السلام عليكم ورحمة اله وبركاته
صباح الفل على كل الناس الى فى المنتدى

معلش هدوشكم على الصبج بكام سؤال عالماشى

دلوقتى انا كان عندى ترشيح زيت من فتره تحت الموتور ، ولما وديت العربيه للميكانيكى قالى جوان كارتيره و فعلا غيرنا جوان الكرتيره وافتكرت ان الدنيا اتضبطت بس من كام يوم كنت بغير علبه شكمان عند ابو اليزيد فلما رفع العربيه لقيت ان فيه زيت كتير تحت الموتور ناحية الفتيس ، طبعاً قالولى هناك متسكتش عليه

مكدبتش خبر ورحت للميكانيكى قالى روح اغسل الموتور , رحت غسلتله العربيه كلها بالشاسيه والموتور ورحتله تانى فقالى هنغير الاويل سيهات فلما سألته على المصنعيه فقالى 450 دى مصنعيته ، ده غير تمن الاويلسيه
انا دلوقتى عايز اعرف السعر ده كويس ولا لأ ... وكمان عايز اعرف ميكانيكى شاطر متجرب او معرفة حد يكون قريب من جسر السويس هو الى يعملهولى ، لانى مبقيتش اثق فى الميكانيكى ده بعد كذا حاجه عملهالى قبل كده والدنيا مبتضبطش

برضه كنت عايز اعرف هو ممكن الزيت ده يبقى زيت الفتيس لانى اول مابنقل للخامس بيبقى فيه صوت ونه مش طبيعيه ، انقل للرابع الونه تروح ، اعلى للخامس صوت الونه تظهر ، يعنى هو مرتبط بالغيار مش بالسرعه ، ياريت تفيدونى


حاجه تانيه معلش : دلوقتى انا من فتره كنت غيرت حاجات فى العفشه زى الكبالن و المساعدين ورا وقدام و البطاحات وجلب المقصات ، بس لسه عندى حاجه غريبه ، لما بمشى بالعربيه بحس برجه غريبه فى الدريكسيون لو عديت على ظلطه صغيره وحاسس ان الدريكسيون بقى تقيل معايا قوى ، وفيه صوت تزييق بس بسيط
الموضوع ده مقلقنى جداً خاصه انه بيحصل بغض النظر عن السرعه الى انا ماشى بيها فكنت عايز اعرف أرائكم فى الموضوع ولو فيه حد عفشجى شاطر ممكن يعالجلى القصه دى

شكراً مقدماً
وجزاكم الله خير