1- ألف مبروك العربية
2- الريحة اللي طالعة دي عادية جداً وطبيعية مافيهاش ريحة شياط ولا حاجة , بتحسي ان العربية محتاجة "تستحمى" وناقصها شوية نضافة !! (ده الشعور اللي المفروض تحسيه لما تشمي الريحة الغريبة دي) ...هاتفضل معاكي كدة لحد ألفين كيلو ولا حاجة ان شاء الله , وعادي جداً
3- مانتيش محتاجة تبصي على مروحة الرادياتير لأن الوضع مختلف عن الـ 128, اللي كانت بتهوي على روحها ودايماً حرانة :) ... العربية تبريدها أصلاً بالمية الخضرا مش بمية من الحنفية مع مروحة بتشتغل بمزاجها.
4- أهم الأصوات العادية :
- صوت الرمل والطوب والزلط لما يخبطوا في بيت الكاوتش من تحت علشان هو عالصاج على طول
- صوت تكة بسيطة جداً لو انتي واقفة بالعربية ودستي على الفرامل في حتة هادية
- صوت "فتح محبس هواء" خفيف بيطلع مرة واحدة لو كنتي واقفة في مكان هادي وشغلتي كومبريسور التكييف بتاع العربية (مش مروحة العربية ... لأ لمبة زرار التكييف كانت منورة وكانت الترموستات عالبارد)
- لو مدورة العربية وواقفة لمدة طويلة هاتسمعي كل كام دقيقة صوت تكة جاي من تحتك وقدام الموتور , دي فرامل الـ آي بي إس بتعمل اختبار روتيني طول مانتي واقفة.
5- الأصوات اللي مش عادية:
- تزييق شديد في الفرامل زي صوت فرملة المقطورة (روحي التوكيل وخليكي مصرة يفكوا الكاوتش ويصنفروا التيل والطنابير وينضفوهم بالهواء )
- صوت تزييق في المساعدين (بالذات الخلفيين) عند أي حركة كبيرة شوية.
- أي صوت اهتزاز أو احتكاك الزجاج بالباب (زي أوتوبيسات النقل العام) , ساعتها هايكون فيه مشكلة بسيطة في عزل الزجاج الأمامي أو الخلفي , وبإذن الله مش هاتلاقيها (لأن العربية لو كانت كدة هاتسرب مية وهاتفشل في اختبار تحمل المياه في المصنع ) غير نادراً وتبقى حصلت عند الموزع
6- الفيتيس الأوتوماتيك:
رمز الـ P هو اختصار كلمة Parking , حضرتك تجيبيه لما تحبي تركني وتوقفي العربية تماماً , ومش هايخرج المفتاح من الكونتاكت إلا لو جبتي الفيتيس عليه
رمز الـ R اختصار كلمة Reverse, وده غني عن التعريف , ده المارشدير
رمز الـ N, اختصار كلمة Neutral, وده هو "المور" بالبلدي , أو التعشيقة الحرة .
رمز الـ D وبالقطع هو اختصار كلمة Drive وده تجيبيه وتتوكلي على الله تفضلي سايقة لحد ماتبطلي سواقة ! :)
النقلة 1 أو 2 دي للعزوم المختلفة للعربية , مطالع شديدة الوعورة أو مش عايزة العربية تزود عن سرعة معينة لمسافة قصيرة, النقلة الأولى أقصاها سرعة 20 والتانية أقصاها 40 علشان الحفاظ على المحرك, وكدة كدة أي نقلة المفروض ماتزودش عن 3000 لفة محرك في العداد الخاص بيه , وإلا صوت العربية هايعلى وده معناه ان النقلة كدة مش مناسبة للسرعة الحالية. عموماً طالما طرقك عادية مانتيش محتاجة للنقلتين دول تماماً بإذن الله.
نيجي للاستفسار الخاص بتاع لما تقفي في إشارة , المفروض ماتفضليش واقفة على نقلة الـ D أكتر من 20 ثانية توقف علشان الحفاظ على موتور العربية من الإجهاد , لأن أكيد لاحظتي ان النقلة دي بتخلي العربية منطلقة من نفسها على سرعة منخفضة , واستمرارك في الوقوف ماهو إلا "كبح جماح" للموتور , وده لو استمر لفترة طويلة هايعرض الموتور للإجهاد ومش مستحب
علشان كدة بانصح حضرتك في الإشارات والتوقف المؤقت اللي مش هايستمر كتير تجيبي نقلة الـ N, والإشارات الديجيتال هاتريحك في الحكاية دي , يعني لو لقيتي فاضل اكتر من 20 ثانية توقف هاتي الإن , لو اقل من كدة وفري وخليكي زي مانتي , لأن الناس اللي غاوية تنقل كل شوية الفيتيس الأوتوماتيك (اللي هو معمول أصلاً علشان تقليل التدخل البشري للنقل) بيقصروا عمره بالطريقة دي
ولزم التنويه ان تحريك عصاية الفيتيس من D إلى N مش محتاج ان حضرتك تضغطي على زرار الفيتيس, لكن بالطبع حضرتك محتاجة تضغطي على الزرار علشان تعملي العكس , وحضرتك كمان هاتلاقي تفصيلة امتى تنقلي من غير ضغطة أو بضغطة في الكتالوج اللي جاي مع العربية , اقوللك على حاجة؟ ريحي بالك واضغطي في جميع تحريكاتك للفيتيس , وعمرها ماهاتخسر :)
فيه زرار اسمه OverDrive في عصاية الفيتيس , وده باختصار هو انه يقفل النقلة الرابعة , ويخلي أقصى نقلة للفيتيس هي التالت , وده بينفع لو لاقدر الله وراكي حد ناوي الشر , أو لو بتحاولي التخطي السريع, لما تدوسي عليه هاتنور لمبة في التابلوه بتقول OverDrive OFF , يعني الغيار الرابع مقفول وآخرنا التالت , وده كل عمايله هو زيادة في معدل التسارع وانتي ماشية على سرعة من 60 إلى 120 , أقل من كدة هاتكون العربية لسة ماجابتش التالت ومش هاتحس بحاجة , وأكتر من كدة هاتكون العربية عدت سرعة الغيار التالت وصوت الموتور هايعلى عالفاضي وكذلك استهلاك البنزين , ولو دخل عداد لفات المحرك على أكتر من 4000 لمدة طويلة فده غلط كبير على المحرك
بالمناسبة , حضرتك المفروض ماتزوديش عن 3000 لفة محرك لحد ماتعملي صيانة الألف كيلومتر ان شاء الله وده لضمان الحفاظ على الأجزاء المعدنية للموتور اللي لسة بتطبع على بعضها في الاحتكاك , الموتور مش محتاج "تليين" بالمعنى المصري القديم قد ماهو محتاج "قيادة هادئة" في بداية استخدام العربية الجديدة
وبالمناسبة كمان , لو حضرتك كنتي مضطرة تركني وتقفلي على حد راكن , المفروض تخلي العربية قابلة للتحريك وان حد يقدر يزقها , حضرتك هاتوقفي العربية على الـ P علشان تعرفي تبطليها وتخرجي المفتاح , بعد كدة هاتلاقي زرار تحت الفيتيس عاليمين مكتوب عليه Shift_Lock , حضرتك تدوسي عليه وتحركي الفيتيس يبقى على الـ N, ساعتها الراجل اللي راكن مش هايزعل منك :)
وربنا يباركلك فيها ويرزقك خيرها ويكفيكي شرها.
تحياتي
المفضلات