سؤال بخصوص فنادق مكة والمدينة للعمرة

**احمد المصرى** · 13-01-2013 07:49 AM

المشاركة الأصلية كتبت بواسطة mahmoud nagieb

شكرا ليك وربنا يكرمك يارب

وياريت لو فيه نصائح مهمة حضرتك تقولهالى

عمره مقبوله ان شاء الله

خد معاك دواء بطن دواء برد دواء اسهال ولو فى اى ادويه خاصه بيك خدها معاك من هنا

خد معاك اكل تونه علب جيبه علب فول .... انت طبعا غالبا نازل بافطار صح ولا بدون

والمطاعم هناك كتير متقلقش الوجبه من 13 الى 17 ريال

واحرص على الصلاه فى الحرم باستمرار وتذكر

لصلاة في المسجد النبوي وساحاته تعادل ألف صلاة فيما سواه الصلاة في المسجد الحرام بمئة الف صلاه فيما سواه عن أنس رضي الله عنه أن النبي صلى الله عليه وسلم قال: من صلى الفجر في جماعة، ثم قعد يذكر الله تعالى حتى تطلع الشمس، ثم صلى ركعتين، كانت له كأجر حجة وعمرة تامة تامة تامة . درجه الحراره فى المدينه المنوره 19 وفى مكه المكرمه 29 لا تنسى ان تجلب معك اثناء رحله العمره :- 1 الدواء الخاص بالمعتمر وخاصه الادويه المستديمه + ادويه للبرد + ادويه للبطن 2 ملعقه للوجبات + سكينه + ملعقه صغيره + كوب + طبق 3 فوطه خاصه بكل معتمر 4 مسحوق للغسيل 5 عدد 2 صابونه وش 6 علبه مناديل ورقيه كبيره 7 مستلزمات المشروبات الساخنه

**ahmedkhairy** · 13-01-2013 10:12 AM

تروح وترجع بالسلامة
وربنا يكتبلنا الحج هذا العام اميييييين
بالنسبة للفنادق فإنها امام الحرمين تماما
لا تنسى زيارة قبر الرسول ( صلى الله عليه وسلم )
لاتنسى تصلى فى الروضة فى الحرم النبوى بالمدينة
ننسالكم الدعاء

**Ahmed_selmy** · 13-01-2013 10:46 AM

متابع لانى بردوا ان شاء الله طالع عمره المولد, وياريت حد يقولى اخد معايا فلوس فى حدود كام وهل هما بيحولوا مصرى هناك ولا لا؟

**abo_anas** · 13-01-2013 01:26 PM

المشاركة الأصلية كتبت بواسطة elhelwany188

السلام عليكم ورحمة الله وبركاته ...
عمرة مقبوله ان شاء الله ...
الاخ احمد المصرى جزاه الله خير قال لك كل حاجة تاخذها معاك ...
نصيحتى ليكى يااخى .....
اولا : متنساش اول دعوة ليك لما تشوف الكعبة مقبوله ان شاء الله فكر فيها وجهزها كويس وفى ناس بتقول (يارب ارضى عنى) .....
ثانيا : انت رايح تعمل عمره للله وحط ده فى دماغك ده ونفسك ربنا يتقبلها هتلاقى حاجات تعكنن عليك ولازم الشيطان يبوظ عليك العمرة تغاضى عن اى حاجة او اى اساءة او اى موقف بايخ يقبلك ....
ثالثا : ادعى ربنا يكتبلك الحج ان شاء الله ....
رابعا : اى حاجة ممكن تتعوض لما ترجع باذن الله الا الجلوس والصلاة فى الحرم المكى او المسجد النبوى نصيحتى ليك صلى كل الصلوات فيهما واجلس ومتع بصرك منهما ....
خامسا : حاول صيام الاثنين والخميس وانت هناك هيبقى متعب شوية بس حاول ....

اوجزت فانجزت الله يفتح عليك بصراحه
بس على فكره الصيام فى مكه والمدينه ممتع واظن فى الجو ده مش هيكون فيه اى تعب

