يارب يخليكم عاوز شقة إيجار !

**خالد** · 11-12-2012 06:09 PM

عاوز شقة إيجار جديد أو قديم ومش مهم المساحة
وياريت تكون فى ألف مسكن أو الزيتون أو النزهة أو مصر الجديدة أو أى مكان بشرط منطقة هادية جداً وماتكنش شارع رئيسى أنا بحب الشوارع الجانبية علشان الهدوء لحسن خلاص أتعقدت من الدوشة

**beshomilan** · 11-12-2012 06:27 PM

كان نفسى اساعدك بس انا من شبرا

**خالد** · 11-12-2012 06:40 PM

المشاركة الأصلية كتبت بواسطة beshomilan

كان نفسى اساعدك بس انا من شبرا

ماهى المشكلة جاية من شبرا !!!
أنا أصلاً متربى فى شبرا فى شارع روض الفرج وبموت فيها لغاية الآن ومازال والدى عايش هناك ، ولما أتجوزت رحت عزبة النخل بيت بناه والدى ليا ولأخواتى كلهم وكلنا ساكنين مع بعض فى نفس البيت مفيش سكان معانا ، وليا فيه شقتين واحدة فى الدور الثانى ووواحدة فى الرابع وعندى جراج خاص !! ولكن .... وآه من لكن !! المنطقة شعبية جداً طبعاً وجنب منى قهوة ريحة الشيشة والفحم طالعة علينا الـــ 24 ساعة وكمان كبابجى ، وكمان الدوشة فظيعة من المحلات اللى بتشغل الكاسيت على طول وياما كلمتهم ومفيش فايدة وكله كوم والتوك توك والموتسيكلات كوم تانى لغاية الساعة 2 بالليل دايرين فى الشوارع بصوت فظيع للكاسيت وكمان الأولاد فى المدرسة بدأوا يلقطوا ألفاظ بشعة من زمايلهم ، والجيران فى المسجد والشارع وطريقة تعاملهم مش لطيفة خااالص !!!
ولو شبرا برضه يبقى كويس ، أنا شغلى فى مصر الجديدة علشان كده كنت بفكر فى المناطق القريبة ، بس المهم الشارع هادى وطبعاً الإيجار حنين
مع خالص تحياتى

**wawamoha** · 11-12-2012 07:20 PM

منطقه هاديه و ايجار حنين
عليك بالشروق ة استمتع بالحياه في المدن الجديده

**خالد** · 11-12-2012 07:34 PM

المشاركة الأصلية كتبت بواسطة wawamoha

منطقه هاديه و ايجار حنين
عليك بالشروق ة استمتع بالحياه في المدن الجديده

فعلاً المدن الجديدة رائعة ولكن لها عيوبها برضه خاصة الشروق زى المشوار البعيد واللى هتوفره فى الإيجار هتدفعه فى البنزين وإستهلاك العربية وعطلة الطريق عند موقف العاشر ، وكمان عدم الأمان الكامل بنسبة 100*100 ، وأنا مستعد للإيجار المتوسط مش الحنين قوى يعنى لغاية 1000 ج مثلاً
وشكراً لحضرتك جداً

**beshomilan** · 12-12-2012 07:48 PM

انت عايز فى شبرا ايجار قديم خلو كام وايجار لحد كام؟؟

**خالد** · 13-12-2012 02:22 PM

المشاركة الأصلية كتبت بواسطة beshomilan

انت عايز فى شبرا ايجار قديم خلو كام وايجار لحد كام؟؟

والله مش عارف

بس نشوف المتوفر أيه وبعدها نقرر ، بس المهم المنطقة كويسة وهادية
وتقبل تحياتى

**beshomilan** · 13-12-2012 07:44 PM

لازم تحدد عشان اقولك هينفع هنا ولا لا
متقلقش انا مش سمسار :d
انا خاطب وبدور على شقه فشبرا الايام دى فعشان كده سئلتك عشان اساعدك
انا بدور فى حدود 70 الف وايجار اقصاه 300 واهو لسه بلف

**خالد** · 14-12-2012 06:48 PM

لأ والله مش قلقان من حاجة أنا عارف من زمان أن كل الناس فى المنتدى محترمين
بس فعلاً أنا مش عارف والحقيقة إمكانياتى 40 ألف والإيجار ممكن 600 جنيه
أو لو إيجار جديد ممكن لغاية 1000 ج
وتقبل خالص تحياتى

**Karim_Monir** · 15-12-2012 05:15 PM

الف جنيه ايجار
شيل النزهة ومصر الجديدة من حساباتك نهائي
الزيتون برضه بصعوبة
الف مسكن خليك في منطقتك معملتش حاجة
ممكن اخر جسر السويس تقسيم عمر ابن الخطاب بس هاتكسر ال الف بحاجة بسيطة في شوارع هادية بس ابعد عن جمال عبد الناصر نهائي