الموضوع: 8 جنيهات لأسطوانة البوتاجاز المنزلية.. و30 جنيهاً خارج البطاقة

مكتوب على المحترمين فقط من شعب مصر
كل ما نطلع من نقرة نقع فى دحديره
نطلع من الدحديرة نقع فى مستنقع
نطلع من المستنقع نقع فى بلاعة مجارى

المشاركة الأصلية كتبت بواسطة ehab

كنت باتكلم مع واحد صاحبي و بقوله عن اداء الحكومة و كدا بيقولي ما احنا عايزين نعمل انتخابات المجلس
عشان يكون في مجلس شعب يحاسب الحكومة
تفتكروا مجلس شعب هيوقف ضدد الحكومة الي هوا منها

هههههههههههههه
ده احنا ماشين فى دائرة مفرغة
ايام مبارك لما كان الحزب الوطنى الفاسد الحرامى المجرم بينجح فى مجلس الشعب بالتزوير الفج
وفى بعض اللجان نجح امامهم الإخوان وكانوا قوة معارضة كبيرة فى مجلس الشعب
وانتظرنا منهم الكثير فوجئنا ان النتيجة صفر والسبب ان الحزب الواطنى كان الأغلبية وكان بيحاربهم فى مجلس الشعب وبصراحة كان الرد مقنع

لما الحزب الوطنى الفاشل الفاسد انتهى من الحياة السياسة بعد الثورة
وانتخبنا الأخوان فى مجلس الشعب وبقوا هم الأغلبية المطلقة
وانتظرنا منهم الكثير فوجئنا ان النتيجة تقريبا صفر والشماعة ان مفيش معاهم سلطة تنفيذية
وهم مجرد سلطة تشريعية فقط والمجلس العسكرى بيفشلهم وبيحبطهم وبيكرهم فى الإسلاميين
وإنها مؤامرة على الإسلام والمسلمين وتواطؤ مع العلمانيين
وبعدين اتحل مجلس الشعب واتعملت انتخابات الرئاسة وكلنا آمال عريضة فى حياة أفضل ومستقبل أفضل ووصلوا الاخوان الى رأس السلطة التنفيذية وبقى السيد الرئيس محمد مرسى أول رئيس مدنى منتخب بنزاهة فى مصر ومشى طنطاوى وعنان والرئيس اخد كل صلاحياته وانتظرنا كلنا التغيير الإيجابى فى حياتنا السياسية والإجتماعية والأهم الإقتصادية وانتظرنا ان حياتنا تبقى افضل أو على الأقل نرجع بأوضاعنا الإقتصادية والامنية ليوم 25 يناير 2011 وفوجئنا ايضا ان النتيجة بقت بالسالب ياعنى تحت الصفر كل شيئ من سيئ إلى اسوأ .. نقص فى الوقود وطوابير بشعه على محطات البنزين ..والسبب استمرار السرقة والنهب لمقدرات هذا الشعب ده غير البلطجة والتثبيت فى الشوارع وعلى الطرق لازال مستمر.. غلاء الأسعار والإستغلال بقى زى الغول اللى بيجرى ورا الواحد علشان يقضى عليه تماماً.. والشماعة ان البلد مدمرة ونظام مبارك لسه قائم وبيلعب بذيلة !!!!
وبعد كل ده الحكومة جاية تكمل علينا وترفع اسعار الكهرباء ورفعت وقود 95 (طيب زى بعضه) وتهددنا برفع بنزين 90 و 92 وإلغاء 80 ورفع البوتاجاز وبكره رفع اسعار المياه وبعده ياعالم يمكن يحاسبونا على أهم مورد فى الدولة وهوه الأكسجين
رغم انهم اكدوا مرارا وتكراراً انهم لن يضيروا المواطن ولن يمسوه فى شيئ
وهنشوف أداء اقتصادى مبهر
فين الفلوس يا أخونا اللى كانت بتتسرق من مبارك وزبانيته
ولا كله ضحك على الدقون لتحقيق اهداف ما

ودلوقتى هنرجع نلف تانى ونقول الأمل فى مجلس الشعب !!!
هوه اللى هيراقب الحكومة
هههههههههه
على فكرة انا اخترت الاخوان فى مجلس الشعب وكنت شايف فيهم الأمل
واخترت السيد الرئيس محمد مرسى فى جولة الإعادة أمام شفيق زكنت شايف فيه الأمل فى التغيير الإيجابى
وله منى كل الإحترام
وأنا ضد دعوات الخروج عليه والتظاهرات

مش عارف العيب فى مين
فى اللى بيحكومنا ولا فى الشعب
ربنا يرحمنا برحمته
يارب اصلح الأحوال وارفع مقتك وغضبك عنا
لك الله ياشعب مصر