الموضوع: صني 2013 - وها قد سجل العداد 11 ألف كيلومتر !

بسم الله الرحمن الرحيم


أول حاجة أحب أشكر السادة الكرام أحمد مصطفى - دينامو المنتدى . والسيد الدكتور يوسف عوض - قلب الأسد , سواءاً على الدعم الكبير اللي لقيناه من ناحية عرض مواصفات العربية قبل ماشتريها, أو المساعدة على الاستلام والترخيص الجيد للعربية , أو للمتابعة بعد الشراء والتليين المظبوط , أو للمساهمة في حل أي مشكلة طارئة ممكن الواحد يتعرض ليها , بالإضافة إلى الزيارة اللي تم تنظيمها تحت إشراف الرجالة دول لمصنع نيسان في مصر , بشكل حصري وغير مسبوق ماعملتهوش شركة لعملائها هنا

بالمناسبة دي لينك الموضوع الصاروخي اللي لسة معمول وواخد جهد كبير جداً في عمايله وتنسيقه, بجد برافو عليكم وعشرة على عشرة يا رجالة, بسم الله ماشاء الله

http://www.nilemotors.net/Nile/319906-a.html



تاني حاجة, أحب اوضح كل ملاحظاتي بعدالوصول بنجاح بفضل الله لعدد الكيلومترات دي في وقت قصير (أقل من أربع شهور)


وخلينا نتكلم بالترتيب, هاتكلم على كل حاجة في العربية, أجزاء ومميزات ومشاكل أو عيوب, وهاتكلم على الموزع ومركز الخدمة والصيانة كمميزات وعيوب



1- الأداء:


العربية بعد صيانة الألف كيلومتر بتكون لسة جديدة وشبه "مكسوفة" تجري ...مش الجري اللي هو افترا على 180 ورعونة وتعريض الناس للخطر, لأ انك بتحس انها مش بتسحب بقوة كافية تخليك تتخطى المجانين اللي جايين وراك


بعد صيانة الخمستلاف, بتبدأ تحس باختلاف كبير في الأداء, خصوصاً لما تحط زيت 10,000 كيلومتر معدني, هاتلاحظ هدوء صوت المحرك وزيادة التسارع بشكل ملحوظ , السحب بيبدأ يلحقك وقت ماتحتاجه, وان كانت الاستجابة لازالت غير لحظية


بعد صيانة العشرتلاف ... بتبدأ تحسن ان العربية بقت محترفة على الطرق المصرية, تعمل بيها اللي انت عايزه وقت ماتحب ومش بتخذلك بإذن الله, الاحتياج الأكبر للأداء القوي بيكون وقت تفادي الحوادث أو للهروب من سواقين محششين جايين وراك أو جنبك وناويين الشر لعربيتك الحيلة اللي انت دافع دم قلبك وتحويشة عمرك فيها...وهو عايز يدمرهالك علشان ياخد غرزة !!! إلهي يتغرز دنيا وآخرة




2- السحب والتسارع:

قد تكون النقطة دي مش متوضحة قوي في الجزء اللي فوق, لكن خلينا نتكلم بشكل مفصل هنا:

- انت مش محتاج ترفع عداد لفات المحرك وتخليه يعدي أربعتلاف لفة , تحت معظم الظروف هايكون آخرك 3000 أو 3500 لو مفتري

- تسارع العربية مش بيكون واضح غير لما تعدي ستة آلاف كيلومتر ... ساعتها بتحس ان التسارع شديد والعربية بتطير منك وقت ماتحب, لكن راعي خفة وزنها وقوة محركها في الوقت اللي هي فيه مصممة للمشي على الطريق, مش للرزع في الحوائط ...وبالتالي العربية ممكن تتدمر منك تماماً لو تصرفت برعونة وماراعيتش حق الطريق

- صوت المحرك وقت التسارع بيكون ظاهر...وهنا أحب أسجل ملاحظة ماعرفش هل ناس كتير لاحظوها ولا لأ : الدواسة لها ضغطتين , الضغطة العادية اللي بتخليها تتسارع, وضغطة تانية تثبت بيها سرعتك على عداد لفات مش بيزيد عن 2000 في الدقيقة ... أول ماتوصل للسرعة اللي انت عايزها ارفع رجلك من دواسة البنزين ورجعها تاني بشكل أخف قليلاً...هاتلاقي عداد لفات المحرك نزل من 2500 (الطبيعي) إلى 2000 أو أقل حسب سرعتك...وصوت الموتور بدأ يبقى غير مسموع تماماً في نفس الوقت اللي العربية ماشية فيه بسرعتها


أحب انوه ان الحركة دي للقيادة الهادئة, وابتعد عن التقاطعات والأماكن اللي محتاجة عزم وزيادة سرعة وماتعطلش الطريق وراك لو انت كنت أقل من سرعة الطريق القانونية

حاجة كمان: ماتتوقعش لما تزود عن 90 كيلومتر في الساعة ان عداد لفات المحرك هاينزل عن 2500, انت راكب عربية ولها محرك, مش سجادة !




