الموضوع: Nissan Qashqai , Hyundai Ix35 , Chev. Captiva

أنا شاكر جدا لحضراتكم على آرائكم المفيدة والواحد بيعيد النظر بناء عليها ويحاول يوصل لأفضل الحلول .....

الفكرة اني نفسي أوازن بين العربية العائلية وقوة الموتور نسبيا وفي نفس الوقت تقليل التكاليف قدر الامكان ... فتوكيل هيونداي كان عنده كام عربية IX35 وسوناتا موديل 2011 (الشكل الجديد) فرخص في سعرهم جامد - حوالي 80 ألف جنيه - وإن كانوا يظلوا لسة سعرهم عالي شوية لكن بالنسبة لأن أعلى فئة كيا سبورتاج 1.6l تربو في التوكيل النهاردة بقت بـ 230 ألف جنيه (طبعا دون الأوفر برايس عند التجار) وينصح لها ببنزين 95 فلما تبقى ix35 الـ 2000 سي سي 166 حصان من غير تربو و 4x4 بـ 265 ألف متبقاش بعيدة للدرجة .......

أنا كنت شايف ان ال IX35 ممكن تحقق معايا المعادلة المتوسطة من حيث المساحة - أكبر قليلا من القشقاي ولكن أصغر من الكابتيفا - وانها 2000 سي سي فالترخيص حيبقى بحد أقصى 1000 جنيه في السنة يقل تدريجيا حتى 200 جنيه في السنة ومش حيبقى نسبة من تمن العربية زي الكابتيفا ..... والموتور نوعا ما يبقى مرتاح عن الـ 1600 واستهلاكه مش حيزيد بالدرجة المفجعة يعني .....

بس هو الحقيقي اللي مقلقني حاجتين .. أولهما هل وجود العربية من 2011 لدى التوكيل ممكن يأثر عليها في حاجة ؟ ولو فيه نصيب فيها أتأكد فيها من ايه وانا بأبص عليها؟ مع العلم طبعا ان ضمانها حيسري من تاريخ الشراء بس حيكون ضمان غبور القديم (3 سنين أو 60 ألف كم تقريبا ) باعتبار انها مش 2012 اللي ضمانها بيبقى 5 سنين ؟

تاني حاجة هو سعر البنزين الـ 92 متوقع يبقى كام بعد رفع الدعم عنه باعتبار ان العربية دي مش حتستفيد بالدعم لأنها أكتر من 1600 سي سي ؟ وهل حتفرق بطريقة ملحوظة في تكاليف البنزين والصيانة عن الكابتيفا اللي موتورها 3200 سي سي أو القشقاي ؟

معلهش أنا آسف اني صدعت حضراتكم بس بأفكر معاكم بصوت عالي شوية وياريت أستفيد من مشورتكم طبعا مع تكرار الشكر لحضراتكم على الاهتمام والرد .......

الاستاذ يحيى.......تحياتى
حالك حالى بالضبط وكنت فى مصر اجازه من اسبوعين وفعلا لفيت على نفس الانواع اللى ذكرتهم وكان سؤالى لنفسى هو هل اركب زى مابقيت البشر راكبين و نقضيها واخبط واتخبط عشان مزعلش وبلاش اتنطط ولا اركب واتبسط وخاصة انى اسرتى 5 افراد ومحتاج عربيه تجمع بين الوسع والشبابيه والمصاريف الاقتصاديه وكانت مشاهداتى كالاتى:
1- السبورتاج: سعرها وانتظارها بصراحه اصبح مستفز وابتدت تخرج من حساباتى
2- قشقاى: تجمع معظم المواصفات المطلوبه ولكن سعرها بيغلى وايضا لازم انتظر او ادفع اوفر برايس
3- x1 : رحت البافاريه اللى فى اول شيراتون وركبتها طبعا تحفه بكل المقاييس ب 305 الف ولكن غير عائليه بالمره (الصالون ورا ضيق )والشنطه تقريبا هى هى بتاعت السوبارو XV
4- XV :تحفه بكل المقاييس ماعدا الخوف من المغامره وانت عارف سوق السوبارو فى مصر وكمان شنطتها صغيره بس بالامانه عربيه وهميه وشوفت اللى ب 190 واللى 215 و الاختلافات بسيطه
5- V5: طبعا لما زهقت قلت بالمره بما انى شوفت X1 طيب ماشوف جارتها البريليانس وللامانه العربيه شيك ووسعها ومعقول وصاجها محمل وشيك وقول كل اللى انت عايزه بس بردو حسيت بنقص القيمه مع ان السعر مش بطال.
6- فورتشنر: 2700 سى سى عجبتنى جدا عربيه دبابه وعائليه بس بردو لازم نشوف موضوع البنزين الاول وسعرها مبالغ فيه جدا
7- رانجلر 3600 سى سى : اسد بمعنى الكلمه بس عايزه خرطوم بنزين وضرايب عاليه ولازم الواحد يحسبها كويس فى الفتره اللى جايه بدل ما اجيبها واركنها او اجرها بحمار.

انا طبعا مقدمتش حلول لحضرتك بس فعلا الاختيارات هتتحدد كتير بعد مانعرف الحكومه المعجزه بتاعتنا هتعمل ايه فى موضوع البنزبن اللى اكيد هيغير شويه فى سوق السيارات ومش بعيد نلاقى العربيات 1300cc سعرها نط هى كمان وفى الاخر نركب تك تك ونرتاح
اسف للاطاله ...تحياتى

أنا بأشكر حضراتكم جدا على آراءكم المفيدة ....

هي فعلا الفترة دي ضبابية فيما يتعلق بالبنزين وأسعاره وأحواله - زي أحوال البلد كلها بصراحة - والعربية دي مش بدلة الواحد يجيبها ولو طلعت ضيقة ومنفعش تتضبط يركنها في الدولاب ويجيب واحدة جديدة ......

وبالتالي أعتقد إنه بعد اعادة تفكير القشقاي تبقى هي الحصان الرابح بالنسبة لي - رغم ارتفاع سعرها وحتمية دفع الأوفر برايس لأنه مش معقول عقلا ولا منطقا أدفع حجز النهاردة عشان أستلم كمان 10 شهور لو الدنيا جميلة والأسعار مازادتش لوقتها - فالواحد حيضطر يدفع أفر برايس .... باعتبار انها عربية تحقق القدر الأغلب من أمنيات الواحد - وليس كلها بصراحة - إنما سمعة رائعة وتوكيل كويس وبنزين 1600 فالليي يسري عليا يسري على الناس كلها ... وقطع غيار متوفرة ومتبقاش بضاعة راكدة بقالها سنتين عند التوكيل ولا بلاعة بنزين .... وربنا يقدرني بقى وأقدر أكدس الشنط فيها أثناء السفر لأني بصراحة مابحبش حكاية الروف راك دي ........

بالنسبة للزميل formulator واستفساره حول موتور السبورتاج ... أنا الحقيقة أعتقد ان السبورتاج من ساعة ما نزلت مصر وهي بالموتور الـ 1.6L GDI بس مقدرش أؤكد المعلومة دي ياريت حد من ملاكها يتفضل ويقولنا عليها ... ولو الموتور فعلا كده يبقى أعتقد لازملها بنزين 95 وإلا أكيد حيبقى فيه تأثير سلبي على الموتور ولو على المدى الطويل ......

مرة تانية وافر شكري لحضراتكم على الاهتمام والرد ......