السلام عليكم
زي ما وعدتكم اني هعمل تقرير شامل بعد ما عملت طقم شنبر للعربية حبيت اوفي بوعدي
في الاول بشكر الاخ مصطفي prisoner و الاخ محمد الجرجاوي علي تعبهم معايا و هم فعلا اخواتي الكبار و متأخروش عني في اي حاجة
نبتدي الموضوع من الاول و بالتفاصيل المملة لاني مش عايز اي حد يحتار الحيرة اللي وقت فيها دي:
العربية بتاكل زيت و بعدين الموضوع بقي زيادة و مرة في مرة العربية بقت تطلع دخان اكتر من الاول من الشكمان و في يوم طلعت دخان فظيع و فيه بوجية فصل غيرت بوجيهات و قولت هتمشي و تاني يوم البوجية قطع فقررت اني خلاااااااص زهقت من العطلة و القرف خصوصا اني مش بعرف استغني عن العربية
المهم كلمت الاخ مصطفي فقالي انه مغير موتورة بموتور 1500 2 كامة و مبسوط منه جدا و تعالي ننزل الحرفيين نشوف و فعلا نزل معايا و لف معايا بمنتهي الاخلاص و لقينا التكلفة بالتركيب بتبديل الموتور القديم بالجديد 4500 لو هتسيب الفتيس مانيوال و 5000 جنية لو هتخلي العربية اوتوماتيك
المهم وقفنا نتناقش علي رواقة فقولتله انا بصراحة مش هقدر ادفع التكلفة دي خصوصا اليومين دول فقالي خلاص اعمل عمرة لمتورك و ريح نفسك
قولت خلاص مبدهاش بقي كلمت المتخصصون و طلعت علي هناك
وصلت فقابلتهم المهم قالولي ايه اللي حصل بالظبط قولتلتهم كذا كذا و انا اتخنقت و عايز اخلص
كشفوا علي العربية و كبسوا بنزين جامد كذا مرة فلقينا فعلا الدخان كتير فقالولي قدامك حلين يا اما تعمل عمرة يا اما نص موتور سفلي 1500 يركب علي وش السلندر بتاعك و الكربيراتير و بنرشحلك العمرة لو عايز توفر و لو انت مش بتاع جري و مش محتاج التسارع قوي (هم مش بيحبوا التعديل هم حافظين العربية اللي التوكيل منزلها و شاطرين فيها جدا غير كده لا و ده عيب فيهم)
قولتلهم انا العربية معايا مش مزعلاني في حاجة و توكل علي الله و فك اعمل عمرة
ابتدينا الفك و الصور كالتالي:
دي اول صورة بعد ما فكوا البطارية و بعض متعلقات الدبرياش
و دي صورة القنطرة بتاعة الموتور اللي بتبقي بطول الحوض من تحت و عليها قاعدتين موتور
و دي قاعدة من القاعدتين اللي علي القنطرة لقيتها مقطوعة
و هنا ابتدوا يركبوا السلسلة اللي هيرفعوا بيها الموتور و للعلم هي مش اي سلسلة هي سلسلة مخصوص لحاجة زي كده و اخرها من الناحيتين فيه مسمار معين بيقفل عليها عشان الموتور ميفلتشي منها
[IMG][/IMG]
و دي صورة الطنبورة الشمال بالصرة بعد ما فكوا الكوبلن منها و باين ان صمولة الكوبلن مش موجودة
و دي لما ابتدوا يرفعوا الموتور و دي بقي لحظة صعبة جدا علي صاحب العربية بتبقي خايف و بالنسبة للصنايعي بيبقي خايف ليكون نسي حاجة مبروطة ده غير قواعد الموتور الل فوق بتبقي عايزة تتفك براحة و هو بيرفع
[IMG][/IMG]
و ده بقي بقي بعد ما بيرفع لفوق شوية و يطمن علي كل حاجة و يفك قواعد الموتور بيبتدي ينزل الموتور لتحت العربية عشان يسحبة من تحت بدل ما يضطر يفك الكبوت
[IMG][/IMG]
و هنا ساعة ما الموتور اتفك من السلسلة و بقي علي الارض علي حتت الخشب اللي بيحطوها عشان يحافظوا علي كارتيرة الزيت
[IMG][/IMG]
[IMG][/IMG]
[IMG][/IMG]
و ده منظر الموتور و هو برة و السهم بيشاور علي الكوبلن اليمين
[IMG][/IMG]
و ده منظر الحوض منغير موتور
[IMG][/IMG]
و هنا بيفك الفتيس من الموتور
[IMG][/IMG]
و هنا الفتيس انفصل عن الموتور و الديسك باين في اليمين
[IMG][/IMG]
و ده منظر الفتيس لوحدة بعد الفك و المنظر ده اختلف تماما بعد ما الفتيس اتغسل و اللي غسلة كل ما يشوفني لحد انهردة يقولي حرام عليك الفتيس بتاعك بهدلني اخد نص يوم غسيل
[IMG][/IMG]
و ده منظر التاكاهات بعد ما شالوا غطاء التكاهات اللي بيبقي فوق اللي عليه كلمة ميتسوبيشي :
[IMG][/IMG]
