مشكلة فتيس الايفو السابقة و طقم الدبرياج شكله كده راح :(
السلام عليكم
انا كنت كتبت موضوع في شهر اربعة الي فات على مشكلة كانت في الفتيس:
اقتباس:
المشاركة الأصلية كتبت بواسطة osamy
السلام عليكم ورحمة الله
اولا انا عامل بتاع 32 الف وعربيتي اوتو مش مانوال
وحصلتلي حاجه غريبة النهارده
وانا ماشي عادي و العربيه على الاوتوماتيك الاقيها مرة وحده راحت جايبه N (ومن غير اي رساله في التابلوه- يعني تقريبا غير موضوع البرافو ده
http://www.nilemotors.net/Nile/276909-dualogic.html)
حصلتلي بتاع 6 مرات اول ما حصلت اتكررت 3 مرات في اقل من 5 دقائق وبعد كده كل 10 دقائق مره مثلا
كلمت طواريء اوماترا قالولي حاجه من التلاته:
1- يا اما سنسور كده مكانه في المرايا بيقيس درجه حرارة مش عارف ايه كده يكون معلق وعامل مشكله مع الكمبيوتر (بصراحه ما فهمتش)
2-يا اما طقم الدبرياج !!!! اييييييييي :majd(4):
قولتله ازاي دي عامله 32 الف بس قالي في عربيسات جاتلي من 15 و 20 الف علشان مابيسقوش صح وما بيحطوش العربيه على N في الزحمة قولتله انا بسوق صح وبحطها على ال N قالي وارد برضه يكون هوه
3- يا اما في سنسور او زرار -مش فاكر- تحت الفرامل ممكن يكون معلق
قالي لازم كده كده تجيبها نحطها على الكمبيوتر
فقولتله انا خايف يكون طقم دبرياج قالي ربنا يسهل مادام ماطلعتش رساله يبقى ان شاء الله لا بس مش اكيد
وقالي جرب تسوق مانوال
جربت لاقيتها ماشيه زي الفل -بس ما جربتش كتير اوي-
حد عنده فكره :rfds:
وده الموضوع
http://www.nilemotors.net/Nile/283949-a.html
والمشكله كانت اتحلت بأنه ملالي الفرك علشان كانت اتاكلت من نشفان الاحتكاك الي كان بيحصل فيها
المهم انا دلوقتي عامل 49000
ولاقيت من شهر كده الحوار ده حصل تاني بس بنسبة اقل بكتير يعني مرة كل 3 او 4 ايام
فكبرت دماغي
وجيت بقى من اسبوع او اكتر حاجة تانيه بقت بتحصل الغيارات فيها لاج وبحس انها بتلقط بصعوبه بالذات وانا على نقلات صغيره الاول والتاني
يعني مثلا ابقى ماشي عادي وافرمل والعربيه تقف واجي ادوس بنزين تاني علشان اطلع الاقي العربيه زي ماتكون مهنجة وانه لسه ما نزلش من التاني للاول علشان اطلع يعني تفضل كام ثانيه كده متنحه !!!
مثال تاني بيحصلي:
اكون واقف في الزحمة ومدي N اجي علشان اتحرك اجيب الاول ييجي بعد كام ثانيه
كمان صوت الغيارات احيانا كتير على الاول والتاني عالي واحياننا بيعلى اوي بس برضه مش على طول
من يومين تلاته بقى جيت اشغلها وزي ماتكون قفشت كده ونطت وقالي Gear box unavailable
بطلتها وشغلتها تاني عصلجت برضه
بطلتها وشغلتها تاني براحة اشتغلت ومشيت تمام لحد البيت
رحت التوكيل بعديها وقالولي طقم دبرياج ومش هينفع الفورك تتملي تاني وكده لازم طقم كامل بالفوركتين الداخلية والخارجية والزيت قولته الزيت انا لسه مغيره في ال40000(مش احنا بنغير الزيت في التوكيل عند ال40000 ولا هوه لازم الزيت ينزل علشان الطقم يتركب؟)
المهم بكام يا عم الحوار ده قالي الطقم بالفوركتين بالزيت بالمصنعية بالضرائب
في حدود 3200 جنية :hitwall3:
والتفاصيل تقريبا كالتالي "بس بدون ضرائب":
طقم دبرياج 1500
فوركتين داخلي وخارجي 500 واحدة ب 200 والتانية ب 300
زيت ومصنعية الباقي !!!!!!!!!!!!!!!!!!!
قولتله طب لو عملتها برة هخرج برة الضمان (ضماني لحد شهر 11 الي جاي) قالي لأ بس مافيش حد في مصر بيعرف يعملها
قالي في واحد قبلك حاول يعملها برة ماعرفش وفي الاخر جالنا ودفع لبرة ودفع لهنا
قولتله ليه يعني الحوار صعب اوي كده قالي المشكلة ان فيه برمجة وحوارات كتير علشان الفتيس يشتغل بعد ماتركب والحوار ده وماحدش عنده اصلا الجهاز الي بيعمل كده واحنا شارينة ب 80000 جنية
"مع العلم ان في واحد صاحبي قالي ان صاحبة حاول يعملها برة وماعرفش ورجع للتوكيل بس ماعرفش هوه راح لحد كويس ولا لأ"
كلمت الكيلاني اسأل على الاسعار قالي
طقم الدبرياج ب 700
والفوركتين واحدة ب 100 وواحدة ب 185
يعني اقل من 1000 جنية يعني بالمصنعية برة لو شطحت اوي هيكون
اقل من النص عند اوماترا :drugsneeded:
بس للعلم انا سألته الفوركتين ايطالي
قالي واحدة ايطالي والتانية تركي
قولتله والدبرياج قالي بتاع فيات قولته ايطالي يعني قالي بتاع فيت يا بيه مافهمتش بقى ايه قصده ولا بيحور ولا سوء تفاهم ولا ايه
وكلمت يوكو ربنا يكرمه اداني نمرة واحد في التجمع اسمه كريم
قالي عادي هعملهالك وفكك من كلام التوكيل انه مفيش حد غيرهم في مصر والحواردة
قلتله بكام قالي استنى اشوف قطع الغيار موجودة ولا لأ وبكام واكلمك وانا مستني اهوه هيقولي ايه
المهم انا عاوز رأيكوا ونصيحتكوا:
1-اولا هوه كد فعلا جابت طقم دبرياج ومحتاج اغير كل ده؟
2- اعملوا في التوكيل اضمن ولا برة ؟
3- استنى واستحمل اللاج والغيارات وامشي بيها لحد ما استهلكة كله ولا هتأثر في حاجة تاني غير الكلام ده وتعملي مشكلة اكبر؟
4-الفورك التركي كويسة ولا لأ وهل هوه فعلا بتاع الايفو ولا ممكن يديني بتاع الجراند بونتو ؟ وازاي اتأكد من ده؟
