الموضوع: تقرير مصور عن تركيب فوجات اوكتافيا a5 للانسر بومه

بسم الله الرحمن الرحيم

والله ياجماعه ديه اول مرة اعمل فيها تقرير فى حياتى
علشان كده هيبقى بسيط على الاخر
وياريت تسامحونى لو قصرت فى حاجه

التقرير النهارده عن
تركيب فوجات شبورة الاوكتافيا A5 للعربيه لانسر بومه

بعد بحث وتمحيص عميق على النت وسؤال الصنايعيه واخواننا الاعضاء هنا فى المنتدى
قررت انى اركب فوجات شبورة لعربيتى الجديده لانسر 2006 وهى هاف سبورت وكان فيها فوجات قديمه الاصليه بتاعتها بس كانت مكسورة وبالتالى كان راكب الزرار الاصلى بتاعها اللى فى التابلوة اللى جنب تحكم المرايات
علشان كده كنت بدور وبسأل عن اى تعديل ليها غير الاصلى والحمد لله استفادت كتير من الاعضاء هنا فى منتدانا الكبير نايل موتورز
وعرفت ان احسن 3 حلول لتعديل الفوجات هى تركيب
1- فوج الاوكتافيا A5 ( مش الفانتازيا )
2- فوج الاسبيرانزا الكبيرة A 620
3- فوج الالنترا 2007 : 2011
وهما كده بالترتيب المظبوط
يعنى يعتبر الانسب هو الاوكتافيا

طبعا نزلت التوفيقيه سألت على الفوجات فى كل او معظم محلات الاسكودا ولاقيت الفوجين دول تمنهم بيتراوح بين 220 : 600 جنيه
انا بقى طبعا اشتريت ابو 220 صناعه صينى من محل اسمه النبيل موجود فى الشارع اللى بعد شارع التوفيقيه على اليمين جنب محل حكيم بتاع الاكسسوارات بس بصراحه راجل متحبش تتعامل معاه اصلا ... بقوله انا من طنطا ومش متأكد ان دول هيركبوا ولا لا قالى انا ماليش دعوة لو اخدتهم مش هيرجعوا قولتله انا مش بقولك يرجعوا ولا لا انا بسأل الاول ينفع يركبوا عندى ولا لا زى ما تقول كده راجل قفل
المهم
نزلت بالفوجات على المحله الكبرى ( متستغربوش انا اه من طنطا بس واحد حبيبى قالى على كهربائى شاطر يركبهم فى المحله ) وروحت للكهربائى
كل اللى عمله :-
1- نزل الاكصدام
2- خلع الفوجات القديمه والمكسوره
3- خلع قطعه الفيبر اللى موجوده حول الفوج القديم
4- ركب الفوج الجديد بس بصراحه مجاش على المكان مظبوط وهقولكم عمل ايه بعدين
5- ركب طقم الزينون اللى اشتريته
6- ركب الاكصدام تانى وظبطه
7- خلاص مفيش حاجه تانى جربت وشغلت وكله طلع تمام والحمد لله زى الفل

اسيبكم بقى مع الصور

صوره اماميه بدون اضائه الزينون

( 1 )




( 2 )




صوره للجزء اليمين فقط

( 3 )



( 4 )



صورة للجزء الشمال فقط

( 5 )



( 6 )



صوره اماميه ظاهر فيها اضائه الزينون مع مراعاه ان احنا الصبح مش بالليل

( 7 )



( 8 )




.................................................. .................................................. *

طبعا يا جماعه العربيه مش قد كده ومش مغسوله بس بتقضى الغرض والحمد لله

المهم بقى انتوا لو لاحظتوا فى الصورة 4 و 6 هتلاقوا كيفيه تظبيط الفوج فى نص الفتحه مكان الفيبره البلاستيك والكهربائى عالج الاماكن الفاضيه بأنه حط سيليكون اسمر فى الفراغات الصغيره الموجوده يمين وشمال الفوج بس طبعا كل ده مش باين على الحقيقه بس ظاهر فى الصورة علشان انا جايبها من قريب اوى علشان تظهر ادق التفاصيل

النتيجه بقى

بسم الله ما شاء الله ضوء قوى جداا جدااا بالليل وانا ماشى بنور الشبورة فقط وكمان علشان لون العربيه اسود فالنور الزينون بفوج الاوكتافيا راسم العربيه عالاخر

الكهربائى بقى حاسبنى على تسقيط الاكصدام وتركيب الفوجات والزينون وتركيب الانذار Wolf اللى شبه Spy 5000 بس بريموتين .... دفعت 175 جنيه
بصراحه انا مش عارف كده كتير ولا كويس بس اهو .. انا كده الحمد لله راضى عن النتيجه ومش زعلان لو المبلغ طلع كتير

وفرحان اكتر انى عملت تقرير بس يارب يكون عجبكم ده لو طلع تقرير اصلا

مبروك ياباشا