**mesaharaty** · 13-01-2013 01:57 PM

أولا عمرة مقبولة بإذن الله ولا تنسانا من الدعاء
ثانيا هاحاول أفيد حضرتك ببعض الحاجات اللى ممكن تساعدك هناك :
طبعا الأدوية كما ذكر الزملاء الأفاضل أهم حاجة وأنا أحبذ إن تخصص شنطة للأدوية (هاندباج مثلا) تكون منفصلة عن شنطة الملابس وتتشال لوحدها وتطلع بيها الطيارة تحسبا - لا قدر الله - لأى شىء مش معمول حسابه .وممكن تحط فى الشنطة الصغيرة كمان بعض البسكويت وعلب العصير الصغيرة لإستعمال السكة والمطار وأثناء الإنتقال بعد الوصول للمطار بالسعودية .
الأدوات اللازمة وممكن تعكنن عليك لو نسيت منها حاجة :
طبق - كوب - كاتل لعمل المشروبات الساخنة - ملح - ليمون - كريم لتشقق الكعبين وكريم التسلخات - لو مش بتحب العيش الشامى خد معاك شوية بلدى - معجون أسنان وفرشاة - لازم تعرف الرحلة بدايتها مكة ولا مدينة ولو كانت بدايتها مكة ممكن حضرتك تلبس لبس الإحرام فى البيت وتنزل بيه أو تغير ملابسك فى مطار القاهرة (فى الجو الحالى يفضل تغيير الملابس فى المطار علشان البرد الجامد) - حاول تلبس شراب قطنى وانت ماشى فى أى حتة علشان يحميك شوية من تشققات الكعبين (لو حضرتك حتعمل عمرتك الأول يبقى لا تلبس الشراب إلا بعد الإنتهاء من مناسك العمرة والتحلل )- وخللى بالك حضرتك أثناء الطواف من الكراسى المتحركة اللى بتطوف بجوارك منعا للإصابة والجروج لا قدر الله .
أنا مش عاوز أذكر لحضرتك كل أنواع الطعام اللى ممكن تاخدها من هنا لأن كل حاجة موجودة هناك وأحسن .
حافظ جدا على الصلوات فى الحرم (أى فرض حيروح عليك حتندم عليه جدا بعد عودتك بالسلامة ودى نصيحة)
احرص على فلوسك وأوراقك الهامة وخصوصا عند أماكن الوضوء العامة ودورات المياه لأن السرقات كتير هناك وشفنا كتير منها .
احرص على ذكر الله والدعاء بخشوع ولا تنسى مصر من الدعاء بإذن الله .
إشرب من ماء زمزم كثيرا جدا لأنك تعلم ما فى ماء زمزم من بركة وخير .
عند الإنتهاء من العمرة وللتحلل من الإحرام ستتوجه إلى الحلاق وياريت تخليه يشيل الشعر كله بالموس (زيرو) اتباعا للسنة والنصيحة هى التأكد من أن الموس مفتوح قدامك وماحدش استعمله غيرك (عندهم أمواس بتبقى استعمال لمرة واحدة)

ربنا يوفقك ولما ترجع بالسلامة تبقى تعمل لنا تقرير مفصل عن الرحلة المباركة

**youssef_u** · 13-01-2013 11:02 PM

دايما ادخل دورة المياه في الفندق قبل ما تنزل العمره عشان دورات المياه بعيده عن الكعبه و هتحتاج مشي كتييييير جدا و خلي بالك ممنوع دخول الماكولات و اجهزة الكمبيوتر داخل الحرم ( الموبايلات و الكاميرات عادي ) و لما تلبس لبس الاحرام ان شاء الله ممنوع تلبس اي حاجه متخيطه او فيها خياطه و ممنوع تقص ضوافر او تقطع جلد و ممنوع تحط برفان ( حط قبل الاحرام و حط مزيل عرق كتير )

و متنساش مناسك زي صلاة ركعتين خلف مقام ابراهيم بعد الطواف
الاكل هناك امره سهل بس ابعد عن الشاورما عشان مش بتكون نضيفه ممكن تقضيها سندوتشات مشاوي و كده

و خد معاك دواء للاسهال و للمغص ضروري جدا جدا جدا

بالنسبه للمدينه خلي بالك عشان بيبقا فيه اوقات خاصه لزيارة الروضه للنساء و الروضه لون السجاد بتاعها بيبقا مختلف عن لون سجاد باقي المسجد ( الروضه بتبقا اخضر و باقي المسجد احمر )

حاول تفضل داخل المسجد من المغرب للعشاء وبعد صلاة العشاء اخرج اتسوق من جنب الحرم سواء مكه او المدينه بيبقا فيه حجات معقوله و رخيصه

و صلاة الجمعه انزل بدري يعني على ١٠ ونص او ١١ بالكتير عشان بتبقا زحمه

و حاول تشتري الحزام الابيض بتاع الاحرام عشان بيبقا فيه شنطه تحط فيها ورقك و موبايلات و باقي حجاتك الخاصه

وهناك ممكن لو هتجيب خط هات stc او سوا ده حلو و شبكته معقوله و اسعار المكلمات لمصر معقوله بردو

و بالنسبه للفلوس ١٠٠٠ ريال كفايه جدا لو هتشتري حجات و كده

لما توصل مطار جده ان شاء الله هتقف على شباك المعتمرين لانه هياخد بصمه و يصورك تقريبا

