه بإيده وكان فيه صوت خشونه بسيط كده وقالى تبأ غيرو مع السير بتاع الكاتينه
بس السؤال انا سير الكاتينه عندى مشيت بيه 5000 ك بس وانا اعرف انه بيتغير عند 40 الف كيلو كأقل تقدير
فلو حابب اغير البلى لوحده ، اغيرو دلوقتى ولا استنى ؟
بمعنى اصح البلى مهم انى اغيرو لو فيه صوت خشونه بسيطه ، ولا مش لازم؟
يعنى بيعمل اضرار ع المدى البعيد ع السير ولا ايه؟
السؤال الرابع:
اما دخلت المنتدى الكريم هنا ، عرفت معلومات وحاجات اول مرة اعرفها ، اشكركم عليها
فقريت عن حاجة اسمها دورة تنظيف البنزين و الرشاشات للانجكشن
وكنت ناوى اعملها ان شاء الله
بس قريت ردود ناس بتقول ان العربيه لو متعملش فيها كده خالص من ساعت ما اتجابت وعربيه قديمه ، فالموضوع ده ميتعملش عشان ببساطه العربيه خلاص عملت ترسبات من البنزين وغيرو
فالمنظف ده هيخلى الترسبات تدخل ف الفلاتر وتسدها وهتبوظ مش هتصلح..
فأنا عمرى ما عملت الموضوع ده ف العربيه عندى
ومعرفش اللى انا شاريها منه كان بيعملها ولا لأ
فالسؤال هنا: ينفع انى اعمله للتنظيف والصيانه؟ وانتظم كل فتره انى اعمله ؟ ولا طالما معملتهوش يبأ معملش الموضوع ده خالص؟
فيريت تفيدونى ف الموضوع ده عشان مهم بالنسبالى اوى
السؤال الخامس:
عندى مقاس الكاوتش 175/65/14
وعايز اعمل تحديث واركب كاوتشات 15 ، فلو عايز انقل للـ 15
اجيب المقاس ده 185/55/15
صح كده ولا انا غلطان؟
وسؤال ف نفس موضوع الكاوتشات:
اى جنط 15 سبور يركب ع اى كاوتش 15 ، ولا انا فاهم غلط
يعنى ببساطه المقاس ده 185/55/15 يركب عليه اى جنط 15 ؟
والمقاس ده مثلاً كمثال : 195/45/15 يركب عليه اى جنط 15 ؟
ولا لازم جنط معين بمقاس معين؟
يريت افهم الجزئيه ديه..
السؤال السادس والاخير :oops2::
ايه افضل انواع الدهان المعقوله ف السعر
غير المصرى
بمعنى اصح نوع دهان يكون معقول ف سعره وجودته وخماته كويسه
بس طبعاً غير الالمانى لانه مولع ف السعر اوى
فإيه افضل الانواع المتوسطة؟
وكده اسئلتى كلها خلصت
والف شكر ليكم
والاسئله ديه مفيدة لكل المبتدأين اللى زى حالتى
فيريت حد يفيدينا فيهم
والف شكر للمنتدى العظيم :beat5:
تم النقل للقسم العام مؤقتا بواسطتي
حتي يتم الرد علي استفسارات العضو
مشرف عام 1