جوله في سيارات الطبقه الكادحه - جميع السيارات اقل من 80 الف - الجزء الاول

**A_Mando** · 22-09-2008 12:34 AM

المشاركة الأصلية كتبت بواسطة Amrrr

انا مع البونتو بس لحاجة واحدة بس انها وانت على سرعات عالية ممكن تدخل بيها مواقف صعبة زي غرزة مع مطب هوا مع اكتشاف حفرة مفاجأة مثلا ( لأ مش مثلا دا حصل فعلا بس مش انا اللي كنت سايق ) بتلاقي العربية تحت ايدك ولسة مسيطر كويس ومش بتتنطط من ورا زي العربيات الكوري الهاتشباك لكن الفيات عيوبة معروفة ومش عارف العربية دي هتبقى أحسن من البونتو القديم اللي بعد أربع خمس سنين بتبقى 128 في شكل بونتو

معلش يا ريت بس توضيح يعنى اية بتبقى 128 فى شكل بونتو؟!

**Amrrr** · 22-09-2008 11:41 AM

مقصدشي غير انها بتبقى ناشفة وساعات كتير بتسخن وتحس انك راكب عربية فيات قديمة مش ناعمة زي أول ماجبتها وانا كنت بحب العربية دي ودورت على واحدة مستعملة بفتحة سقف وملقيتشي ولا واحدة حالتها نظيفة وولا واحدة كان تكييفها شغال دا السنة اللي فاتت وكنت بحس لما باركب واحدة عشان اجربها يعني ايه كلمة فيات وغيرت رأيي تماما في اني اجيب بونتو
موديل 2008 جامد اوي وعربية فعلا تحس فيها بالأوروبية وانا ركبتها كتير وهي حلوة فعلا

**hossam_chixo** · 22-09-2008 12:06 PM

انا رايى فى كل السيارات دى الاول فيات بونتو ثم الثانى رينو لوجان فقط...
و شكرا

**foxking_369** · 22-09-2008 12:47 PM

مجهود رائع يا شباب و يا رب دايما مواضيع جامده كده
ممكن كمان تقيموا العربيه Geely MK, CK2

**mshanafi** · 22-09-2008 04:26 PM

مجهود قيم لا شك . ولكن النتيجة تكاد تكون ابعد ما يكون عن الواقع .... فيات بونتو لم و لن تكون سيارة الطبقة الكادحة .. وهذا رأي للاسباب الاتية :

-استند التقييم في الاساس علي الاداء بالنسبة للسيارات في حالة الزيرو او حديثة الصنع.
-لم يعطي المساحة الكافية من البحث والمقارنة لتقييم العمر الافتراضي , الاعتمادية, سهولة الصيانة , توافر قطع الغيار واسعارها , السعر عن اعادة البيع و سرعة البيع.
-السيارة بالنسبة للطبقة الكادحة هي ثاني اهم استثمار في حياته بعد السكن فلا مجال للمخاطرة براس المال ولا التطلع لرفاهية .
-التقييم اغفل اولويات و احتياجات الطبقة الكادحة في سيارة بمنتهى البساطة" ثمنها يفضل فيها".
-برغم احترامي للشديد للموضوع اري انه اقرب لتجربة قيادة منه الى تقييم لشراء سيارة لشريحة معينة.

mohamed hanafi

**Ahmad Allawy** · 22-09-2008 06:02 PM

بس هو ابعد ما يكون عن تجربة قيادة حتي..
هو ممكن تقول انه تقرير مصور في العربيات اللي في الفئة السعرية دي..
مواصفات و امكانيات و انطباعات.. و جودة تقفيل و كفاءة عربيات..

