مشكلة جديدة فى العفشة ارجو الافادة

**khaled_Saga** · 21-12-2012 02:18 PM

اخوانى الكرام .. بعد ماغيرت 2 مساعد امامى وبطاحات وبلى بطاحات على الضمان العفشة اتظبطت تمام ماشاء الله لمدة اسبوع وبعدين ظهرت معايا مشكلتين كالاتى:

1. صوت دبدبة مع المشى بحسه خصوصا على السرعات البطيئة جاى من العفشة ناحية ادام .. الغريب ان العربية مظبوطة مع المطبات وده مطمنى من ناحية ان المساعدين اللى ركبوا جديد سلام وحلوين
2. صوت تكة جاى من ناحية ورا يخدث احيانا مع الضغط على الفرامل
3. مع لفة الطارة شمال رجعت تزيق تانى على بسيط او بمعنى اصح مش بتزيق انما بتعوى زى صوت الديب او القطة كده لما تعوى بس على بسيط فهل ده معناه ان البلية الشمال الجديدة ضربت تانى؟

وكنت عاوز اعرف وظيفة 3 حاجات واعراض تلفهم ان امكن:

1. البطاحات
2. بلى البطاحات
3. المقصات وبيض المقصات

ارجو من اصحاب الخبرة الرد والافادة ولكم جزيل الشكر

**khaled_Saga** · 22-12-2012 12:09 AM

محدش عنده معلومات عن أسئلتى؟

**BESO516** · 22-12-2012 09:28 PM

انا غيرت مساعدين على الضمان وشفتهم وهما بيركبو المساعدين الجديده بنفسى وخرجت كله تمام مفيش 3 ايام بالظبط وسمعت دبدبه بسيطه وبدأت تزيد مع الوقت وروحت للتوكيل غيرها لتانى مره ( قدامى برده ) ونفس القصه اتكررت لحد ماخرجت من الضمان والمشكله موجوده ؟؟؟؟ يعنى تحس ان قطع الغيار عندهم مضروبه

**khaled_Saga** · 22-12-2012 09:59 PM

ربنا يستر انت قلقتنى
فعلا قطع غيار مضروبة فعلا لانى مغير بلى بطاحات مرتين وكل مرة ترجع تزيق تانى

**khaled_Saga** · 22-12-2012 10:33 PM

فينك ياهوجان انت وهيما

**akmm** · 23-12-2012 10:12 AM

متابع ............... خاصه بلى البطاحات ؟؟؟

**aftr** · 23-12-2012 10:38 AM

بس ازاى مضروبه ياجماعه افرض انا خارج الضمان ومحتاج قطع غيار من التوكيل هل التوكيل يبيع قطع غيار مضروبه ده كده يكون نصب ---------------- خالد صوت التزيق ده بتسمعه فى الطاره زى صوت تزيق الباب كده لوكده كانت عندى المشكله دى بعد تركيب علبه دريكسيون روحت كلمت المهندس على التزيقه فك علبه كده فى الطاره وربط وجاب wd40 ورش عليها الصوت راح

**hemaa_82** · 23-12-2012 03:29 PM

بصوا ....
البطاحة عبارة عن كتلة كاوتش مضغوط بتطحت بين المساعد و الفخدة علشان تمص الصدمات و تقلل الذبذبات بين الارض "اللي عليها المساعد" و جسم العربية "اللي هيه الفخدة "

بلية البطاحة"مش في كل العربيات" عبارة عن رولمان بلي بيكون ما بين المساعد و البطاحة و ده علشان كده كدة المساعد بيلف حوالين نفسة لما بنلف العجل يمين و شمال .... و هدفها تسهيل دوران المساعد و بالتالي تخفيف الحمل علي علبة الدريكسيون

المقصات .... كتله حديد بتوصل الحركة من جسم العربية الي طنابير العجل ....احنا عندنا المساعد بيطول و يقصر مع الحركة و المطبات .... و ممسوك في العربية من البطاحة و الفخدة .... فلازم يتمسك في العربية من تحت بطريقة تديله حرية للحركة انه يطلع و ينزل بدل ما العربية تبقي حتة حديد.... ده هدف المقص .... بييمسك في العربية بمسامير علي جلب تخليها تتحرك فوق و تحت زي جناح الطير ... و الناحية التانية بيمسك في الطنابير علشان يمسك المساعد من تحت و يدي مجال للمساعد انه يطول و يقصر

بيض المقص ..... زي ما قلنا ان المقص بيمسك في الطنابير و يتحرك فوق و تحت ..... طب الطنابير نفسها غير طلوعها و نزولها مع المساعد بتتحرك حوالين المساعد يمين و شمال مع لف الدريكسيون .... طب يبقي بالتبعية المقصات لازم يبقي فيها حاجة تخليها تقدر تتحرك من حرفها مع الطنابير .... هيه دي بيضة المقص .... بتبقي كتلة مدورة و بايتة جوة المقص كبس او صب و تقيلة علشان تحكم الحركة و لما بتتاكل او تخف بنحس بطخبيط و الصنايعية يعملولها تخشين فيما يعرف ب "كبس بيض المقص"