و دي بقي من اهم الصور و الاسهم بتشاور علي :
طرمبة المياة اول سهم علي اليمين تحت
الاربع اسهم اللي جنب بعض دول بيشاوروا علي الشمايز و البساتم و الحمد لله طلعوا سلام و ده السبب اني عملت طقم شنبر مش عمرة كاملة
طيب يعني ايه طلعوا سلام : يعني الشمايز ناعمة مفيهاش تسليخ او خشانه و بالنسبة للبساتم نفس الكلام ده غير انها مش بتلق علي البييل و طبعا كل حاجت تم قياسها بالبوكوليس بدقة و براحة جدا لحد ما اطمنت
السهم اللي فوق علي الشمال بيشاور علي ماسورة المياة و دي كنت مغيرها من فترة قريبة بسبب مياة الحنفية
السهم اللي تحت في الوسط بيشاور علي حامل المنافولد
[IMG][/IMG]
نيجي بقي للنصف العلوي من الموتور و هو وش السلندر و ده كنت مرعوب منه ليطلع بايظ و ده لاني كنت بحط مياة حنفية في فترة و بوظتلي حاجات كتير فخفت تكوت اكلت وش السلندر او مجاري المياة الداخلية جواه و الحمد لله طلع التأكل بسيط جدا
طبعا بستغل الفرصة دي و بحذر للمرة المليون من مياة الحنفية و تأثيرها علي كل حاجة في العربية و دورة المياة و وش السلندر و الموتور و الريادياتير و طبب المياة اللي في الموتور و قربة المياة كل حاجة مياة الحنفية بتبهدلها والله العظيم عن تجربة
دي اول صورة و السهمين اللي فوق بيشاوروا علي تأثر مياة الحنفية علي مجاري المياة في وش السلندر و السهم اللي تحت بيشاور علي الجزء اللي بيبقي فوق البساتم و هو رأس البوجية و الصبابات و غطاء غرفة الاحتراق
[IMG][/IMG]
و دي صورة قريبة شوية لمكان التأكل البسيط و طبعا ظاهر اثار مياة الحنفية من صدأ و املاح علي غرفة التبريد:
[IMG][/IMG]
و دي صورة كمان للتأكل و بكرر التأكل كان بسيط و ده لاني استخدمت مياة الحنفية حوالي سنه او اقل فتخيل بقي لو فضلت اكتر من كده !!!
[IMG][/IMG]
و دي صورة اقرب
[IMG][/IMG]
و دي صورة للجزء السفلي من الموتور و مجاري المياة المقابلة للجزء العلوي و الاسهم بتشاور عليها و علي التأثير و فيه سهم بيشاور علي الشمايز
[IMG][/IMG]
و دي صورة كارتيرة الزيت بعد ما اتفكت:
[IMG][/IMG]
و دي صورة من تحت خالص تحت كارتيرة الزيت و الاسهم بتشاور علي السبايك و مصفاة الزيت اللي بتبقي جوة الكرتيرة
و دي صورة كمان للموتور من تحت و السهم بيشاور علي مكان فلتر الزيت
[IMG][/IMG]
دي بقي لما لقينا الشمايز و البساتم سلام فلازم قبل ما يفك البساتم يرقمهم لانهم هيركبوا تاني فيركب كل واحد مكانة علشان هو بيبقي مطبع مع الشميز فمفيش حاجة تبوظ و الترقيم بيبقي زي بالظبط طريقة ترقيم طفاية الحريق في المرور بالدق علي عمود اخرة رقم علي رأس البستم
[IMG][/IMG]
و دي بقي صورة البستم بعد ما اتفك
اول سهم علي اليمين ده بيشاور علي السبيكة
السهم اللي في الوسط بيشاور علي البييل
الاسهم اللي في الشمال اتنين بيشاوروا علي الشنابر و هي بتبقي حلقات دائرية حوالين البستم و فيه سهم بيشاور علي رأس البستم
و دي صورة اويل سيل بيبقي تحت الكاتينة تحت الشداد كمان و كان مبهدل الدنيا زيت و بوظلي سير الكاتينة
و دي بقي صورة طرمبة الزيت و محدش يستغرب من حجمها !!!
[IMG][/IMG]
طبعا بعد ما كل الحاجات دي اتغسلت و رجعت جديدة و تم تغيير كل الاويل سيلات البايظة و الجوانات و كاوتش الصبابات و كل حاجة العربية الحمد لله رجعت جديدة تماما بفضل الله ثم الناس المحترمين اللي اشتغلوا في العربية
مبقاش فيه دخان مبقاش الزيت ينقص مبقاش فيه وجع قلب و قلق و انا ماشي
التكلفة هحطها في رد منفصل و هقول التكلفة بالتفصيل الممل بأذن الله انا بس قولت انزل التقرير بدل ما يضيع لأي سبب لاني سايب ورقة الحساب في البيت
و طبعا انا تحت امركم في اي استفسار و ده مش جميل لا ده رد جميل المنتدي المحترم اللي اتعلمت منه حاجات كتير
والله اعلي و اعلم
المفضلات