**Ahmad Allawy** · 22-09-2008 06:16 PM

المشاركة الأصلية كتبت بواسطة mshanafi

مجهود قيم لا شك . ولكن النتيجة تكاد تكون ابعد ما يكون عن الواقع .... فيات بونتو لم و لن تكون سيارة الطبقة الكادحة .. وهذا رأي للاسباب الاتية :

-استند التقييم في الاساس علي الاداء بالنسبة للسيارات في حالة الزيرو او حديثة الصنع.
-لم يعطي المساحة الكافية من البحث والمقارنة لتقييم العمر الافتراضي , الاعتمادية, سهولة الصيانة , توافر قطع الغيار واسعارها , السعر عن اعادة البيع و سرعة البيع.
-السيارة بالنسبة للطبقة الكادحة هي ثاني اهم استثمار في حياته بعد السكن فلا مجال للمخاطرة براس المال ولا التطلع لرفاهية .
-التقييم اغفل اولويات و احتياجات الطبقة الكادحة في سيارة بمنتهى البساطة" ثمنها يفضل فيها".
-برغم احترامي للشديد للموضوع اري انه اقرب لتجربة قيادة منه الى تقييم لشراء سيارة لشريحة معينة.

mohamed hanafi

انا ممكن اختلف مع سعاتك في نقاط بسيطة..
- التقييم اللي اتعمل لم يستند علي اداء.... يعني الموضوع لم يخرج عن مواصفات و اراء مالكي العربية.. و انطباعات زي ما قولت لسعاتك..
- موضوع العمر الافتراضي ده انا شايف انه احنا مستحيل نعرف نقيمه.. عشان العربيات اللي موجوده ف السوق المفروض انها كلها جديدة.. مش موجوده ف الشوارع من زمان يعني.. و فترة سنتين ولا تلاتة.. مش كافية نهائي اننا نتكلم في عمر افتراضي.. ولو حبينا نتكلم عن النقطة دي هتبقي توقعات..
بالنسبة لسهولة الصيانة.. المفروض اللي هيشتري عربية زيرو و يدفع فيها زي ما سعاتك قولت رأس مال كبير.. المفروض انه ميغامرش و يعمل صيانات برة التوكيل.. كده يبقي بيرمي فلوسه ف الارض.. انه يصلح برة و حتي لو هيصلح بعد الصيانات ف التوكيل .. مش هيدفع كتير لسبب..ان اللي هيفضل متابع مع التوكيل بعد الضمان ما يخلص.. هيفضل محافظ علي عربيته.. و مش هتكلفه..زي ما يصلحها برة ف اي حته..
- موضوع سيارة طبقة كادحة.. مينفعش نتكلم فيها عن سعر اعادة بيع بقي.. و سعر بيع. عشان المفروض اللي هيشتري عربية من الطبقة الكادحة.. المفروض انه يكون باصص علي انه ميغيرهاش لفترة .. مش هيجيب و يبيع.. و في الحالة دي.. هلاص.. اللي يشتري و يبيع كتير.. هيبقي عارف هو بيعمل ايه.. و هيبقي عارف بيشتري ايه و ليهز
اما لو نقطة ان الواحد ممكن يبيبع في اي وقت لو احتاج فلوس..فدي انت عندك حق فيها طبعا.. و مخطرش في بالنا اما عملنا الموضوع اننا نتكلم فيها.. دي انت عندك جق طبعا..
- انا مش فاهم وجهة نظرك في انه اغفل اولويات و احتياجات الطبقة دي ف ان العربية تمنها يفضل فيها..؟؟
هل كان المفروض اننا او ان اللي عملوا الموضوع يمدحوا في العربيات اللادا مثلا.. و الشاهين.. علي اساس ان تمنهم بيفضل فيهم.. و يكرهوا الناس في الرينو مثلا.. ولا السيتروين.. علي اساس انها قيمتها بتقل عند اعادة البيع..؟؟
- و موضوع انه لا مجال للمخاطرة و التطلع للرفاهية.. ازاي بقي..؟؟ يعني لما يكون في عربية فيها رفاهية اكتر من واحدة تانية و بنفس السعر.. يبقي من حق اي حد انه يتطلع ليها.. طالما يقدر عليها..

