رجالة الاوبل : مساعدتكم و المشورة .. ناوي علي تيجرا

**NourElmansy** · 11-12-2012 01:39 AM

السلام عليكم يا رجالة قسم الاوبل ..

من فترة طويلة جدا .. كان حلم عندي العربية دي من حوالي 12 .. 13 سنة كده

اللي قدامي اوبل تيجرا 97 اوتوماتيك 1.4

الغريب اني لقيت في المكنة جزء علي اليمين و صاحبها قاللي ده سوبرتشارجر بس مفصول .. و قاللي ان المكنة دي ماكنتها الاصلية .. و ماشية 192 ألف ..

العربية فابريكة داخل .. رشة برة حزام ماعدا السقف

محتاجة شوية شغل .. زي مثلا مفتاح مرايات و جوان تاكيهات ( وش المكنة مسرب زيت )

و فرش السقف عايز يتشد .. فتحة السقف فيها فرق خفيف عاوز يتظبط .. الكلاكس مش شغال عاوز يتظبط

عاوزة كاوتش جديد و غالبا طقم جنوط .. و المكيف عاوز فريون و فيه بارومة خفيفة في باب السواق تحت حتة صغيرة كدة و النور العالي قدام مش شغال عاوزة لمض و الافضل تغيير الفوانيس خالص

حالة الصالون جيدة .. الكراسي ممتازة .. فتحة السقف شغالة تمام .. جربت العربية سريعاً كده و لقيت الموتور كويس .. دوارة سريعة مع انها كانت بايته يومين ع الاقل ( منظر التراب باين ) ..

تقييمكم لسعرها يكون كام وميكونش اتضحك عليا ؟ و مين عنده حاجتها في اسكندرية و اسعارها ايه ؟

و هل فعلا حاجتها هيا حاجة الكورسا ؟ و هل موجودة في السوق ولا هتعذب عليها ؟

و لو فكرت مرة ادخلها التوكيل مثلا عشان ترجع زيرو .. ابقي بحلم ولا الاسعار قريبة ؟

و الشغل اللي فيها تقريبا يتكلف كام ؟

مع العلم ان دي حاتبقي عربية اضافية مش اساسية لأني محتاج واحدة اوتوماتيك و ماتكونش غالية و البدائل الاوتوماتيك في الشريحة دي ( سويفت تسعينات - شاريد تسعينات - كيابرايد ) و التيجرا بالنسبالي احلاهم شكلاً ....

و استهلاك البنزين فيها ايه بالمناسبة ؟ و ثباتها و كل حاجة لو حد يعرف يعني :)

منتظر ردودكم يا رجالة

تحياتي :))

**NourElmansy** · 11-12-2012 06:37 PM

يا صلاة الزين يا صلاة الزين

54 مشاهدة ولا رد واحد :(

ايه يا جدعان انا دخلت قسم غلط ولا ايه

**ashourashour** · 11-12-2012 07:19 PM

بلاش

**NourElmansy** · 11-12-2012 08:38 PM

المشاركة الأصلية كتبت بواسطة ashourashour

بلاش

فهمت ايه انا كدة :) ؟

ده حتي بيقولو الكلام اخد و عطي و بعدين ده السلام لله

**Mamoud salah H** · 11-12-2012 11:23 PM

هي مطلوب فيها كام لان فيها حجات مش بسيطة وممكن تفتح بالذات تسريب الزيت ممكن ميكونش غطا تاكيهات بس انت مبدئيا هتصرف 6000 عشان تجيب بس كاووتش وجنوط وحاجة الماتور موجودة عادي في الحرفيين وعند بتوع قطع الغيار واظن كمان 2000 جنيه عشان الفوانيس وموضوع الكلاكس دة ممكن يدخل في قطة وزر او طارة كاملة يعني بتاع 300 جنيه والتكيف دة بقي مشكلة لوحده ياما تخليه يشحنهولك هو علي حسابة وتكون معاه عشان تتاكد لو في تسريب ولو مرضيش يبقي اخصم 2000 علي طول وش كدة عشان تصليحه مكلف بغباء ومش بيرجع تمام فالاحسن تغيره بواحد جديد في حدود 2000جنيه ممكن يزيدوا حاجة بسيطة يعني من الاخر العربية عايزة مصروف كتير شوية بتاع 10000الاف جنيه تقريباوماخفي كان اعظم ولازم تكشف كويس جدا

