الموضوع: تعالو نفكر مع بعض نطورها "نبدأ بالاداره العامه للمرور"

المشاركة الأصلية كتبت بواسطة algazar2

رخصة السواقة بقى عشان تطلع يبقى فى اول حاجة مكان مخصص للتدريب جوه المرور او رخصة مؤقته للتعليم عشان الى بيتعلم يبقى مصرح ليه بكده و يبقى المشى بيها فى اوقات محدده من اليوم و فى شوارع محدده و يبقى مع شخص معاه رخصه سارية و سنه ميقلش عن 25 سنة مثلا
و يبقى فى مكان مخصص للاختبارات و يبقى فيه كل الاختبارات تقريبا المشى عادى و ازاى تطلع كوبرى مثلا و اختبار لميكانيكا السياره و كيفيه تغيير الاطار و كيفيه الركنه ( للستات دول بامانة )
لو الاجراء الى هيتعمل مش محتاج ان الشخص يروح للمرور يبقى يتعمل عن طريق الانترنت ( كان موجود بس اتلغى ) زى تجديد الرخصة مثلا - حتى الفحص يبقى كل حاجة على الانترنت و اروح افحص العربيه تمام اخد الرخصة العربيه فيها حاجة غلط يبقى اصلحها و ارجع افحص تانى
طبعا ان كل حاجة انترنت دى هتوفر على الدوله كتير - مصاريف موظفين و اوراق و عطله ناس عن اشغالهم - يعنى ميجيش يقولى انى عندى عجز فى المرتبات مثلا

اهم حاجة بقى يبقى الفحص ده بجد يعنى العربيه دى تتفحص كل حاجة فيها مش صاج و فاميه و اقلب العربيه لا زوايا و حاله كاوتش و حاله عفشه و ميكانيكا و كهرباء - ممكن شاسيه كمان - بس فى الحالة دى هيبقى الموضوع كبير و مكلف شويه :)

كل ده بالنسبه للملاكى و السيارات المتوسطة سواقين العربيات الكبيره و المقطورة يبقى ليهم اختبارات خاصه و اختبارات طبية و اختبارات سلامه عقليه - ميبقوش مجانين و يتسببوا فى حوادث تموت العشرات -
و برضه اختبارات العربيات دى تبقى اختبارات مشدده و على فترات متقاربه مش كل 3 سنين زى الملاكى لا كل 6 شهور او سنه بالكتير يتعمل اختبار و الزام على العربيات انها تعمل الصيانات بتاعتها

بجد شكرا على مجهودك وفعلا افكار محترمه جدا
حضرتك عارف فى حل اكيد لموضوع الفحص الشامل ده وده شوفته بره بيكون فى زى مراكز خدمه متخصصه بتصدر شهادات معتمده لاداره المرور لفحص العربيات ممكن نبدلها بتوكيلات العربيات فى مصر فيتم الاتفاق مع التوكيل لكل عربيه ياخد رسوم معينه من كل مواطن نظير الفحص ويطلع شهاده معتمده منها للمرور وتعتمد من هناك وبكده على الاقل حنوفر على المواطن هده ووقوف فى المرور للفحص وحيتعامل انضف فى التوكيلات ونمنع ان يكون فى رشوه . وطبعا التوكيلات حتخاف على سمعتها ومش حتضرب شهادات للعربيات .

وموضوع سواقين النقل والنقل الثقيل لازم يتشدد على اختباراتهم وخصوصا المخدرات وقدراتهم على التركيز

المشاركة الأصلية كتبت بواسطة ahmed_adham

مش عايز أحبطك بس أول خطوه أصلا صعبه قوي. انت عايز المرور يبقى فيه باركينج للعربيات اللي جايه تترخص وهما أصلا بيعملو اختبارات رخصه السواقه في الشارع في اي حته فاضيه جنب المرور؟

لا خالص مش موضوع احباط مالمفروض نلاقي بديل للاختبار ده والاستاذ الجزار حل الموضوع فى المشاركه اللى تحت وكويس اننا نعرف النقد او القصور حيكون فين لو حبينا نطور علشان نلاقى حلول للمشاكل قبل متحصل

المشاركة الأصلية كتبت بواسطة algazar2

اكيد الكلام ده مش على المرور الى موجود حاليا ده اماكن الاختبار بتبقى تحت اى كوبرى :)