الحلاصة.. برغم الاختلاف بيننا ف النقاط دي..
ده لا يمنع انه مفيش حد معصوم من الخطأ..و مفيش حاجة بتطلع كاملة طبعا.. لان الكمال لله وحده..
و ان شاء الله الاخوة اللي بيعملوا الجزء التاني للموضوع و الطبقة الجديدة يحطوا النقاط اللي سعاتك قولتها في بالهم و هما بيعملوا الموضوع..

**Dr_lanos** · 24-09-2008 05:13 AM

بدون زعل هذا ليس تقرير محترفين او ناس عندهم خبرة كافية فى السيارات لانه ملىء بالاخطاء و سأتكلم عن اللانوس بالذات لانها تخصصى و لن اتكلم عن الباقى لاننا مش هنخلص من كم الاخطاء و المغالطات فى التقيم الغير موضوعى لكل السيارات المعروضة من عربيات 8 صباب قالوا انها 12 صباب الى كاوتش هنكوك قالوا انه صينى و هو اصلا كورى و كنت اتمنى من الموقع ان يراجع جيدا هذا التقرير قبل تثبيته فلا يوجد تقيم فى الدنيا لسيارة من انجح السيارات المعروفة فى مصر و هى اللانوس يقولوا فيه انها اسوأ سيارة سيدان و يقولوا خلاص زهقنا على سيارة افضل من الفيرنا مثلا فى الشكل و التحمل و بعد كدة قلتم ان السيارة وحشة علشان باب الشنطة بعيد عن الفانوس و اصل البلاستيك مش عارف اية و توقعوا ان الشمس هتاكل الفرش رغم ان السيارة عندى بفرشها الاصلى لم اضع عليه شىء من سنة 2000 و انتقدوا حوض الموتور الواسع اللى يعتبر ميزة اساسا بها فى حين انهم انتقدوا قبلها سيارات حوض موتورها ضيق و الاغرب من كدة انهم وصفوا موتورها بأنه متجمع تحت بير السلم
تقييم عجيب و غريب
دة كلام يا جماعة حرام عليكم اللى بيحصل دة انتم موتوا عربية من احسن العربيات اللى نزلت السوق المصرى بسبب اراء سطحية جدا و غير فنية و غير دقيقة
هل دة اسلوب تقيم سليم لأ ى عربية ؟ فى حد فى الدنيا ينتقد المكان الواسع حولين الموتور اعتقد دى ميزة يتمناها اى حد التقرير ملىء بالاخطاء البشعة و كان عايز يتراجع صح من ناس فاهمة كويس و يعتمد على تقيم موضوعى سليم مش هذا الكلام السطحى و عيب منتدى محترم زى دة فيه خبراء سيارات يثبت تقرير كله اخطاء بهذا الشكل فى اللانوس وحدها فقط فما بالكم بالباقى تقبلوا نقدى بدون زعل لمصلحتكم و لمصلحة الناس اللى معندهاش فكرة عن العربيات و اللى ممكن يصدقوا هذه التقارير المليئة بالاخطاء و تتسبب فى بلبلتهم اذا قرورا شراء سيارة من اللى اتعرضوا .

