سير كاتينه الشاهين عملها معايا (استرها يارب)
السلام عليكم ورحمة الله وبركاته
عربيتى شاهين موديل 2004
النهاردة الصبح نزلت انظف العربية فى الشارع وأروقها وألمعها واكشف على الزيت ومياه الرداتير وألمع الطابلوه وكده
دورتها الصبح وطلعت شويه بعيد عن الحائط علشان اعرف اشتغل
سير الدينامو كان بيعمل صوت صريخ كده
فحطيت عليه كام نقطة زيت
المهم بعد ما خلصت شغلتها علشان اركنها كويس بجوار الحائط لاقيتها فجأة بوم طفت بطريقة غريبة
جيت ادور المارش لاقيت الصوت غريب قوى مش المعتاد
محاولتش ادور تانى
وقولت فى عقل بالى يبقى سير الكاتينة اتقطع
جبت والدى قولتله دورها بتكه واحده بس علشان ابص على السير الكاتينه بيلف ولا ايه
جه يدور لاقيت سير الكاتينه ثابت مكانه مش بيلف
(مش الصح بردو انه يلف مع الدوراة ؟ ولا بيلف لما العربية بتشتغل ؟)
روحت للميكانيكى علشان اجيبه يشوفها لاقيته قافل علشان النهاردة الأحد
مشكلتى ان هفضل قلقان لحد ما تتصلح
حاجتين مش بطيق اقعد وهما فيهم عطل
( العربية وجهاز الكمبيوتر )
فكيت الوش الفبر اللى على سير الكاتينه لاقيته فعلا متزحلق من على الترس اللى تحت
قولت ممكن يكون سبب الزحلقه الزيت اللى حطيته على سير الدينامو يكون اتنطر على سير الكاتينه
ركبته مكانه بإيدى وجيت ادور بردو مفيش فايده
أنا كده حاولت ادور 3 مرات وسير الكاتينه مفكوك
استرها يارب من عندك
موضوع الكاتينه ده بيعمل رعب وعلى طول كنت بفكر فيه
والظاهر ان اللى بيخاف من عفريت بيطلعه
على فكرة انا كنت مغير بلية شداد كاتينه من حوالى 6000 كم علشان كانت قفشت عند الميكانيكى
وكنت هغير السير كمان الميكانيكى قالى السير اللى عندك حالته ممتازه
خليه 10000 كم كمان على الأقل
تنصحونى بحاجه اعملها ؟
الحمد لله انها عملتها تحت البيت ومش على طريق
كانت هتبقى مشكلة