بعد الفيستا ,, جبت فوكس 2003

**meda2711** · 27-12-2012 06:05 AM

بسم الله الرحمن الرحيم

طبعا انا كان معايا فيستا 98 وكنت عارضها للبيع وبعتها والحمد لله جبت فوكس 2003 "معظم اللى بيركب فورد للاسف مش بيعرف يركب غير فورد "

العربية جميلة جدا وطبعا حاسس بفرق رهيب بينها وبين الفيستا من ناحية الفخامة والوسع وقوة الموتور 1600 زيتك والثبات افضل - بس برضوا ثبات الفيستا ممتاز - وطبعا الاوبشنز الكتير جدا اللى مكانتش موجودة فى الفيستا ,,مع العلم ان الباور فى الفيستا اخف من الفوكس ,, هو خفيف بس مش زى الفيستا بصراحة !!

بس عندى شوية استفسارات عايز اقولها ,,, هل استهلاك البنزين فى العربية دى عالى ؟؟ .. فى الكتالوج مكتوب ان التانك 55 لتر يعنى ربع التانك تقريبا 14 لتر , المؤشر نزل الربع فى مشوار من الهرم للمعادى للهرم تانى !!! مش مشوار جامد يعنى اللى يخليها تسحب 14 لتر ولا هى استهلاكها كده علشان 1600 ؟؟
ولو الاستهلاك عالى -وانا اعتقد هذا - ممكن يكون عيب ايه ؟

برضوا فيه حاجة كمان ,, هل دبرياج الفوكس عالى ؟؟ انا فى الاول علشان متعود على الفيستا حاسه عالى هو انا اتعودت عليه خلاص بس بسأل هل هو عالى اصلا او اعلى من الفيستا لأن واحد صاحبى كانت معاه فوكس زى اللى معايا ومعاه دلوقتى مونديو 2010 بيقولى هو كده طبيعى !!

واخر حاجة عايز اسأل عليها , انا قبل ما ابيع الفيستا غيرتلها موتور كامل " من غير فتيس" , وعندى الحاجات بتاعة الموتور القديم اللى هى دينامو وكومبريسور تكييف و طرمبة باور و موبينة اصلية , هل ممكن اى حاجة من دول هى هى اللى فى الفوكس ولا مختلفين تماما ؟؟

وشكرا ليكم واسف على الاطالة

**S O P H O S** · 27-12-2012 07:28 AM

الف مبروك التغير
ربنا يبارك يا باشا ..

**p r i n c e** · 27-12-2012 08:55 AM

مبروك التغيير يا باشا و إن شاء الله حد يفيدك
ممكن تقولنا بعت ال فييستا ب كام و اشتريت ال فوكس بكام عشان نستفيد من تجربتك

**mido51eg** · 27-12-2012 09:49 AM

meda2711
الف مبروك الفوكاس ، اختيار موفق ان شاء الله وربنا يرزقك خيرها ويكفيك شرها.
عاوزين نعرف جبت الفوكاس منين (اعلان - من صديق - من احد الجيران) وبكام وكشفت عليها فين والحالة العامة وكده يعني علشان اخواتك في القسم يستفيدوا.

**meda2711** · 27-12-2012 01:36 PM

المشاركة الأصلية كتبت بواسطة s o p h o s

الف مبروك التغير
ربنا يبارك يا باشا ..

الله يبارك فيك يا غالى

المشاركة الأصلية كتبت بواسطة dr-a.7.m.a.d

مبروك التغيير يا باشا و إن شاء الله حد يفيدك
ممكن تقولنا بعت ال فييستا ب كام و اشتريت ال فوكس بكام عشان نستفيد من تجربتك

الله يبارك فيك
انا يعت الفيستا ب 28 الف و جبت الفوكاس ب 53 الف

المشاركة الأصلية كتبت بواسطة mido51eg

meda2711
الف مبروك الفوكاس ، اختيار موفق ان شاء الله وربنا يرزقك خيرها ويكفيك شرها.
عاوزين نعرف جبت الفوكاس منين (اعلان - من صديق - من احد الجيران) وبكام وكشفت عليها فين والحالة العامة وكده يعني علشان اخواتك في القسم يستفيدوا.