**Ahmad Allawy** · 24-09-2008 05:33 AM

طيب يافندم قبل ما توزعل قوي كده و تنتقد الكلام..
ممن سعاتك تنزل تشوفها بنفسك في اقرب مكان..
وشوف الفرق الشاسع بين عربيتك اللي هي موديل سنة 2000.. و العربية اللي موجوده دلوقتي..
و انت هتحكم بنفسك..
انا كنت من الناس اللي نزلت اتفرجت معاهم.. و شوفت بعيني محدش قاللي..
علي فكرة انا كنت هاشتري واحدة موديل 2001 السنة اللي فاتت.. و شوفتها و اتفرجت عليها كويس جدا..
لكن للأسف اللي موجودة زيرو دلوقتي زي الزفت بمعني الكلمة.. تقفيل اقل ما يقال عليه انه زباله..
فرش زي الزفت.. خامات زبالة.. تقفيل كل حاجة سيء للغاية..
(معلش محدش يزعل مني ف الكلام ده بس اللي شاف التقفيل النضيف المصري حتي مش الكوري و شاف ده هيقول اكتر من كد.. الكلام نسبي و مقارنة بين التقفيل الكويس بتاع زمان و التقفيل السيء جدا بتاع دلوقتي..)
وبعين سعاتك زعلت قوي كده ليه..؟؟
الموضوع عبارة عن جولة.. و اراء و انطباعات..
يعني بساطة كانت دي اراء الناس اللي نزلت و اتفرجت.. و وارد جدا اختلاف في وجهات النظر..
لكن لوا اللانوس وحدها اللي سعاتك زعلان عليها يجتمع فيها اراء كل الناس اللي نزلت اللي عددهم كان قارب علي 10 افراد..انها بالسوء ده.. يبقي اكيد مش كلنا تقييمنا وحش و متحاملين عليها
انا عن نفسي كنت بارشح اللانوس لحد فترة قريبة جدا ف الفئة السعرية دي.. لكن لما شوفت بعيني و الفرق الرهيب اللي بقي بينها و بين الفيرنا.. لأ بصراحة الفيرنا دلوقتي انضف بمراحل.. و تقفيلها زغم العيوب الكتيرة.. افضل بكتير من تقفيل اللانوس..

متاخدش الموضوع بصفة شخصية عشان انت معاك العربية.. لكن ممكن تبصلها بوجهة نر اختلاف مدي الجودة اللي بينحدر من سنة للتانية..
يعني اللي معاك دي يمكن كانت من انضف العربيات اللانوس ف التقفيل.. وبعد ككده المستوي بينزل..

**mohamed ibiza** · 24-09-2008 06:52 AM

المشاركة الأصلية كتبت بواسطة Dr_lanos

بدون زعل هذا ليس تقرير محترفين او ناس عندهم خبرة كافية فى السيارات لانه ملىء بالاخطاء و سأتكلم عن اللانوس بالذات لانها تخصصى و لن اتكلم عن الباقى لاننا مش هنخلص من كم الاخطاء و المغالطات فى التقيم الغير موضوعى لكل السيارات المعروضة من عربيات 8 صباب قالوا انها 12 صباب الى كاوتش هنكوك قالوا انه صينى و هو اصلا كورى و كنت اتمنى من الموقع ان يراجع جيدا هذا التقرير قبل تثبيته فلا يوجد تقيم فى الدنيا لسيارة من انجح السيارات المعروفة فى مصر و هى اللانوس يقولوا فيه انها اسوأ سيارة سيدان و يقولوا خلاص زهقنا على سيارة افضل من الفيرنا مثلا فى الشكل و التحمل و بعد كدة قلتم ان السيارة وحشة علشان باب الشنطة بعيد عن الفانوس و اصل البلاستيك مش عارف اية و توقعوا ان الشمس هتاكل الفرش رغم ان السيارة عندى بفرشها الاصلى لم اضع عليه شىء من سنة 2000 و انتقدوا حوض الموتور الواسع اللى يعتبر ميزة اساسا بها فى حين انهم انتقدوا قبلها سيارات حوض موتورها ضيق و الاغرب من كدة انهم وصفوا موتورها بأنه متجمع تحت بير السلم
تقييم عجيب و غريب
دة كلام يا جماعة حرام عليكم اللى بيحصل دة انتم موتوا عربية من احسن العربيات اللى نزلت السوق المصرى بسبب اراء سطحية جدا و غير فنية و غير دقيقة
هل دة اسلوب تقيم سليم لأ ى عربية ؟ فى حد فى الدنيا ينتقد المكان الواسع حولين الموتور اعتقد دى ميزة يتمناها اى حد التقرير ملىء بالاخطاء البشعة و كان عايز يتراجع صح من ناس فاهمة كويس و يعتمد على تقيم موضوعى سليم مش هذا الكلام السطحى و عيب منتدى محترم زى دة فيه خبراء سيارات يثبت تقرير كله اخطاء بهذا الشكل فى اللانوس وحدها فقط فما بالكم بالباقى تقبلوا نقدى بدون زعل لمصلحتكم و لمصلحة الناس اللى معندهاش فكرة عن العربيات و اللى ممكن يصدقوا هذه التقارير المليئة بالاخطاء و تتسبب فى بلبلتهم اذا قرورا شراء سيارة من اللى اتعرضوا .