3- العفشة والمساعدين:


عن تجربة , أحمد الله سبحانه وتعالى انه رزق المصريين حد قدر يفهم طبيعة طرقنا المنيلة بستين نيلة ويعمل عفشة ومساعدين ينفعوا ليها !!! الحمدلله العربية مش بتحسسك بالمطبات ولا التعريجات الغريبة والحفر الغبية , لكن كأي عربية تانية لو انت خدت نقرة او مطب أو حفرة على سرعة عالية هاتحس بيهم , وهاتسمع الرزعة المعتادة وقلبك هايزعل جداً على شقى عمرك اللي واحد مهمل مستهتر بيرميه في حفرة على قارعة الطريق !!! لكن لو بنتكلم على القيادة اليومية, لأ العربية فوق الممتازة في النعومة


يلزم التنويه انك لازم تحافظ على ضغط كاوتش العربية على 30 أمامي و33 خلفي...ويفضل النايتروجين لأنه هايفرق (قليلاً) في الإحساس بالنعومة (الهواء الجوي بيحتوي على 78% نايتروجين ...أفضل تحسن مش هايزيد عن 22% في الأداء, ماتحسش انها مصيبة لو انت ماليه هواء مش نايتروجين, أو لو زودت الكاوتش هواء وهو فيه نايتروجين أصلاً)..... الكاوتش الصيني ليس بالنوع الجيد, ولكن الإنسان قابل للتعايش معاه, لأنه واضح انه مصمم للطرق المصرية ومن نفس نوعيتها !! ... بصراحة بعد ماكنت ناوي اجيب كاوتش غالي , ومريت على طرق تأنف الدواب من السير عليها...حسيت اني لو جبت كاوتش غالي هاحطه تحت دراعاتي وامشي حافي !!!




4- استهلاك البنزين :


سبق وعملت كذا مشاركة وموضوع واتكلمت فيهم عن البنزين, العربية استهلاكها للبنزين ثابت 550 كيلومتر لتفويلة التانك (40لتر) ..وكمان هايتبقى فيه كام لتر فكة .... مع الأخذ في الاعتبار ان نسبة الطرق السريعة الطوالي إلى الزحام تكون 70 إلى 30 ..... مشغل التكييف وقافل الزجاج كله

لما الاستهلاك بيزيد تبدأ تشوف ضغط الإطارات ... تبدأ تغير المحطة اللي زودت منها بنزين , لو الاستهلاك ماتحسنش هاتضطر تلجأ لمرة واحدة منظف رشاشات علشان يعيد للعربية حيويتها, مرة واحدة بس قبل ماتغير زيت ممكن تعمل كدة , واعملها تاني بعد 20 ألف كيلومتر ربنا يديك الصحة !

العداد لما بيعيط ولمبة البنزين بتنور ويقوللي بعد فترة ان عدد الكيلومترات المتبقي علشان التانك يخلص = (....) -أيوة دي الإشارة اللي بتظهر لما التانك يقرب يفضى - بادخل المحطة والاقي لسة 5 لتر في التانك !! ياريت دايماً نملا التانك وماننتظرش لحد مايقرب بفضى علشان مايسحبش الرواسب اللي في البنزين ويخليها تأثر على أداء العربية




5- التكييف:

ممكن اكون مشيت 11 ألف كيلومتر ... مشغل التكييف بنسبة 100% !! لست من هواة فتح النوافذ لما باكون سايق , لأني بافضل عدم استنشاق الرحيق المنتشر في أجواء العاصمة, وكمان مش باحب اسمع الموسيقى الهادئة اللي بتعزف في شوارع القاهرة العامرة .... ولا المديح اللي كل الناس بتكيله لبعضها أثناء القيادة, لأن قلبي الضعيف لا يتحمل !!


بعد الفترة دي تشغيل تكييف, بسم الله ماشاء الله تكييف نيسان فعلاً حكاية, لكن مع ملاحظة انه مش هايشتغل بكامل الكفاءة لو انت متوقف أو ماشي بالراحة في الزحمة, وذلك للحفاظ على شحن الفريون. لأنك راكب عربية مش قاعد في تلاجة, وبالتالي أداء التكييف بيتناسب طردياً مع سرعة العربية

على الهامش: أرجو من أي حد من السادة الكرام يروح مركز الصيانة يعرفلي لو كان فلتر التكييف نزل ولا لسة ... علشان محتاج اركبه يحافظ على نظافة الكويل الداخلي ويكفينا شر التراب والدخان في حالة لو حبيت افتح الهواية وادخل الهواء الخارجي



6- الفرامل:


أفضل فرامل تعاملت معاها في حياتي, حقاً ... يمكنك الاعتماد عليها !!!


