ازيكوا يا رجالة

من كام يوم اكتشفت ان عربيتي كدا بقالها سنه بالظبط معايا
قبل السنه دي كنت راكب جيب شيروكي ومكنش عندي اي خبرة في العربيات
علي إيد الاوبل شوفت حاجات كتييير حلوة ووحشه
شوفت ايام صعبه كتير مع الفيكترا بدون دخول في تفاصيل
وحمت حياتي مرتين قبل كدا بعد ربنا طبعا , مرة عشان صاجها ناشف , والتانيه عشان ثباتها عالي .. بردو بدون تفاصيل
وبردو شوفت ايام حلوة بالعربيه دي و اخر فترة قضيتها في الجامعه كانت بيها
وزفيت بيها عروسة قبل كدا كمان

- العربية دي لما كان بيحصل فيها حاجه كنت بقول انا اتخنقت منها وهبيعها وبتاع
بس الغريب ان كل ما يحصل فيها حاجه و اعملها وتخلص علي خير اتعلق بالعربيه اكتر و احبها اكتر
والحمدلله مش ندمان اني جبت أوبل وبعدها هركب أوبل بردو ان شاء الله

- هحكيلكوا انا ايه بدايتي مع الاوبل وايه اللي خلاني اشتريها
انا يا جماعه من سنه كنت مجنون بحاجه اسمها بي ام دبليو
وكان نفسي اوي اجيب بي ام الدبانه التسعينات بس فضلت ادور كتير اوي ومكنتش بلاقي حاله نضيفه
والنضيف سعره مبالغ فيه جدااااا وجالي اكتئاب وعايز عربيه
لحد ما جيه بابا قالي انت عاجباك البي ام عشان الماني , ماتشوف حاجه الماني غير البي أم زي الأوبل مثلا
قولتله ماشي نشوف قالي طيب فيه اعلان كلمت صاحبها قالي في ميه نصر تعالا دلوقتي نروح نشوفها
طبعا ساعتها مكنتش اعرف حاجه عن الاوبل غير شكلها و انها عربيه الماني
روحت شوفت العربيه اللي في الاعلان كانت مبهدله جداا وفيها خبطات كتيير بس اهو اديني بتفرج
اعدت جوا الصالون يا جماعه عجبتني القاعده ولقيت نفسي مرتاح جدااا وشكل التابلوة فخم جدا
وانا قاعد جواها قررت اغير تفكيري من البي أم و اجيب أوبل فيكترا بي
مع انها عربيه مبهدله بس فعلا غيرت دماغي وخلتني فعلا ابتديت ادور علي اوبل فيكترا
لحد ما جبت اللي معايا دلوقتي الحمدلله هي 98 2000 سي سي 1 كامه اللي صورتها في التوقيع
وربنا يباركلي فيها و تهدي عليا في المصاريف بعد اللي عملته فيها طول السنه دي
...
- عايز أشكر منتدي أوبل كله لان كل واحد بيضيف للتاني حاجه هو مايعرفهاش
وانا خبرتي كلها في العربيات من نايل موتورز ومن قسم أوبل تحديدأ لان قبل الاوبل مكنتش مهتم اوي بالعربيات كنت بسوق وبس

- اكتر واحد استفدت منه وخدت منه خبرة في الأوبل "( فــادي محـمد )"
استفدت من مشاركاته اكتر من مكالماته في الموبايل لأني بتحرج اكلمه كتير ع الموبايل عشان احكيله علي مشكله عندي
الراجل دا يا جماعة فعلا بحس انه كان قاعد مع الخواجة الالماني وهو بيصنع الـ Vectra b لدرجة ساعات بخش بروفايله و اعد اقرا في المواضيع بتاعته و اذاكر مشركاتة :)

و " طناني باشا " طبعا الأب الروحي للأوبل
ومستر "احمد فهمي " عنده معلومات جامده جدا عن كل العربيات مش الأوبل بس وبستفاد منه جدا لما بيتكلم عن اي تكنولوجي في العربيات الجديدة بما انه ركب عربيات كتير جدااا


( معلش يا جماعة لو طولت في الكلام او كان كلامي مش مترتب , انا مش بعرف اكتب مواضيع وكتبت اللي جيه في دماغي )