الموضوع: محلات الملابس

المشاركة الأصلية كتبت بواسطة NineVision

انا فهمت جزء من ردك لكن بصراحة مفهمتش الجزء نفس الخامات والتصميم من نفس المصنع بس بمركات تانية ممكن تفهمنا ايه المركات ديه

انا كنت اول ما اتخرجت اشتغلت فى مصنع منسوجات وكان جزء منه بيصنع شرابات لzara و pull& pear , Adidas , Nike
وبنفس الخامات والالوان بيصنع شرابات للسوق المحلى فى مصر
والكلام دا على ايدى انا

المشاركة الأصلية كتبت بواسطة abo malek

يعنى ممكن يطبع اسم ابنى على تيشرت واحد بس؟؟؟؟؟؟؟؟؟؟؟؟

اه عادى
ممكن يعمل قطعه واحده او قطعتين او كمية كبيره
حسب طلبك انت

بالنسبة للرجالة اللي بتقول ان Zara فيه حاجات مصري والمحلات التانية فيها حاجات بنجلاديشي، فكلامهم مظبوط 100%، لكنه ناقص.


فعلا في حاجات مصري، لكن الميزة في ZARA إنه كل حاجة مكتوب عليها صناعتها، يعني الجواكت التركي اللي هي بقت أشيك من الحاجات الإيطالي هتلاقي مكتوب عليها MADE IN TURKEY ومش اشتغالة طبعا...هتلاقيها تركية فعلا. والحاجات المصري هتلاقي مكتوب عليها MADE IN EGYPT. وبينما هتلاقي هناك قمصان شكلها غريب وجميل جدا MADE IN SPAIN.

يعني في حاجات مصري اه وهتلاقي مكتوب عليها مصري..وفي حاجات تانية اوروبي. ونفس الشيء ل PULL & PEAR. وسبرينج فيلد. كل حاجة مكتوب عليها صناعتها ايه، بنجلاديشي او غيره ولكن القطن نضيف جدا والشياكة مكتملة. ومحدش بيضحك عليك ويقولك هي مصنوعة في مكان مش بتاعها...متقلقش ابدا من النقطة دي، الماركات الدولية دي مبتخمش في بلد الصنع ولا في جودة التقفيل.


بالنسبة للعناوين فأنا بنصح أي حد انه عايز يشتري انه ميلفش كتير، ويطلع على مول العرب أحسن مول في مصر كلها، وفيه كل الماركات اللي انا قلتها وماركات غيرها طبعا...

بالنسبة لأحسن محلات الجزم فبصراحة مفيش محلات جزم نضيفة في مصر وصناعة مصري غير طبعا جزم عرابي. اشهر صانع احذية في الشرق الأوسط. ولكن موديلاتها قليلة مش كتيرة و أسعارها فوق ال 500. وطبعا بيلبس من عنده نص وزراء مصر السابقين والحاليين و احمد نظيف وعمرو موسى وغيرهم كانت جزمهم من عنده، الراجل مشهور جدا وجزمه ملهاش حل لكن انا مبتريحنيش اوي، لكن اكيد الناس دي عارفة هي بتشتري ايه.

اما المحلات التانية فأنا بأمانة الله مشفتش ولا هشوف في حياتي زي جزم clarks ، احسن جزم في العالم تعيش معاك ومستحيل مستحيل مستحيل يحصلها مشكلة او خدش او اي حاجة في بالك، مشكلتها ان اسعارها دايما فوق ال650، ولكن في المقابل بتاخد جزمة بتعيش معاك لحد ما تزهق منها، وعلى فكرة هي عمر جلدها ماهيبوظ طول مانت بتحطلها كريم مناسب ليها وللونها، توكيلات كلاركس اللي اعرفهم واحد في شارع سوريا بس، والتاني في مول جرين بلازا اسكندرية، دي الفروع اللي فاكرها حاليا.

في برضو ماركتين من أنضف الماركات اللي ممكن تلبس فيهم جزم كاجوال وانت مبسوط بجلدهم وشياكتهم، وهما merrell و hush puppies ودول قمة الشياكة والنضافة في الجلود والتصميمات وطبعا الراحة للقدمين، الاسعار للميرل بتبدأ من 500، والهش بابس هتلاقي ارخص من كدا شوية ممكن من 350.

في بقا ماركة اخيرة مش مشهورة في مصر ولا حد يعرفها، لكني اكاد ازعم انها من احسن الماركات حاليا وهي ماركة اسمها وينج ويست تقريبا، ودي شفتها عند محلات spring shoes في مول العرب، الجلود برازيلي ومريحة جدا وشكلها شياكة، ممكن تبصوا عليها بصة مش هتخسروا حاجة.

في بقا محل اخير كمان واغلب الناس عارفاه وهو cat & active ماركات معقولة ولكن مفيش منها كلاسيك شيك خالص...كله كاجولات شبابي اوي، يعني مفيش جزمة جلد كاجوال شكل بتوع كلاركس مثلا.

وفي الاخر انصح اي حد انه قبل ما يشتري جزمة، يكون الاول لف على كل المحلات اللي فوق دي لانه بعد كدا هيندم، انت بتشتري جزمتين في السنة مثلا حد ادنى، اوعدك انك لو اشتريت من المحلات دي الجزم دي هتقعد معاك فوق ال5 سنين لحد ما تزهق من شكلها وهيكون معاك كمان جزم السنين اللي فاتت تبدل فيها مع الجزم الجديدة، هتصحى في يوم تلاقي عندك بتاع 10 جزم اشكال والوان مختلفة وكلهم حالتهم كويسة وشياكة للخروج، صحيح انهم اغلى من الجزم العادية، لكن هو الراجل ايه غير جزمته و نضارته وساعته وشعره وحبة حاجات تانية فوق بعضها؟ :D :D

واسف عالاطالة...

طالما دخلنا فى الجزم ......... أنا شفت جزم كاجوال عند new born أسعارها بتتراوح من 350 ل 425 جميلة جدا ......... لو المبلغ هيعدى ال 500 .......... أشترى من Zara أدخل على موقعهم هتشوف تشكيلة جزم من الآخر والأسعار برضه من الآخر