الله يبارك لك يا هندسة
بس ليه الخراطيم بتاع التكييف بيبقى فيها أجزاء حديد متغطية بالكاوتش ... وإيه اللى بيحصل لما جزء من الكاوتش دا يتنفخ ؟
عرض للطباعة
الله يبارك لك يا هندسة
بس ليه الخراطيم بتاع التكييف بيبقى فيها أجزاء حديد متغطية بالكاوتش ... وإيه اللى بيحصل لما جزء من الكاوتش دا يتنفخ ؟
فيه نوعين من وصلات نظام التكييف
مواسير التكييف وفيه منها مكشوف ... وفيه منها متغطي بالكاوتش كنوع من العازل الحراري... بالذات في المسافة ما بين المبخر (الثلاجة) والكمبريسور، لإن المواسير بتبقى ساقعة وممكن تكثف ميه أو أحيانا بتعمل تلج (لو فيه عيب في الدايرة)
إنما خراطيم التكييف... فــدي بتبقى موجودة في الوصلات القريبة من الكمبريسور عشان الموتور بيتحرك من مكانه، ولازم يبقى فيه وصلات مرنة ... بس بداياتها ونهاياتها ألومنيوم ومكبوسة على الكاوتش، والخراطيم دي من نوعية مخصوصة تستحمل الضغوط العالية
نفخة الكاوتش عموما معناها إن عندك تسريب فريون بس محبوس تحت الكاوتش بسبب إنه بدأ يشقق
عموما... أي أجزاء كاوش عمرها حوالي 5 سنين... لو عربيتك عدت الخمس سنين يبقى توقع حاجات من دي في أي أجزاء كاوتش تانية
...
طيب يا باش مهندس .. هل معنى كدا إن فيه تسريب برضه ولا الكاوتش مانع التسريب ؟
وإيه خطورة التسريب دا ؟؟
معلش آخر سؤال لأن محدش عرف أجابته حتى الآن :
لو عندك تكييف بكرة عادى طبعا فيه زرار Ac أول ما بتضغط عليه الكلتش بيجمع والكمبرسور يشتغل ساقع والثرموثتات على الساقع
إيه اللى يحصل لوجبت الثرموثتات على السخن والكمبرسور شغال ؟
لسه مفيش تسريب.. بشكل مؤقت... وقريب الخرطوم هيتشق ويخرج الفريون
لو كان الشق بسيط... فتسريب الفريون هيحصل ببطء نسبيا... وهتحس إن التكييف بيضعف... لحد ما يفصل تماما لما الفريون يتسرب بالكامل (الكمبريسور مش هيشتغل)
إنما لو الشق كبير .. الفريون هيتسرب بالكامل والكمبريسور هيفصل بسرعة.
في جميع الأحوال لازم الخرطوم يتغير وتشحن الفريون تاني
____
بالنسبة لدرجة حرارة التكييف... فالموضوع ده فيه نظامين
النظام الآلي الحديث اللي بنظبط درجة الحرارة فيه على رقم معين (20 درجة مئوية مثلا)، والنظام ده بيشغل الدفاية أو التكييف ويفصلهم أو يخلط ما بينهم ويظبط سرعة المروحة على حسب الدرجة المطلوبة بدون تدخل من الإنسان.
ما اعتقدش إن ده هو اللي تقصده حضرتك
النظام التقليدي الموجود من زمان وفي أغلب العربيات الرخيصة نسبيا هو أشبه ما يكون بخلاط المياه في الحمام.. لإن الهوايات اللي بيطلع منها هوا التكييف/الدفاية بتخلط الهوا الساقع اللي جاي من التلاجة مع الهوا السخن اللي جاي من الدفاية
http://mesaautofix.com/jakes-wp/wp-c...nditioning.jpg
ده نظام التبريد اللي بناخد منه وصلة على الدفاية
http://d3d71ba2asa5oz.cloudfront.net...ng_diagram.jpg
وده نظام التكييف
http://www.2carpros.com/images/artic...ner_system.gif
الخلط بيحصل في وحده التوزيع اللي بتوزع الهواء على فتحات التكييف وتخلط السخن مع الساقع
http://d3d71ba2asa5oz.cloudfront.net...c-air-flow.jpg http://www.autopartslib.com/wp-conte...components.png
في بعض عربيات بتبقى الدفاية شغالة على طول، والبوابة هي اللي بتخلط الهوا
وفي أنظمة تانية الدفاية بنتحكم فيها عن طريق كمية المية السخنة اللي جاية من الموتور
وآخر اختراعات التكييف والتدفئة في العربيات.. كالعادة الفرنساويين عملوها بحيث إن التكييف بقى زي تكييف البيت .. ساقع/سخن.. ومافيهاش وصلة من المية السخنة... ولما نعوز تدفئة دورة التكييف بتتعكس وتطلع السخونية جوة الصالون
http://myrenaultzoe.com/wp-content/u...ol_Renault.jpg
...
