تأخير التوكيل في قطع الغيار

**M.Mosaad** · 23-07-2008 01:11 PM

الحمد لله انا اشتريت سيريون اتوماتيك 2008 و استلمتها في 23-6-2008 و الحمد لله علي كل حال اتخبطت تاني يوم من الناحيه اليمين و المفروض اني اغير اكصدام امامي و كارتيرة و الفانوس اليمين و الرفرف لسه هيشوفوا هيتغير و لا التامين هيرخم و يحاولوا يردوة المهم انا النهاردة يوم 23-7-2008 و لحد دلوقتي الاكصدام الامامي لسة مش موجود و انا ماشي بالعربيه كدة بقالي شهر يعني عربيه جديدة و مخبوطة الحمد لله
انا لاحظت ان في كذا موضوع عن قطع غيار ناقصة ( زجاج امامي - و وحدات رفع ) ان كنت فاكر ان المشكله في الاكصدام بس من الواضح ان في حاجات كتير ناقصة و لا انا فاهم غلط يعني انا اشتريتها علشان التوكيل محترم لكن من الواضح كدة ان القطع بتتاخر اوي و لا انا اللي حظي وحش
سؤال تاني لو سمحتم هو الدهان و السمكرة هناك نضيفه بترجع العربيه زي ماكانت و لا بتسيب اثر اصل فعلا انا مضايق جدا لاني ملحقتش لتهني بس الحمد لله علي كل حال
و علي فكرة العربيه نفسها ممتازة لاني فعلا قعدت شهرين عمال اقارن بين كذا موديل لحد ماستقؤيت عليها بس فعلا كانت الحمد لله اختيار موفق عربيه رائعه و سحبها رائع و مريحه جدا من جوة وواسعه و ناعمه و الدركسيون الكهربا دة حاجة جميله اوي يعني من الاخر هي احسن عربيه لحد 90 الف جنيه في رأي المتواضع
شكرا جدا ليكم و اسف علي الاطاله

**zozza** · 23-07-2008 01:33 PM

محمد باشا اولا حمد الله عالسلامة و الحمدللة انك بخير و ربنا يعوض عليك ان شاء الله

اما عملت حادثة زي بتاعتك دي بالضبط من 6 شهور تقريبا و بردو غيرت اكصدام امامي و فانوس امامي شمال و كرتيرة رفرف و كل الحاجات دي مكانتش موجودة بردو بس جابوهالي في اسبوع و العربية من ساعة ما عمالت الحادثة لحد ما استلمتها اخدت معايا 3 اسابيع و لولا التأمين كان ممكن استلمها اسبوع بدري.
اللي عاز اقولهولك ان الناس هناك بيبذلو كل المجهود اللي يقدرو عليه و ما شاء الله العربية بتتباع بشكل رهيب و هما عليهم ضغط كبير. انت بس شد حيلك معاهم و اقرص عليهم شوية و كل حاجة هتم علي خير ان شاء الله.
بخصوص الدهان انا عربيتي لونها احمر و رشولي الرفرف و الاكصدام الجداد و العربية رجعت زي الاول و احسن و الدهان عندهم ممتاز وانا كنت واقف بتفرج عليها و هي بتتدهن و للعلم هما كمان بيسرقوا من لون العربية نفسها بعد ما بيرش عشان لو كان لون العربية اتغير من الاستعمال يبقي القطعة اللي مرشوشة جديدة ماتبنش ان لونها اجدد من لون باقي العربية.
و للعلم كمان ان التأمين هو اللي دفع كل التكاليف و انا مدفعتش حاجة خالص.

**Sharky** · 23-07-2008 11:36 PM

توكيل دايهاتسو معروف بعدم توفر كل قطع الغيار و دايما بتاخد وقت لحد ما يجيبوها

**M.Mosaad** · 23-07-2008 11:42 PM

الف شكر علي الردود و ربنا ييسر اديني مستني و كل شويه بتصل ربنا يسهل
الف شكر ليكم جدا يا جماعه

**أبو عبدالله** · 24-07-2008 03:07 PM

المشاركة الأصلية كتبت بواسطة sharky

توكيل دايهاتسو معروف بعدم توفر كل قطع الغيار و دايما بتاخد وقت لحد ما يجيبوها

يا حاج احمد ما انت عارف ان التجارب الفردية ليس دليل على كده ولا ايه

يعني سبق واكام واحد من ملاك العربيه راح التوكيل ووجد اللي هو عاوزه من كام واحد راح وملقاش

