مشكلة جديدة فى العفشة ارجو الافادة

**khaled_Saga** · 31-12-2012 08:11 PM

الحمد لله يا جماعة انا خلصت وروحت واحب اقولكم زى ماروحت زى مارجعت!!!!!
لا املك غير انى اقول انه توكيل زبالة وحسبى الله ونعم الوكيل فيه هو وكل القائمين عليه .. قال وانا كنت بقول ده مركز صيانة الكيلو 32 انضف من ابو رواش وللاسف طلع ما انيل من ستى الا سيدى!!!

اشتكيت من الاتى:

1. تخبيط فى العفشة مسمع فى دواسة الدبرياج ونقر فى الطارة مع المطبات
* ركب المهندس البرنس محمد رضوان (قمة الرخامة) وجرب العربية والحمد لله وهو لسه بيرجع اول عجلة تخبيط الدبرياج ظهر فى رجله ومشينا شوية نقر الطارة ظهر مع المطب وكان اللى يغيظ انه يقولك ان ده بوش فى علبة الدركسيون ومالوش حل حتى لو جديدة شوية وهتبوش وتعمل نفس الكلام قال وايه ده طبيعى فى الاسبرنزات كلها طيب ياسيدى نغيرها ضمان لأ متتغيرش ضمان لان العيب مش جامد وميستدعيش تغيير علبة اجيبه يمين وشمال وقلبت وشى مفيش فايدة ومفيش دم!

2. صوت صويت فى لفة الطارة (الطارة بتعوى على خفيف مع لفها خصوصا ناحية الشمال)
* حاولت اسمعه صوت الصويت الخفيف اللى فى الطارة ده وهو مش قادر يسمع سمعه على اده المهم قاللى هنكشف على الطرمبة ولما كشفوا قالوا زى الفل مفيش حاجة!

3. تقل وخشونة فى دواسة الدبرياج
* يعنى دى يمكن الحاجة الوحيدة اللى عدلوها حاجة بسيطة شحموا السوستة اللى ورا الدواسة وقالى البستم مفيش منه ترشيح زيت وكويس.

انا فعلا بدأت أؤمن انه توكيل فى منتهى السوء وصدق اللى قال بيتفننوا ازاى ميطلعوش العيب فى العربية وميدوش ليك حقك ويكرهوك بالتبعية فى العربية لحد ما ضمانك يخلص وتضطر للاسف تغير البايظ على حسابك وساعتها بقا هيطلعولك القطط الفطسانة فى العربية ويغيرولك كل اللى نفسك فيه مادام هتدفع!
عموما انا قررت استنى شوية لانى زهقت من مشوار التوكيل ده بجد اتخنقت واهو يمكن التخبيط يزيد عشان يقتنعوا ولما تبقى العلبة متوفرة فى مركز خدمة ابو رواش هحجز ميعاد ان شاء الله وابقى اروح احاول اغيرها.

فى انتظار تعليقاتكم

**hugan** · 31-12-2012 08:21 PM

يعني المشوار طلع علي الفاضي
انا اظن ان فرع العباسيه معقول
لو عايز تتاكد ان العربيه فيها مشكله من عدمه جرب المتحده الاول
ربنا معاك

**hugan** · 31-12-2012 08:35 PM

المشاركة الأصلية كتبت بواسطة khaled_saga

والله عالفاضى خااااالص صاحى من صلاة الفجر وغير سخافات الطريق وواخد اجازة من الشغل وفى الاخر على مفيش!
ياباشا مش محتاج اتأكد ان فيه مشكلة لأن هى موجودة فعلا والبيه المهندس شافها بنفسه ومعترف ان فيه حاجة فى علبة الدركسيون بس ازاى بقا يريحك ويغيرهالك.
انا هتصل برقمهم بتاع الشكاوى والبهم شكوى ولو انى عارف انهم مش هيعملوا حاجة بس والله ما هسيبهم الا لما اغيرها المشكلة النهاردة لما استلمت العربية كان الوقت اتاخر وعايز اروح فمكنش فيا دماغ اعمل حوارات.

علشان كده باقولك اكشف بره
علي الاقل وانت رايح المره الجايه تبقي محدد العيب فين بالضبط
ومفيش مجال لانهم يعملوا عليك حوارت
تاني شيء جرب فرع العباسيه
يعني هاتكون رايح لهم بالعيب ومحدده ومفيش مجال لانه يجرب
انا عندي مشكله كذا كذا والعيب 3-2-1
ساعتها مفيش حد يقدر يحور معاك

**khaled_Saga** · 19-01-2013 04:33 PM

روحت النهاردة وبمنتهى البساطة تم حجز علبة دركسيون ضمان لانها مش متوفرة .. لو ملكش حد فعلا فى التوكيل مش هتعرف تاخد حق ولا باطل .. لما روحت مركز الكيلو 32 معملوش ليا اى حاجة ولما روحت ابو رواش حجزهولى وقالى لو كانت موجودة كنت عملتهالك وظبطلك زوايا ومشيت بيها النهاردة.

**hugan** · 19-01-2013 09:21 PM

المشاركة الأصلية كتبت بواسطة khaled_saga

روحت النهاردة وبمنتهى البساطة تم حجز علبة دركسيون ضمان لانها مش متوفرة .. لو ملكش حد فعلا فى التوكيل مش هتعرف تاخد حق ولا باطل .. لما روحت مركز الكيلو 32 معملوش ليا اى حاجة ولما روحت ابو رواش حجزهولى وقالى لو كانت موجودة كنت عملتهالك وظبطلك زوايا ومشيت بيها النهاردة.

مبروك
انشاء الله تركب العلبه وترتاح من مشكلتها

**khaled_Saga** · 09-02-2013 01:31 PM

الحمد لله تم تغيير علبة الدركسيون ضمان يوم الاربعاء الماضى
فعلا حسيت بفرق حاسس ان العربية بقت انعم من الاول وقلت اصوات التخبيط فى العفشة والدبرياج وان كنت اظن ان لسه فيه بعض النقرزة والتخبيط الخفيف مع المطبات بس ممكن تكون حاجة تانية بقا .. هستنى شوية كده لو الموضوع زاد ابقى اروح اشتكى تانى.

**hemaa_82** · 09-02-2013 09:33 PM

هنلاقي بيض بارات الطرف او بيض المقص خف ولا حاجة .... يا اما عفشجي يكبسهالك يا اما تغيرها

مبروك العلبة الجديدة و تعيش و تغير :) خلي بالك العلبة ببتاع 1800 زي ما سمعت ... ربنا ما يحوجك ليها تاني

الموضوع: مشكلة جديدة فى العفشة ارجو الافادة

LinkBack

أدوات الموضوع

عرض

-

-

-

-

المواضيع المتشابهه

مشكلة فى العفشة - ارجو سرعة الرد

مشكلة فى نور السيراتو...ارجو الافادة

صوت عضة فى العفشة مع الفرامل فى التوقف..ارجو الافادة

مشكلة فى 128 ارجو الافادة

مشكلة بسيطة ارجو الافادة

الكلمات الدلالية لهذا الموضوع

المفضلات

المفضلات

ضوابط المشاركة