بعد بحث طويل في موضوع التقسيط بدون فوائد ربوية ربنا هداني للصح وإليكم الخلاصة، أي بنك فيكي يا مصر هيوافق يقسط عربية بالأسلوب الي هوضحه ده إن شاء الله يكون حلال.
وقبل ما أوضح أي حاجة عاوز أقولك إن أنا قرأت عن الموضوع كتيير وإتفرجت على فتاوى كتير بخصوص هذا الموضوع وسألت أيضاً، يعني ده مش رأي أنا ده رأي العلماء.
بس أنا حابب إني ألخص الموضوع وأفيد بيه الي عاوز يشتري عربية بالقسط..
على شان البنك يبيعلك سيارة لازم تتم العملية على خطوتين:
وهذا يتطلب أن تكون مجهز الآتي ومقدمة للبنك على شان تاخد الموافقة:
1- مفردات مرتب أو تحويل مرتبك على البنك أو يكون عندك وديعة في البنك تاخد القسط بضمانها
2- عرض أسعار بالعربية
3- إيصال مرافق حديث لمدة لا تزيد عن 3 أشهر
4- يكون عندك دفتر شيكات
5- تجيب ضامن يضمنك ويكون له حساب في البنك ودفتر شيكات
الخطوة الأولي هي شراء السيارة من المعرض باسم البنك أولاً.
وتتم بتوقيع عقد بين البنك وبين حضرتك إسمه عقد "وعد بالشراء" ويكون موضح بالعقد كل التفاصيل (نوع السيارة، الموديل، اللون، المواصفات، .... إلخ) ، بالإضافة إلي شرط جزائي على حضرتك لو رفضت تشتري السيارة بعد لما البنك يشتريها ، فائدة هذا العقد هو إلتزامك بالشراء على شان ماترجعش في كلامك بعد لما البنك يشتري السيارة الي إنت محدد مواصفتها مسبقا
تنبيه هام:
الخطوة الأولي لو سبقها أي خطوة تانية هتكون المعاملة ربوية، لإن في بنوك بيحاولوا يعملوا ناصحين وتخليك تمضي على الشيكات وتمضي على عقد البيع، ويوقلك إفرض أنا إشتريت السيارة وإنت ما أخذتهاش ... تقوم رادد عليه وتقوله إمال عقد وعد بالشراء بيعمل إيه - طبعا في بنوك لو قولتلها كلمة عقد وعد بالشراء - هيقولك يعني إيه؟؟؟!!!
الخطوة الثانية بيع السيارة لحضرتك.
1- تمضي العقد النهائي
2- تمضي الشيكات
3- الضامن يمضي
لو الخطوة الأولى تمت بشكل كامل وصحيح إمشي في الخطوة الثانية بدون أي تردد
أنا لفيت ع البنوك كلها خصوصا الإسلامي منها ، لم أجد بنك واحد رضي أن يطبق الشروط ديه
إلا بنك واحد فقط وهو بنك فيصل
وبرضو أحيانا بيحاولو يعملوا ناصحين ويخليك تمضي الشيكات قبل ما يشتري السيارة من المعرض ويتملكها
لذلك لازم تكون واخد بالك من الإجراءات وترتيبها ...
لإن الناس ديه مقتنعة إن البيع زي الربا ومافيش فرق، بس الآية الكريمة بتقول "ذَلِكَ بِأَنَّهُمْ قَالُوا إِنَّمَا الْبَيْعُ مِثْلُ الرِّبَا وَأَحَلَّ اللَّهُ الْبَيْعَ وَحَرَّمَ الرِّبَا"
وديه بعض الفيديوهات للموضوع لفضيلة الشيخ على السالوس
من هنا
ولو حد عند إضافة أو له رأي مختلف ياريت يقولي
منتظر ردكم
المفضلات