الحمد لله ربنا وفقني
وطلعت الرخصة السعودية وعملت استبدال للرخصة المصرية
العملية دي اخدت مني 3 ايام رايح جاي ومشاوير

مش في مصر تقعد في مكتب الباشا والرخصة تجيلك بعد ربع ساعة على ماتشرب النسكافيه؟

بجد والله تعبت واثرت علي صحيا واثرت على شغلي بسبب عدم النوم لساعات كافية
اول يوم :
الحضور صباحا في اي وقت
تروح المرور تسحب نموذج الاختبار والكشف الطبي (ورقة واحدة)
وبعدين تطلع بيها على المستشفى تعمل الكشوفات والتحاليل الطبية
وبعدين ترجع تروح شركة خاصة اسمها دلة (دي مسئولة عن تقييم المتقدمين للحصول على الرخص وتقول ينفع يستبدلوا الرخصة بتاعة بلدهم ولا يدخلوا كوس تدريبي لمدة 5 ايام) هيجيلك مدرب من عندهم ويقولك اركب الحتة التويوتا الكامري موديل 2011 ويجرب سواقتك ولو نفعت يكتبلك استبدال ويوقع

ثاني يوم :
الحضور الساعة 9.30
تروح شركة دلة علشان تدخل قاعة تتعلم فيها الاشارات وكيفية الامتحات مع الفرجة على شوية فيديوهات وعظ من الحوادث
وبعدين تطلع الميدان يوريلك نظري ازاي تركن العربية او ما يسمى بالتلبيكة

ثالث يوم :
ده الاصعب لانه مطلوب منك الحضور الساعة 6.30 صباحا للاختبار
انا خارج من البيت الساعة 5 الفجر
هتروح تمتحن
هتسوق العربية لمسافة كبيرة شوية مع اتباع العلامات الارشادية والمرورواشارات المرور والدوران (الصينية) وعلامات مرسومة على الارض
وبعدين تعمل التلبيكة ولو نجحت فيها بيقولك روح على الاشارات ودي 20 سؤال لازم تحل على الاقل 15 صح وكلها على الكمبيوتر
وبعدين مبروك الرخصة


التكاليف
100 شهادة طبية
100 شركة دلة
430 رسوم الرخصة
100 ريال مواصلات لمدة 3 ايام