ارجو الافادة سخونة غريبة فى سيارتى لانسر2008

**hatemmohsen** · 08-01-2013 09:39 AM

السلام عليكم
اعزائى خبراء السيارة الجميلة لانسر بومة

حصلت معى مشكلة واتمنى ان تكون صغيرة
من كام يوم حسيت بارتفاع مؤشر الحرارة عن معدله الطبيعي على الرغم من اننا فى الشتاء
حصل معاى نفس الموضوع امبارح بالليل وقارب على الدخول الى الريد زون والمروحة اشتغلت ..
بصراحة مش عارف اي اللى ممكن يكون حصل على الرغم من انى النهاردة دورت عادى ومشيت عادى ولم ترتفع درجة الحرارة
حاجة تانى هل مروحة الموتور مرتبطة بادارة كونتكت العربية
............ وشكرا وارجو الافادة

**ahmedeg1** · 08-01-2013 09:42 AM

ممكن ثرموستات الكوعه المسئول عن دخول المياه من الرداتير الى المتور باظ و محتاج انك تغيره و ده احتمال كبير

**akmm** · 08-01-2013 09:51 AM

وكمان شوف سيير المروحه ممكن يكون تلف يعنى فقد خواصه بالتمدد او اتفرول وبكده مش بيشغل المروحه مضبوط ... وان شاء الله بسيطه .

**HaNo_ELBeh** · 08-01-2013 10:00 AM

بص حضرتك على ترومستات المروحه ممكن تكون فيها مشكلة لانة من المفروض فى حالة السخونة العالية تشتغل المروحة اوتوماتيك وممكن تكون فى مشكلة فى دوره التبريد او الكوعه بتاعت الردياتير

**MITSUKERO** · 08-01-2013 10:20 AM

زي ما الاخوة الافاضل قالو لك

ثرموستات كوعة او ثرموستات ريادياتير

طيب ده لو المياة ماكانتشي ناقصة

لو المياة ناقصة يبقي لازم كبس دورة التبريد فورا للكشف عن مكان التسريب

الكبس بيبقي بمنفاخ يدوي بيركب مكان خرطوم الفايص و بيتم النفخ بحرص للوصول لضغط معين و مكان التسريب بيتعرف فورا

ربنا يوفقك و تعرف السبب و خلي بالك علشان زي ما انت اكيد عارف السخونة ممكن تخلي جوان وش السلندر يضرب و تدخل في حوارات كتير

**hatemmohsen** · 08-01-2013 02:13 PM

شكرااا جزيلا للردود
وساخذ بكل ما عرضتوه من احتمالات
وربنا يسترها

**amoor_mod** · 09-01-2013 01:59 AM

ريح نفسك ومتسالش كتير
انا حصلت معايا فى عربيتى وعربية ابن عمى البوما

وديها لحد بتاع ريداتير يغيرلك وش الريداتير دا ليه عمر افتراضى انا مغيره عند 140000 كيلو
وده طبيعى فى اللانسر بس نصيحة الحق غيره عشان ممكن يبوظلك الموتور

**amoor_mod** · 09-01-2013 02:02 AM

بس خلى الراجل بتاع الريداتير ينضفهولك كويس اوى عشان ميضربش منك تانى
اعتقد الموضوع كله مش هيعدى ال300 جنيه خد معاك 500 احتياطى ومتزعلش دى حاجة بتحصل فى كل اللانسر
وفى احتمالية ان حساس الحرارة يكون هو المشكلة بس ده لو العربية مبتسقفش منك
لو سقفت يبقى سخنة ويبقى ده وش ريداتير
مفيش تسقيف والعربية باردة والعداد بيلعب يبقى غير العداد استيراد ب 100 جنيه وانت واقف بيركبهولك

**hatemmohsen** · 09-01-2013 11:55 AM

شكرا يا استاذ عماد

بس على فكرة انا العربية يدوب عاملة 36000
انا هكشف على ثرموستات الكوع واشوف اخباره ايه لكن تخيل اديلها يومين مسخنتش او السخونة العادية
ايه رايك هل هى حاجة عابرة ولا ايه مع العلم انى بصينها فى التوكيل كل 10000