الكلام ده المفروض يتطبق على اطراف المدن و فى المدن الجديدة يبقى المكان متجهز لكده المدينة دى متخططه على انها هيبقى فيها كام الف نسمة و شوارعها هتشيل عربيات قد ايه و الناس الى هيبقى معاها عربيات فيها هيبقوا اد ايه و كل الكلام ده المفروض انه بيتعمل فى الدراسات التخطيطية للمدن الجديدة من حيث المدينة دى توجهها ايه و لمين يعنى زى مدينتى كده متوجهه للطبقة العليا و الفوق متوسطة يبقى معروف ان الاسره فيها مثلا 4 افراد معاهم على الاقل 2-3 عربيات

الشروق مثلا متوجهه للطبقة الفوق متوسطه و المتوسطة معروف ان متوسط الاسره 4-5 افراد و بيبقى معاهم عربيه او 2 و هكذا فالمفروض يبقى متخطط لاداره المرور فى المدن الجديدة اماكن للجراجات

و الحاليه تتنقل لاطراف المدن و مساحات الارض مفيش عندنا اكتر منها

96.5 % من مساحة مصر فاضيه اساسا مش مستخدمة فالمفروض ان المساحات دى يبقى توجه الدولة لتخطيطها صح و منقعدش نحاول نصلح فى الى بوظناه فى ال 3.5 % الى احنا قاعدين فيهم دول لان دول استخدامهم الصح فى الزراعه مش فى الاسكان

بصراحه فعلا كلامك محترم وحلولك واقعيه
احيك:018a1d~146:

المشاركة الأصلية كتبت بواسطة algazar2

ربنا يخليك يا باشا و دى افكار و يارب تتنفذ عشان البلد دى مش هتتقدم غير بالمصريين

و انا مش معاك يا باشا ان التوكيلات هيه الى تعمل الموضوع ده
الموضوع ده يبقى ورش ماشى بس تابعه لاداره المرور و يبقى الحساب فيه على حسب حاله العربية عشان الى يروح يكشف يبقى عربيته تمام عشان ميدفعش اكتر فى الكشف و الفلوس الى الورش دى هتدخلها تروح لتطوير المرور و ادارات المرور و خدمه المواطن احسن ما تبقى داخله جيب التوكيل و صاحب التوكيل و خاربه بيت المواطن :)

عارف حضرتك هى بره بتكون فى ورش معتمده فعلا بس انا قلت التوكيلات على اساس ان فى مصر ممكن تكون الرقابه على الورش دى منعا للرشوه صعبه خصوصا علشان تحقق انتشار ليها حيبقى عندك عدد ورش معتمده كتير بس هو سواء ورش خارجيه او توكيلات المهم ان يكون الفحص الشامل خارج المرور علشان يكون افضل وكضمان لمستوى العربيات اللى بتمشى فى الشارع كحاله مش موديل .

يبقى ممكن نلخص اللى اتقال فى
1-نعمل بارك محترم ومخصص فيه مكان لكل عربيه واللى يخالف يتغرم .
2-نلغى الطوابير ونتعامل بشكل محترم بوجود استراحه وشخص مسؤل عن توزيع المواطنين حسب حاجاتهم اول لما يدخلوا ونطبق نظام الرقم زى البنوك .
3-نظام مراقبه للمكان بالكامل بالكاميرات .
4-وجود مكان خارج المرور للاستعلامات علشان منعطلش المواطن ومكان للشكاوى علشان اى موظف يتجاوز يقدر المواطن يبلغ وياخد حقه.
5-يكون عدد الموظفين مناسب حسب التوزيع الجغرافى وعدد السكان
6- ممكن نفعل موضوع الحجز من على النت بحيث يكون فى موظف مختص للتعامل مع المواطنين دول بعيدا عن الموظفين العاديين كاستثناء
7-اختبار النظرى يتم بضوابط مع تقليل التعامل البشري منعا للرشوه .
8-اختبار العملى يتم تطويره.
9-الكشف الدورى على سائقين النقل والنقل الثقيل .
10-ان فحص العربيات يتم خارج المرور من مراكز خدمه معتمده من اداره المرور او من توكيلات العربيات ويكون الفحص شامل لكل جزء فى العربيه.
: