الموضوع: تجربه ضبابيه لشراء صني الجديده من السبع مصر الجديده و اتمني نهايه سعيده

يأ أخوانا كل اللي بيحصل ده شيء طبيعي وبديهي في بلد زي مصر. الناس كانت متعودة إن الغش والكدب واللف والدوران والسرقة بتقبى في السيارات المستعملة فقط. لأ. ده كلو موجود برده في السيارات الزيرو. خير دليل على صحة كلامي شكوى الأخت.

يا أخواننا إحنا بصفتنا حاجزين دايما محطوطين في آخر الطابور. دايما هتلاقي إللي واقف قدامك في الطابور هو اللي بيدفع أوفر برايس، مش بس كده إللي هيدفع أوفر برايس أكثر هيقف أول واحد في الطابور. وممكن كمان يتصل بهم يخلي المندوب يجبله العربية يستلمها قدام البيت لو سيادته مشغول. بس أهم حاجة يشوف نفسه ويدفع أوفر برايس محترم.

في حد هيطلع ويقلي الكلام ده مش مظبوط لأني استلمت بالسعر الرسمي خلال أسبوع أو أسبوعين. هقولك بص على العربية كويس. وافحص تمام. لأن الحداية مش بترمي كتاكيت. الحداية بتخطف الكتاكيت. ولما تلاقي كل الناس بتشوطك وبعدين تلاقي واحد بس جه يتطبطب على ظهرك. لازم تشك في الموضوع. وتعرف إن الموضوع فيه "إنَّا".

العربية بتجيي عند أول واحد في الطابور يبص عليها ولو لقه فيها حاجة بيرفضها، تروح على اللي بعد ثم اللي بعده، لغاية ما توصل في نطاق الناس اللي حاجة بالسعر الرسمي زي حالاتي كده. وتخليو بقه واحد بقاله ثلاث شهور منتظر، وشبع بهدلة في المواصلات، تخيلو هيكون رد فعله أيه لما يستلم عربية جديدة، اعقتد إنه وهو في الموقف ده ممكن يقدم بعض التنازلات، يعني لون نصم كم، عربية فيها مشكلة ميكانيكية، عربية متخربشة (حصلت معايا في توكيل آي إف جي الإسماعيلة). وفيه سؤال تاني ليه معظم الناس اللي بتشتكي من مشكلات في العربية بعد التسليم بيكونو من اللي حاجزين بالسعر الرسمي. أنا بصراحة مسمعتش عن حد دفع أوفر برايس ولقى في العربية مشكلة. وكأن الوكلاء بتوع نيسان بنتقموا مننا عشان بنتشري بالسعر الرسمي فبيعطونا العربيات الواقعة.

وعلى فكرة أنا عندي ليكو خبر جايبة من الكونترول، أيوه من الكونترول، ما هو الكنترول دي الوقتي مش في شركة نيسان. الكنترول عند الوكيل، يعني الوكيل هو اللي بيحدد سعر العربية وهو اللي بيبيع للزباين إللي على مزاجه، اللي هيدفع أوفر برايس. الموظف إللي عند الوكيل قال لي إن نيسان بطلت تطلع عربيات لأن الدولار غلي، يعني بمعنى أصح شوف نفسك أو اضرب دماغك في الحيط.

الأخ اللي بقول اشتكي لشركة نيسان. الشركة لا بتحل ولا بتربط. وشكوتك اللي إنتا هتعملها، آخرها رقم شكوى بتخده، وشكرا على كده. الكلام ده عن تجربة. الشكوى رقم 3729 بتاريخ الأربعاء 2 يناير 2013. كلمتهم عنها يوم السبت عشان أعرف إيه للي حصل في الشكوى، الموظفة قالتلي لازم تنظر 72 ساعة عشان تتم معالجة الشكوى. والسؤول هو الاتصال بالوكيل وطلب معلومات عن سبب التأخير في التسليم ممكن ياخد أكثر من 10 دقائق. وعموما. بكرة الصبح هكلمهم وهنشوف إيه إللي هيحصل.

أنا قرفت من البلد دي

للاسف يا جماعه السبع ده فعلا مش تمام انا من المنصوره وكنت حجزت عنده الصني من سنه كده وكانت الشكل القديم وبرضه خد مني 10000 ج واستنيت حوالي 3 شهور وكنت حاجز ع اساس 92 الف وكل فتره اتصل بيه يقلي المصنع موقف الانتاج العربيه وفي الاخر اوحله الاقيه بيسلم الناس طبعا باوفر برايس واقلي من الاخر يا استاذ عايز تستلم العربيه غليت الفين جنيه اقلتله طيب مقلتليش ليه بس اقلتله اوك طيب انا عايز اللون الفيراني اقلي الموجود الاسود اقلتله لا مش عايزه اقلي طيب استني اسبوع بقي وانا اجيبلك اللون المهم استنين وهما لا اتصلوا ولا حاجه اتصلت بيهم اقلي لسه روحتلهم برضه المعرض لقيت واحد مستلم اللون الرمادي اقلتله ما اللون متوفر اهوه اقلي اصل العربيه زادت الفين كمان اقلتله لا خلهالك بقي وهات فلوسي واقلتله السمعه مش بالفلوس السمعه معامله المهم خد الفلوس وطلعت علي معرض تاني مشهور ف المنصوره مش هقول اسمه عشان محدش يفتكر اني بعمل اعلانات وحجزت ب500 ج وشهر بالظبط وجبهالي وبالسعر الرسمي واللون اللي انا عايزه بس قالي هتبقي 2011 اقلتله لا انا عايزها 2012 وفعلا غيرلي الورق وجابها 2012 الراجل اللي كان في معرض السبع اسمه ا/محمد السبع للعلم بس اخر التجربه يعني انهم المعرض ده بيسلم بس للي دافع اوفر برايس ويكون عالي كمان اما اللي حاجز ومستنيه دوره فعلا مش هيديله الا الواقع او المعيوب ومعندوش امانه في التعامل نهائي ديه عن تجربه هوه هيبقي امين معاك في العربيات اللي معلهاش طلب كتير زي الاوبل غير كده معاملته سيئه جدا وانصح االعضو اللي حاجز عنده بالمبلغ كله انه يسحب فلوسه ويقلهم مش عايزه واول مهيعمل كده هيتراجعوا عشان انا لما اقلتله عايز اسحب فلوسي اقلي طيب هتستلم بكره بس بالسعر الجديد قلتله لا شكرا انت حتي لو هتسلمني باقل من سعرها مش عايز فارجو من العضو سحب فلوسه ولو تراجع وهيسلمك تجيب معاك حد بيفهم في العربيات عشان يتاكد ان العربيه سليمه ومفيش حاجه اسمها مصاريف اداريه اقلهم هشتكي في حمايه المستهلك هيخاف ع طول وان شاء الجميع يستلم ع خير