من جده لمكه ٨٠ كيلو تقريبا و من مكه للمدينه ٤٠٠ كيلو تقريبا

**حماده المصري** · 14-01-2013 05:43 AM

تحفه طبعا الرجاله كفت ووفت الحقيقه في كل شيء

والكعبه عموما احلى منظر هتشوفه في حياتك حاول تبكي ولو مبكتش تظاهر بالبكاء في العمره

زي الطفل الصغير كده لما يبقى عايز حاجه من ابوه حاجه بيعيطله او بيعمل نفسه بيعييط

المفروض ان اول دعاء تدعي به اول ما تشوف الكعبه مستجاب

وافضل حاجه انك متدعيش في العمره اقرا قران من سوره البقره وال عمران

من حقك تدعي الي انت عايزه بس افضل الذكر هو قراءه القران وربنا عالم باللي في نفسك

وادعي براحتك وانت في الحرمين وتذكر مجرد النظر للكعبه عباده

وحاول تعمر صدقه جاريه ممكن تشتري كرسي متحرك وتتبرع بيه للحرم المكي هو سعره 300 ريال بس لازم يبقى معاك الفاتوره لانهم هيفتكروك سارقه او تجيب مصاحف وتكون طباعه سعوديه او مراجعه في السعوديه وتسيبها في الحرم

وبرضو الكراسي المتحركه لو معاك حد كبير بتتوزع ببلاش في مدخل من مداخل الحرم بس الضابط بيقولك امانه او ممكن ياخد منك هويتك او اي اثبات لانه في كتير والعياذ بالله مبيستحوش انهم يسرقوا

تجنب المشاكل بقدر ما تقدر لانك في الاحرام الشيطان برضو بيلعب في دماغك وانت محرم ولا حته تتنرفز ولا الهوا ولا تقطع ورقه من شجره ولا اي حاجه تخليك في حالك لحد ما تخلص عمرتك باذن الله

مكه عموما مش مريحه في القعده فيها وشوارعها وزحمتها ودي برضو من نعم ربنا علينا لان لو الناس حبت مكه محدش هيسيبها ف محدش تاني هيعرف يروحها

انما المدينه الهدوء والراحه النفسيه بجد

تجنب الشيعه وتجنب الاسويين

ولو بتشرب سجاير متجيبش معاك سجاير من مصر ولما تروح هناك بطل فرصه ممتازه لانك هتحس انك اساسا مش محتاج تشرب سجاير خاااالص

وبما اننا مصريين وبنحب الاكل متنساش تاكل من مطعم البيك هناك ومتنساش تاكل اي اكل هندي او باكستاني ( برياني ) هيعجبك

وفي نوع من البلح اسمه الرطب موجود كتير اوي في المدينه خرااااافي هو بلح اصفر مستوى ف مايل على اسود خرافي فعلا

لو هتشتري اي حاجه اكسسوارات من الي هناك حاسب في منها كتير اوي مضروب الجماعه عندي جابوا سشوار هديه لحد في مصر طلع مضروب وتلفون برضو طلع مضروب واسعارهم مغريه ورخاص

**dr.hazem** · 14-01-2013 06:13 AM

هو انا بس مستغرب من موضوع المعلبات والاكل والبسكوت....
يا جدعان بتتكلمو على حاجات في السعودية ارخص من مصر ومتوفره في كل مكان مش شايف اي معنى من شيلها اصلا...
زي اللي رايح تركيا وواخد معاه سجادة صلاة وزي اللي رايح السعودية وواخد معاه تمر واللي رايح الشام واخد زيت زتون!!

انا كنت بروح مكه معييش حاجة وفي الميقات بشتري الاحرام والحزام وقصافة للاظافر
وبعد العمره بشترييلي جلابيه واقعد بيها... الخ
يعني بروح فاضي وارجع مليان... مش آخد معايا شيل وآجي ماشي معرفش آخد حاجة عشان الوزن....
جايز عشان انا عشت كتير فى السعودية فطريقتي مختلفة ومستغرب كلامكم...
تحياتي

Sent from my SE Arc S using Forum Runner

-

-

الموضوع: سؤال بخصوص فنادق مكة والمدينة للعمرة

LinkBack

أدوات الموضوع

عرض

-

-

-

المواضيع المتشابهه

حل مؤقت بديل للعمرة

حد يعرف شركة سياحة كويسة للعمرة

اسرع قطار في الشرق الاوسط بين جده ومكة والمدينة

سؤال عن الواجب فعله قبل السفر للعمرة

هل صحيح ان احسن وقت للعمرة الشتاء

الكلمات الدلالية لهذا الموضوع

المفضلات

المفضلات

ضوابط المشاركة