السلام عليكم يا صقور
الموضوع باختصار انى كنت اضطريت أمشى فى بعض الطرق المكسره الكام يوم اللى فاتوا فحبيت انقل لكم التجربه و العلاج من السبع و كمان بعض الملاحظات اللى لاحظتها اثناء فتره الانتظار على العربيات الجديده اللى كانت داخله الصيانه

المهم الموضوع بدأ بصوت تزييق من الجانب الشمال و بيظهر مع النقر و المطبات بصوره كانت بسيطه و لكنها ازدادت قوى مؤخرا و بتظهر كمان لو ضغطت على الكبوت من الجهه الشمال. انا شكيت بصراحه فى عمود الاتزان اللى مركبه او تكون فى حاجه فى المساعد نفسه فكلمت السبع و حجزت ميعاد للصيانه و المهندس اول ما قلتله قاللى من نفسه انا هاكشف على المساعد و هبص بالمره على العمود و الجلب بتاعته علشان اطمن . المهم نتيجه الكشف كانت ان كاوتشه المساعد الشمال كانت مقطوعه و هى السبب و تم تغييرها على حسابى طبعا لان الكاوتش مش داخل فى الضمان و بعد كده جربت العربيه و الصوت راح نهائى الحمد لله

الإيجابيات :
- تحليل و حل المشكله. تم بسرعه جدا بالرغم من انه فك المساعد و اختبره كمان و بص على عمود الميزان
- وضع قطعه الغيار التالفه و كان فيها قطع واضح و ده علشان اثبات ان المشكله منها فعلا
- تم تجربه السياره عده مرات للتأكد من ان المشكله اتحلت فعلا قبل التسليم للعميل
السلبيات:
- التكلفه كانت غاليه شويه بالذات بالنسبه للمصنعيه . يعنى الكاوتشه نفسها كانت ب ٦٩ جنيه بينما المصنعيه ١٠٠ جنيه و بالضرائب بقت تقريبا ١٨٠ جنيه


بعض الملاحظات على العربيات الجديده اللى لقيتها بتعمل صيانه :-
- الصنى الجديده : شفت العاديه و السوبر صالون كمان و كانوا واقفين جنب بعض. بصراحه هناك فرق و انصح اللى عايز يشترى بالسوبر صالون و سمعت بعض الشكاوى من الكاوتش بتاعها و فعلا شكله تعبان بصراحه و محتاج يرجع بريدجستون و يعرض شويه
- القشقاى : كان فيها منها عربيات كتير موجوده ما شاء الله . اللى لفت نظرى ان موديل ٢٠١٣ حجهما بقى أصغر من الموديلات السابقه
- البلوبيرد: عربيه محترمه جدا و فعلا ما اخدتش حقها خالص فى الانتشار بالرغم من امكانياتها
- الجوك: كان برضه فى منها حوالى ٣ عربيات و اللافت للنظر ان أصحابهم سيدات
- الأرمادا: ما شاء الله ليها هيبه كده و ربنا يكون فى عون صاحبها فى البنزين