اخيرا موضوع تعليمي مفيد في المنتدي
موضوع روعة الصراحة معلومات قيمة جدا بارك الله فيك
موجود فى موديلات إيه التكييف اللى زى تكييف المنزل ؟؟؟
وبالنسبة لحالة الخلط اللى حضرتك بتتكلم عنها لازمتها أيه ؟؟
لما أنا بأمكانى أشغل الساقع وحده والسخن وحده
ولا قصد حضرتك إن ممكن يكون قدرة الكمبرسور فى التبريد تكون أعلى من الدرجة المطلوبة فيضطر إنه يخلطها مع السخن عشان يطلع الحرارة المناسبة
وعشان كدا الناس بتقول أفصل السخن التكييف يسقع أحسن !!!!! يبقى الكلام دا فعلا صحيح
وفى حالة إنى مثلا مشغل التكييف السخن بتبقى حرارة الموتور أعلى من الحرارة المطلوبة فبيخلطها مثلا بس خلينى هنا مش مشغل ال كمبرسور ؟وإيه اللى بيحفظ للمحرك حرارته الطبيعية
التكييف اللي زي تكييف المنزل بيبقى الكمبريسور مش متوصل على الموتور .. وإنما ليه موتور كهربا منفصل بيشغله... والباقي زي تكييف المنزل بالظبط
النوع ده من التكييف مش منتشر... وغالبا بيكون نازل في السيارات الغالية أو الحديثة جداً والأوروبية غالبا (اليابانيين عندهم نفس الموضوع بس بينزل في عربيات لا يمكن نشوفها في مصر حاليا)
بالنسبة لأنظمة التكييف المتعارف عليها في السيارات... بيبقى فيه وحدة فيها سربنتينة التكييف وسربنتينة الدفاية في حجرة واحدة... والتحكم في درجة الحرارة بيبقى بطريقة من اتنين:
الطريقة المستخدمة في معظم السيارات الأوروبية (وربما الأمريكية): الدفاية متوصلة بشكل مستمر ولما نشغل التكييف بنتحكم في درجة الحرارة عن طريق بوابة مخصوصة
زي كده:
http://d3d71ba2asa5oz.cloudfront.net...c-air-flow.jpg
في الحالة دي... فعلا لما نمنع المية السخنة من دخول الدفاية.. التكييف هيسقع أكتر
الطريقة التانية مستخدمة في السيارات اليابانية والكورية (ما عدا الدايو لإن التكنولوجيا بتاعتها متاخدة من أوبل)، وفيها مية الدفاية عليها محبس بيتحكم في دخول المية السخنة إلى الدفاية، ولما بنحرك مؤشر الحرارة بنفتح سكة للمية السخنة إنها تدخل وتبدأ تدفي.
زي كده:
http://www.autopartslib.com/wp-conte...components.png
في الحالة دي الدفاية ما بتأثرش على أداء التكييف إلا لو شغلناها...
الموضوع هنا عامل بالضبط زي خلاط الحمام ... لو عايز مية ساقعة شغل الساقع واقفل السخن... ولو عايز مية سخنة شغل السخن واقفل الساقع... ولو عايز حاجة في الوسط.. افتح الاتنين واضبط زي ما انت عايز
النظام ده فعال أكتر بدون شك
إنما في النظام الأولاني (الأوروبي).. الموضوع عامل زي ما يكون الخلاط فيه حنفية السخن بتسرب وعايزة جلدة :)، وده طبيعي لإن الجو عندهم ساقع طول السنة... بس المفروض إن النظام ده يتغير في الدول الحارة زي مصر
على فكرة... لحد دلوقتي... العربيات المنتشرة في السوق المصري ما فيهاش حاجة إسمها تكييف سخن إلا لو فيها كمبريسور كهربا
لو عايز تعرف إيه اللي بيحفظ للموتور حرارته الطبيعية ... ادخل على الموضوع ده:
ثرموستات الكوعة... المفترى عليه
...
ربنا يبارك لنا فيك يا هندسة
:U_thin1[1]: :U_thin1[1]: اللى فهمته من شرح حضرتك الجميل بالنسبة لحكاية تشغيل السربنتينة السخن مع التكييف الكمبرسور الساقع
حضرتك تقصد ال dual zone صح كدا ؟؟؟ وليس الخلط بالمعنى اللى أنا فهمته
يعنى لو عايز تخلى نص العربية ساقع والنص التانى سخن شغال ؟؟
أنا بقى اتكلمت فى نقطة تانية وهى أنى مبدئيا معنديش نظام الخلط دا يعنى يا إما سخن يا أما بارد
وفى حالة تشغيل الكمبرسور وثرموثتات الحرارة على البارد وقمت بالتحويل الثرموثتات من البارد إلا الساخن تمام كدا ؟؟
يعنى فى الحالة دى المفروض الكمبرسور يفصل لكنه مش بيفصل وبيفضل شغال
أنا عملت كدا عشان لقيت صوت الكمبرسور على وابتدى يظهر له صوت والأضاءة فى العربية ابتدت تضعف
عشان كدا سألت حضرتك
هل خطر إن الكمبرسور شغال بالرغم من إنك مشغل الساخن اللى هو لا يعتمد على كمبرسور ؟؟
طيب لو مش خطر الباور بتاع الكمبرسور بيروح فين ؟؟ هو بيطلع هوا ساقع طبعا ؟؟ يعنى فلنفرض إنه بيتخلط مع الهواء الساخن ودا معناه إن درجة حرارة الهواء الساخن فى العربية هتبقى أٌٌقل مهما زودت ثرموثتات السخن عشان مخلوطة بهواء ساقع من الكمبرسور
بالرغم من ذلك أنا عندى الحرارة السخنة مبتتأثرش لو مشغل التكييف الساقع !!!!!!!!