لما تحب تنتقد حد تنتقده بدون تجريح و بدون ما تتهمه بأنه معندوش خبرة انت اعدت معانا ولا اكلمت معانا عشان تشوف عندنا خبرة ولا لا !! عايز تختلف في الرأي اختلف بدون تخبيط يا دكتور لانوس

اولا المعلومات كلها موجودة علي النت يا ريت تقولنا ايه اللي قلنا عليه ان انه 8 صباب و هي 12 صباب حدد انتقادك لو سمحت و لو طلع فيه خطأ فعلا هنطلب من الادارة التعديل و يبقي حقك

الكاوتش اظن دي حاجة بالنظر كده يا ريت انت بس تنزل علي المصرية فرع مصر الجديدة و تشوف العربيات هناك و تشوف صناعة الكاوتش عشان دي لا محتاجة تفكير ولا تدبير ده مكتوب علي الفرده ابقي روح بص انت و بعدين نتكلم

واضح جدااااااااااااااااا ان حضرتك مش متحيز نهائيا للانوس اولا انت عربيتك لانوس 2000 احنا قيمنا لانوس 2008 و طلع فيها اخطاء كتير جدااااااااااا و موضوع حوض الموتور محدش قالك انه عيب لكن في نفس الوقت مش ميزة ضخمة يعني بس شغاله

انت شفت لانوس 2008 ولا لا؟؟؟؟؟؟ولا انت بتقول كده من منطلق انك راكب لانس و خلاص ما mmamouh معاه لانوس و ناس كتير معاها لانوس ليه يعني معترضوش !!!!!!
الفرش و الخامات دي بتبقي باينه لو واحد اعمي شافها هيقولك دي الشمس هتاكلها كمان معلش يعني احنا تقييماتنا كلها بالصور و واصح اوي ان تقفيل العربية سيء ولا هو تحيز و خلاص ده كفاية تقفيل زور الدركسيون!!باب الشنطة المفارق ده مش عيب تقفيل في رأيك!!!!!!!!!!

مش هنتقبل نقدك عشان نقد تحيز غير موضوعي و فيه اهانة لو شايف في نفسك القدرة علي التقييم المحترف انزل قيملنا لانوس 2008 بالصور و احص التقفيل كويس و بعدين نكلم و الادارة لو شايفه ان الموضوع تعبان و ميستحقش التثبيت مكانتش ثبتته و اعتراضك علي التثبيت يعتبر اعتراض علي قرارات الادارة و ده ممنوع طبقا لقواعد المنتدي زي برضه ما الاهانة و توجيه الاتهامات ممنوعة طبقا لقوانين المنتدي

الموضوع: جوله في سيارات الطبقه الكادحه - جميع السيارات اقل من 80 الف - الجزء الاول

LinkBack

أدوات الموضوع

عرض

-

-

-

-

المواضيع المتشابهه

سيارات مشاهير الكرة فى العالم. الجزء الاول

بروشور جميع موديلات كيا الحالية في السوق المصري (الجزء الاول )

أسعار جميع السيارات في مصر هدية بمناسبة رمضان ( الجزء الثاني)

اسعار جمبع السيارات في مصر هدية بمناسبة رمضان (الجزء الاول )

جوله فى سوق سيارات مدينة نصر

الكلمات الدلالية لهذا الموضوع

المفضلات

المفضلات

ضوابط المشاركة