ربنا يخليك يا كبير
جيبناها من راجل معرفة علشان كده منزل فى سعرها هى اغلى من كده اصلا والكشف بيبقى فى بنزينة اللى هو كشف عام وبتاخد تقرير وكده ,, والعربيةفابريكة بره وجوه , وطبعا كماليات اربعة رجاج كهرباء وسنتر وباور وتكييف ومرايات كهرباء والتحكم فى ارتفاع النور والتحكم فى نور العدادات وايرباج والتحكم فى ارتفاع كرسى السائق وجنوط سبور 15 الاصلية بتاعتها

**p r i n c e** · 27-12-2012 04:10 PM

ربنا يباركلك فيها يا باشا :-)

**elmashtoly** · 28-12-2012 02:31 AM

ياباشا ربنا يباركلك فيها يارب
بس اعتقد السعر كده عادى جدا مش قليل اوى
ولا حاجه هيه ممكن تزيد الف او الفين فقط
مش اكتر من كده خاالص يعنى او مش زى ما انت متخيل
انا بايع 2002 بره وجوه ب 49 كامله مانيوال

**aYaBooY** · 31-12-2012 07:34 PM

اولا مبروك البيع و ثانيا مبروك الشراء
ثالثا مليش دعوة بالفلوس ههههه
بص بقي موضوع الدبرياج الفيستا دبرياجها عالى بس مع الوقت يبدء يوطى لو انت مركب الماستر الاصلى للدواسة و من هنا كان فيه الاحساس بالموضوع لكن الفوكاس معرفش نظام دبرياجها ايه بس لازم يكون عالي لو هو زيت زي الفيستا
موضوع الباور
لا باور الفيستا تقيل في الصح و بيتقل اكتر مع الجرى لو مكنش عندك كدة يبقي فيها عيب يعني الفوكاس هيا الي مظبوطة تقريبا

**meda2711** · 02-01-2013 01:01 AM

المشاركة الأصلية كتبت بواسطة elmashtoly

ياباشا ربنا يباركلك فيها يارب
بس اعتقد السعر كده عادى جدا مش قليل اوى
ولا حاجه هيه ممكن تزيد الف او الفين فقط
مش اكتر من كده خاالص يعنى او مش زى ما انت متخيل
انا بايع 2002 بره وجوه ب 49 كامله مانيوال

الله يبارك فيك
هى تفرق علشان الحالة و الكماليات اللى فيها بين عربية والتانية والحمد لله على كل شىء

المشاركة الأصلية كتبت بواسطة ayabooy

اولا مبروك البيع و ثانيا مبروك الشراء
ثالثا مليش دعوة بالفلوس ههههه
بص بقي موضوع الدبرياج الفيستا دبرياجها عالى بس مع الوقت يبدء يوطى لو انت مركب الماستر الاصلى للدواسة و من هنا كان فيه الاحساس بالموضوع لكن الفوكاس معرفش نظام دبرياجها ايه بس لازم يكون عالي لو هو زيت زي الفيستا
موضوع الباور
لا باور الفيستا تقيل في الصح و بيتقل اكتر مع الجرى لو مكنش عندك كدة يبقي فيها عيب يعني الفوكاس هيا الي مظبوطة تقريبا

الله يارك فيك يا كبير
هو دبرياج الفوكاس زى الفيستا بالظبط بزيت باكم وبرضوا بيتزود فى نفس القربة مع الفرامل
باور الفيستا كان بيتقل مع الجرى برضوا ,, هو باور الفيستا كان خفيف اوى بس باور الفوكاس خفيف بس محكم اكتر

وكنت عايز استفسر عن حاجة ... انا جبت بوجيهات بلاتنيوم موتوركرافت بتوع الفوكاس بس لسه مركبتهمش ,, اخلى اى حد يركبهملى ولا لازم ميكانيكى فورد ,, اصل انا فى الهرم وبتعامل مع احمد فرج فى جسر السويس مشوار علشان تغيير بوجيهات ,, وانا فى الفيستا كنت بخلى اى حد يغيرهم وخلاص لانى برضوا كنت بجيب الاصلى فبيركب من غير اى ضبط فيلر بقى والكلام ده ,, الفوكاس برضوا نفس النظام ولا ليها ضبط مع البوجيهات الاصلية ؟؟