الموضوع: حدث معى بالامس - تيدا 2007

اخوانى الصقور

ارجو ان تكونوا جميعا بخير و سلام فى ظل ما يعصف بنا تلك الايام

المهم اليكم توصيف ما حدث معى و اسمحوا لى بمقدمه صغيره علشان تعيشوا معى


العربيه : تيدا 2007 هاتشباك اوتوماتيك

كيلومتر : 143000 (143 الف )

الصيانات : جميعها بالتوكيل حتى اكملت العربيه فترة الضمان (بعد 3 سنوات ) بعدها بقيت اكسل وبقيت اغير الزيت فى البنزينه و روحت التوكيل مرتين او ثلاثه لتغيير سير الدينامو

الحاله : العربيه الحمد لله تمام و زى الفل و لا يوجد منها اى شكوى الى ان جاء اليوم الموعود

بدأت فى البدايه احس ان صوت العربيه فيها زنه و كدبت ودانى و قولت يمكن انا فى مكان هادى ( و ده حقيقى - هدوء الصحراء- فيمكن انا سامع الصوت عالى
و واحد صحبى سمع العربيه قالى مفيش حاجه

عوامه البنزين مخرفه منذ اكثر من سنه عمرها ما بتوصل للأخر بس بعد نصف التنك بتشتغل كويس

و اتأقلمت على كده و بقيت بافول على 400 كيلو

بدأت منذ شهر تقريبا مع الصوت العالى الاحظ ان rpm بتاع العربيه عالى شويه اول ما ادور

و كمان بعد ما العربيه تسخن يبقى قريب من 1 او اعلى قليلا

لظروف انشغالى و بعدى عن التوكيل و لازم اخد اجازة و اسافر القاهرة كنت مكبر دماغى شويه

الى ان بالامس شوفت يوم ما يعلم به الا الله

مرة واحد و انا راجع من الشغل الساعه4 العصر و العربيه ماشيه عادى جدا الاقى العربيه بتهدى و الدريكسيوت تقل جامد

ادوس فرامل الاقيها تقيله جدا

ستر ربنا انى كنت على اليمين اديت انتظار و انتظرت حتى وقفت على جنب

بس المشكله ان الطريق سريع و حارتين ومالوش طبان جانبى يعنى كنت سادد حاره تقريبا

و طريق ربنا ما يوريكم كله نقل تقيل و ماشى بسرعه التنين

كلمت صديق لى علشان نقطرها و عقبال ما جالىمش عاوز اقولكم انا مت كام مرة من هول العربيات و هى كابسه و على اخر ثانيه تفرمل لان الحارة اللى جنبها دائما مشغوله

الحمد لله

توقعت انها طلمبه البنزين
قطرت العربيه الى مكان فاضى شويه و الحبل قطع 3 مرات منهم مرة فى ملف

انا كل اللى وعيت عليه ان اكتر من 6 انفار نزلوا من عربياتهم بيجروا على علشان يطلعونى قبل ما تريلا كانت جايه تقتلعنى من الارض

عرفت ان هناك مركز خدمه عندنا فى السويس لسه فاتح بس اللى راحوه قالولى تعبانين على قدهم و لكن لا يوجد بديل

المهم كلمتهم قالولى نبعتلك عربيه تشيلك و تجيبك عندنا و عالطول قالولى تغيير طلمبه

ده وقت التيدا اللى فى الموديل ده و فى اكتر من واحد جالهم فى نفس التوقيت بنفس المشكله

قلتلهم ما نغير الفيوز اللى ضارب بتاع الطلمبه قالوا ما هو هايضرب تانى

قلتله يا باشا دا انا لو هاغيره كل كام يوم مش هاييجى ثمن الطلمبه

قال ما هو ممكن يقطع منك فى اى مكان و تقف فى اى طريق

بصراحه خفت خاصة ان طريق شغلى هو طريق سفر ( السويس - العين السخنه ) و معظم الوقت برجع فى الضلمه

المهم توكلت على الله و قلتله غير يا عم و تم التغيير فى نصف ساعه تقريبا

بس شالوا الكنبه كلها علشان يوصلوا للطلمبه

التكلفه النهائيه

الطلمبه + الفيوز المحروق + النقل + حبشتكانات الضريبه و الخدمه = 2200 جنيه

الحمد لله

الحمد لله إن ربنا ستر .. وموضوع العوامة اللي مخرفة دي مش عندك لوحدك .. موجودة عندي كمان وبردو اتأقلمت عليها .. وكان في واحد أو اتنين في المنتدى هنا اشتكوا بردو من نفس المشكلة