متشكره ليكم جدا ربنا يباركلكم

انا اتصلت بالمندوب تاني النهارده و قالي محدش رد عليه لسه علي موعد إستلامي ، بصراحه انا بداءت اصعد الموضوع معاها لان صبري نفذ فقولتلوا هو مش انت الي قولتلي اجي ادفع و هاستلم و في حد اداك تصريح بانك تقولي كده و انا فعلا جيت دفعت ازاي ملاقيش عربيه اصلا ؟؟؟؟ دي مش مشكلتي الي اداك تصريح انك تقوله يجبلي عربيه من تحت الارض ان شاء الله يجبيلي واحده من المصنع بإسمي ، بصراحه ردوا شلني قالي هو انت مقولتيش كده لمدير الفرع امبارح ليه ؟ انا كنت متوقع انك هتقوليله كده ...اتصدمت من الرد الظريف و قولتله انا كنت واخده الامور ودي و مش عايزه اصعد و ممكن اصعد عادي ، قالي خلاص انا هاكلم مدير مدير الفرع أ/ طارق و هايرد عليا النهارده ، يا مسهل لما نشوف اخرتها ايه ...
أ/ hamadakotb حضرتك حصل معاك كده في فرع المعادي الي بيقولوا احسن من بتاع مصر الجديده 100 مره ربنا يستر ، لو سمحت اعرض علينا اخر التطورات و لو هتصعد انا ممكن اصعد مع حضرتك و نعمل شكوه جماعيه

المشكله بصراحه اني محتاجه العربيه جدا و لو سحبت فلوسي يبقي اكيد مش هجيب صني لاني هبقي قفلت كده ، اجيب ايه بدالها ؟؟؟

يا خبر يا جماعة دة أنا حاجز عند السبع مصر الجديدة و حاجز يوم 1/12 و لسة مكلمهم و الرجل قال كمان إسبوع هستلم عشان أبقى كملت شهر و نص :(((. و كمان كلمتهم امبارح و سألت بتسلمو ولا التسليم
واقف قال التسليم واقف عشان موضوع الدولار و بكره المفروض أكلمو عشان أعرف السعر الجديد :(((

المشاركة الأصلية كتبت بواسطة mido_mask

يا خبر يا جماعة دة أنا حاجز عند السبع مصر الجديدة و حاجز يوم 1/12 و لسة مكلمهم و الرجل قال كمان إسبوع هستلم عشان أبقى كملت شهر و نص :(((. و كمان كلمتهم امبارح و سألت بتسلمو ولا التسليم
واقف قال التسليم واقف عشان موضوع الدولار و بكره المفروض أكلمو عشان أعرف السعر الجديد :(((

حضرتك متابع مع مندوب اسمه ايه ؟

أنتوا قلقتونى خالص أنا حاجز عند السبع المعادى يوم 3/12/2012 واتصلت يوم السنت بالمندوب اسمه أ/ محمد ندى أسأله عن الإستلام قالى الأسبوع القادم هانتصل بيك والتسليم كان متأخر شوية الفترة اللى فاتت وأنا دفعت مقدم حجز 20000 جنية بس انا مطمنى إن فيه واحد جارى إستلم من عند السبع المعادى بعد 35 يوم بالضبط قالى دول ناس محترمة جداً والمندوب قالى التسليم بعد شهر ونص أو شهرين ده كلام رسمى وقالى مافيش تسليم عندنا زاد عن شهر أو شهر ونص بالكتير

ان شاء الله هنشوف ايه الاخبار بكرة مع السبع، بس اذا فضل موضوع المماطله ده هاسحب الفلوس و امرى لله و ابدأ البحث مرة اخرى.

هو المشكلة كلها فى معرض السبع ولا على مستوى المعارض كلها انا حاجز عند مودرن موتورز يوم 13/11 و ب 10000
بس هو كان قايلى من شهرين لتلاته وبالنسبة للسعر هيه هتغلا فعلا ولا دا مجرد كلام انا مبقتش فاهم حاجة
ولو حد عرف انها هيبقى ليها سعر جديد غير ياريت يقولنا الواحد بقا خلاص على اخره من البلد ديه وانا بردو هكلم الراجل واسئله ايه النظام والمفروض استلم امتى
وان شاء الله تستلمى عربيتك على خير