**haitham2011** · 11-12-2012 11:24 PM

العربيه موتور و عفشه هي هي الكورسا ال 1.4 الكامتين
الصاج و الفوانيس و اللاذي منه هتلف شويه بحكم انها قليله بس موجوده عند بعض الناس
لو عيله او شباب اعتبر ان مفيش كنبه ورا لان سحبه البرابريز الخلفي كابس علي دماغ اللي قاعد - عن تجربه -
الجري حدث و لا حرج
الموتور عايز اهتمام لانه تكنولوجيا اعلي من الكامه الواحده و لو اهملته هيقرفك

**NourElmansy** · 12-12-2012 07:56 AM

المشاركة الأصلية كتبت بواسطة mamoud salah h

هي مطلوب فيها كام لان فيها حجات مش بسيطة وممكن تفتح بالذات تسريب الزيت ممكن ميكونش غطا تاكيهات بس انت مبدئيا هتصرف 6000 عشان تجيب بس كاووتش وجنوط وحاجة الماتور موجودة عادي في الحرفيين وعند بتوع قطع الغيار واظن كمان 2000 جنيه عشان الفوانيس وموضوع الكلاكس دة ممكن يدخل في قطة وزر او طارة كاملة يعني بتاع 300 جنيه والتكيف دة بقي مشكلة لوحده ياما تخليه يشحنهولك هو علي حسابة وتكون معاه عشان تتاكد لو في تسريب ولو مرضيش يبقي اخصم 2000 علي طول وش كدة عشان تصليحه مكلف بغباء ومش بيرجع تمام فالاحسن تغيره بواحد جديد في حدود 2000جنيه ممكن يزيدوا حاجة بسيطة يعني من الاخر العربية عايزة مصروف كتير شوية بتاع 10000الاف جنيه تقريباوماخفي كان اعظم ولازم تكشف كويس جدا

هوا بيتكلم في 34 ..

**NourElmansy** · 12-12-2012 07:56 AM

المشاركة الأصلية كتبت بواسطة haitham2011

العربيه موتور و عفشه هي هي الكورسا ال 1.4 الكامتين
الصاج و الفوانيس و اللاذي منه هتلف شويه بحكم انها قليله بس موجوده عند بعض الناس
لو عيله او شباب اعتبر ان مفيش كنبه ورا لان سحبه البرابريز الخلفي كابس علي دماغ اللي قاعد - عن تجربه -
الجري حدث و لا حرج
الموتور عايز اهتمام لانه تكنولوجيا اعلي من الكامه الواحده و لو اهملته هيقرفك

الجري حدث ولا حرج .. مش فاهم يعني كويسة في الجري ولا اي كلام ؟

انا من النوع اللي باهتم .. بس مش عايز اجيب عربية مهما عملت فيها ماتظبطش .. هل لو اتظبطت هاتظبط ولا فاكس ؟

**Mamoud salah H** · 13-12-2012 02:37 AM

هو بصراحة انا معرفش رنجها كام بس العربية في شغل جامد وهتلف شوية راي بلاش منها واتقل وانت هتلاقي انضف منها

**فادى محمد** · 13-12-2012 10:00 AM

وعليكم السلام ورحمه الله وبركاته
نزل فيها شويه لان سعرها الطبيعي 35 الف .لو خلصت معاه علي 32 الف يبقي معقول شرط انه يسلمك التكييف شغال او تروح لحد يقدر تكلفه اصلاحه وتخصمها منه بعد الفصال
العربيه كموديل حلوه قوي وموتورها سريع جدا وقطع غيارها موجوده استيراد وتتشابه مع الكورسا الاوروبي في بعض الاجزاء