صوت تزييق الفرامل راح واختفى بلا رجعة بعد صنفرة الطنابير, مع ملاحظة ان الصوت أيام ما كان موجود كان بيظهر وقت الصباح, أو بعد الخوض في المياه, أو عند ركوب حد جنبك وانت سايق ... الأمر اللي بيعني انه بيكون محتاج تنظيف للتيل لأن عيوب النظافة بتظهر وقت تحميل العربية وزيادة وزنها


بعد صنفرة التيل كنت فاكر انه حاجة مؤقتة ويرجع تاني , آدي بقالي 2000 كيلو ومارجعش , مرة واحدة بس سمعت صوت خافت جداً وكنت قبلها معدي في مية, انما بعد كام كيلو الصوت راح تماماً وماظهرش تاني.... الحكاية جديرة بالبحث , والحل موجود : صنفر الطنابير ونظف التيل بالهواء



7-الاتزان:


العربية سيدان عائلية ... بتجري؟ آه ! لكن تعدي الـ 140 الاتزان مش هايفضل ممتاز,, هايفضل ممتاز في حالة لو انت كنت لوحدك على الطريق (جربت 180 و 200 لما كنت لوحدي) .... انما هاتكون تحت رحمة أي جسم يعدي من جنبك يعمل خلخلة في الهواء, لأن التفريغ اللي هايحصل هايحسسك باهتزاز العربية وعدم ثباتها نظراً لأن أساس اتزانها إيرودايناميكي ... وبالتالي هاتكون تحت رحمة الهواء واتجاهاته على السرعات العالية



8- الرؤية:


الزجاج دكتور جريش .... كويس وكل حاجة...لكن حد جرب النظر فيه على زاوية منفرجة؟ بمعني: انك تروح لأقصي يسار مقعد السائق, وتبص على أقصى يمين الزجاج ناحية القايم اليمين الأمامي, وتشوف الرؤية هاتكون مستوية ولا لأ؟؟ عن نفسي ماكانتش الرؤية مستوية, ماعرفش هل ده يعتبر عيب ولا ممكن الخبراء يفيدونا, مثلاً يكون معمول لكسر الآشعة الجانبية ولا حاجة؟؟!


9- الراديو والـ سي دي:


طبعاً السكة الطويلة محتاجة رفيق للكفاح, ومشغل السي دي هو رفيق كفاحي مع العزيزة نيسان صني, الحمدلله رب العالمين ماواجهتنيش مشاكل فيه, إنما ليا ملاحظة أو نقطة بسيطة أود لفت النظر إليها:


حاول دايماً وانت بتعمل سي دي تخلي سرعة الـ Burn تساوي 8 إكس ....وبكدة تضمن عدم وجود مشاكل في الصوت أو تكتكة أو تقطيع


الصوت ينفع يطلع نقي جداً وممتاز: لما تخلي الـ Balance = صفر ... وتخلي Triple = 4 ... وتخلي Bass = 3 ... والأخير ده هايديك الزنة المفضلة في بعض الألحان على درجة صوت 15 .... هاتحس انك مركب سماعات كويسة ساعتها .... النظام الصوتي عموماً جيد بما فيه الكفاية مش هاتحتاج حاجة خارجية أو أعلى إلا لو كنت من النوع المفتري قوي أغاني وسمعيات


10 - الأنوار:


الكشاف اليمين مصمم ليكون أقوى من الكشاف اليسار ... علشان مراعاة الناس اللي ماشيين في الشارع وغالباً بيكونوا على يمينك وانت سايق


النور العادي بيتحس في بعض الأوقات انه عالي, خصوصاً ان عربيتك عالية وبيكون قدامك عربيات منخفضة قرب الأرض, وبالتالي بيحس ان نورك ضارب في مراياته وبيؤذيه ...خد بالك من الناحية دي وراعي حق الناس في الطريق


كشافات الضباب تعتبر أفضل حل لكشف عيوب الطريق...وتلافي المطبات الطارئة , أو علشان تقي الراجل الغلبان اللي قدامك شر نورك العالي, وكمان لو انت واقف على كوبري أكتوبر مثلاً في الزحمة ومش مطلوب تفتح نورك العادي ... كشاف الضباب هاينور الطريق قدام وتحت العربية ويخليك تعرف تقدر المسافة بينك وبين اللي قدامك صح في أوقات التوقف والظلام الدامس اللي بقى سمة شوارع المحروسة


11- سخان الزجاج الخلفي: ممتاز في وقت الفجر والشروق علشان تقدر تكشف الزجاج الخلفي وتشيل الندى من عليه , هو بيفصل أوتوماتيك خلال 15 دقيقة, خلال 10 دقايق بإذن الله هاتكون الرؤية واضحة جداً


ليه باقول كدة وجبت سيرة الجزء البسيط ده؟ علشان بانزل الفجر والاقي ناس كتير سايقين والندى كاسي الزجاج الخلفي وده ممكن يسبب مشكلة كبيرة في الرؤية أو لا قدر الله حادث من الخلف .... وأدركت ساعتها ان الناس مش فاهمين إيه ده أساساً وموجود ليه في العربية !!!