يعني بلاش التعميم كأنها قاعده بنتكلم عليها

**معاذ الشرباصى** · 24-07-2008 06:23 PM

ربنا يكون فى عونك

يا ريت حضرتك تتصل ب 16168

و تسجل شكوتك بخصوص التأخير لعل و عسى يتم تدارك الموضوع ده فى المستقبل

**M.Mosaad** · 25-07-2008 12:20 PM

علي فكرة انا عن تجارب اصحاب كتير اعترف ان التوكيل دة من احسن التوكيلات في مصر بس المشكله في مصر ان الواحد دايما بيدور عن احسن الوحشين يعني صب اوي تمشي بعربيه جديدة مخبوطه لمدة شهر - يعني الحمد لله ان العربيه ماشية امال لو واحد تاني عربيته واقفه علي قطعه الغيار دي كان عمل ايه و خصوصا لو شغله معتمد علي وجود اعربيه
هما قالولي ان الجمارك بيبقوا عايزين اكراميات و هما مش بيدفعوا علشان كدة الحاجة بتتاخر في الجمرك - يعني الاكصدام في المينا بقاله اسوعين و لشه مخرجشي

**ushraf** · 25-07-2008 02:58 PM

المشاركة الأصلية كتبت بواسطة أبو عبدالله

يا حاج احمد ما انت عارف ان التجارب الفردية ليس دليل على كده ولا ايه

يعني سبق واكام واحد من ملاك العربيه راح التوكيل ووجد اللي هو عاوزه من كام واحد راح وملقاش

يعني بلاش التعميم كأنها قاعده بنتكلم عليها

مع احترامي: لو زبون واحد راح التوكيل ومالقاش اللى عاوزه يبقى توكيل ؟؟؟؟
وحكاية الجمارك دي متعديش على طفل بيوأوأ

**أبو عبدالله** · 25-07-2008 03:04 PM

المشاركة الأصلية كتبت بواسطة ushraf

مع احترامي: لو زبون واحد راح التوكيل ومالقاش اللى عاوزه يبقى توكيل ؟؟؟؟
وحكاية الجمارك دي متعديش على طفل بيوأوأ

عيبنا دائما ان احنا بنحب الكلام وخلاص
بدون ما ننظر للواقع العملي ايه اللي بيحصل

يعني حضرتك ازاي يعني ان كل واحدفي اي وقت لازم لازم يروح التوكيل يلاقي قطعه معينه محدده مستنياه

ازاي

في كام الف عربيه من الموديل وممكن تعمل حوادث لا بدخل احد ولا بحسابات احد
وفجاه تلاقي النسبة اللي حضرتك مخصصها لنفسك ولتوكيل لقيتها خلصت ايه المشكلة في كده

ثانيا موضوع الجمارك ده قبل ما تتهم ان الكلام كذب او خداع
لأن الموضوع ده بيحصل ما كبرى الشركات في مصر زي العربي كده
ولو حضرتك لك احد شغال مثلا في منتجات العربي زي التكييف هتعرف ان الجمارك كانت ساعات بتوقفله الخامات اللي داخله ويقف انتاج التكييف عنده لفتره زي دلوقتي مفيش تكييف 1.5 حصان شارب في السوق كله
تفتكر هو موقف الأنتاج بمزاجه يعني واحنا في عز الموسم الحار وموسم شغلهم

ياريت بلاش نتكلم ونتهم كمان واحنا لسنا متيقنين من الكلام او على الأقل مفيش لدينا معلومات تؤكد ولا تنفي

**Sharky** · 25-07-2008 03:11 PM

المشاركة الأصلية كتبت بواسطة أبو عبدالله

يا حاج احمد ما انت عارف ان التجارب الفردية ليس دليل على كده ولا ايه

يعني سبق واكام واحد من ملاك العربيه راح التوكيل ووجد اللي هو عاوزه من كام واحد راح وملقاش

يعني بلاش التعميم كأنها قاعده بنتكلم عليها

يا حاج أبو عبدالله

دا مش كلامى لوحدى
دا كلام ملاك دايهاتسو فى المنتدىو تقدر تراجع المواضيع و تتأكد من عدم توفر قطع الغيار و تأخرها
و لو لا قدر الله عملت حادثة أو إحتاجت قطعة غيار بره الصيانة الدورية حتقول إللى إحنا بنقوله دا
التوكيل يا أبو عبدالله مش تيل و فلاتر فقط

يعنى الحكاية عامة مش فردية و ياريت التوكيل فعلا يحس بيها و يحلها و بلاش كلام بقى رشاوى و إكراميات الجمارك لإنها فى الاخر نتيجة لعدم توفر سيولة للوكيل من الأخر و أنا عارف بقول إيه لإنه شغلى كله له علاقة بالشحن و الجمارك