في المجمل وباقول خلاصة تجربة السيارة: العربية الحمدلله رب العالمين ممتازة وفوق الوصف وتستاهل تمنها وأكتر ... ربنا يباركلي فيها ويبارك للجميع فيما رزقهم ... وكمان تتحمل الظروف الصعبة والطرق المصرية, كما انها مناسبة للطرق الطوالي بدون مشاكل بإذن الله.... العربية آمنة للركاب, لكن لو بنتكلم على حتة المتانة والصاج الخارجي : لأ ده مصمم علشان يتفرتك وقت الحادث وياخد الصدمة بدل الركاب اللي جوة, وبالتالي بتكون الخسائر كبيرة لو حصل حادث على سرعة عالية لا قدر الله وربنا يحفظنا جميعاً ويسلم طرقنا....ماتستهونش بالحاجات البسيطة اللي ممكن تصدمها وانت ماشي, وخد بالك كويس من الكائنات اللي بتعبر الشوارع قدامك ...





نيجي لحتة الموزع والوكيل:


أول حاجة انا ريحت دماغي وجبتها من السبع, تعامل محترم ومنظم ومحاولات مستميتة انهم يجيبولي عربية وقت ماكان الحجز صعب والتسليم أصعب...رغم التأخير لكن أرفع لهم القبعة وأشكر لهم حسن معاملتهم وأمانتهم في تسليمهم للعربية , الحمدلله رب العالمين استلمتها لا ناقصها حاجة ولا فيها خدش ولا فيها حاجة منتهية الصلاحية



تاني حاجة: الصيانة ومركز الخدمة


تعاملي مع مركز السبع في زهراء المعادي.


نتكلم بصراحة وموضوعية عن سلبيات وإيجابيات للمركز:



نتكلم عن الإيجابيات: 1- حسن المعاملة والاستقبال

2- الاستماع باهتمام للمشاكل ومحاولة حلها من غير ماحد يفتي (دي تجربتي الشخصية)

3- مقدرتك على الحجز والذهاب في فترة قصيرة وتلاقي مكانك في الموعد المحدد موجود (خد بالك ان يوم السبت بيكون محتاج حجز من بدري,تحجز قبلها بأربع أيام... اليوم ده بالذات)

4- غالباً بتستلم العربية نضيفة ومغسولة ...غالباً



السلبيات:

1- عدم توافر قطع غيار كتيرة

2- بعض العمال معدومي الضمير بقوا يعلموا على العربية انها اتعملت وخصلت وييجي العميل يستلمها يلاقيها زي ماكانت .... أعتقد دي نقطة خطيرة محتاجة عناية لأنها تطعن في مصداقية المركز رغم الجهود الكبيرة اللي تمت لتوصيله للمكانة اللي فيها حالياً ... ماتسيبش صنايعي معدوم الضمير يبوظ تعبك


3- أحياناً يوجد عدم اهتمام بنظافة السيارة, مرة يقولوا المية قاطعة ومرة الاقي شحم عالسقف ومافيش أكياس حماية للكراسي والدركسيون واقعد انضف فيهم والفرش بيج !!


4- نقص عدد مهندسي الاستقبال, وده بيخلي المهندس أو المهندسة رغم محاولتهم إرضاء الجميع يسقطوا ناس من حساباتهم وينسوهم رغماً عنهم , فعلاً محتاجين زيادة عدد المهندسين علشان ضمان توفير الخدمة للجميع, لأن الكل من حقه انه يتخدم بنفس المستوى دون نسيان أو هرجلة, لأن ده بيضايق ناس كتير والناس من حقها تتضايق بالحكاية دي



أرجو إني أكون أفدتكم بكل مالدي من خبرة من ساعة ماشتريت العربية لحد اللحظة الحالية , وأرجو من الله انه يبارك فيما رزق للجميع , وييسر إجراءات الحجز والاستلام لكل من هو حاجز وبيشتري


كما أرجو من الجميع انه يتكلم عن خبرة وبشكل موضوعي .... ومش هاننسحب من هنا ولو كان المانع إيه



سلام عليكم

المشاركة الأصلية كتبت بواسطة youssef_u

تقرير رائع و عقبال ال111الف
كان عندي سؤال بس هو عشان تشغل كشافات الضباب لازم تبقى مشغل الواطي ولا لا ؟؟

لأ انت ممكن تشغله لوحده بس تكون فاتح أنوار العداد