عايز اسافر المانيا .. ايه المطلوب؟

**rafe3_dent** · 16-01-2013 02:33 AM

اولا شكرا ليكم
ثانيا: اللي انا فهمتو دلوقتي الخطوات المطلوبة دلوقتي هيا :-
1-ابحث عن جامعة واعرف الشروط وابعتلهم .. ولو قبلوني يبعتولي الورق
2-اروح السفارة عشان الفيزا ((( اللي المفروض هتبقى سهلة عشان الجامعة اللي قبلتني )))
3-اسافر بقى واعمل معادلة هناك

صح كده ؟؟

دلوقتي بقى (( معلش بسأل كتير بس عشان اكون صورة كاملة عن الموضوع )) ...
1-قبل اي حاجة لازم آخد كورس الماني من مكان معتمد زي جوتا هنا في مصر ؟؟ ولا من هناك ؟؟
2-المعادلة المطلوبة لازم تكون باللغة الالمانية؟ ولا ليها امتحانات في مصر ؟
3-شغل الاطباء في المانيا صعب للدرجة دي؟
يعني كل المرمطة دي وفي الاخر آخد الشهادة وارجع مصر؟؟ :d :d

سيبكو من كل اللي فوق ده بقى وقولولي الالمانية دي الاقيها فين عشان اختصر واسافر علطول هههههههههههه

**tito_1980** · 16-01-2013 04:52 AM

بص يا فندم

انا عايز اخد MBA في كندا تبع جامعه معينه هناك و الكاشات جاهزه و الحمد لله و لكن الناس اللي فاهمه في الحوار ده فهموني ان حتي الفيزا الدراسه غالبا هتترفض لان حال البلد سياسيا غير مستقر و المجتمع الغربي عموما متوقع انقلاب عسكري وشيك في مصر بغض النظر عن ان ده هيحصل و لا لأ و لكن هما بيفكروا كده

فبلاش تروح تقدم علي فيزا و تترفض لان لما هتعمل اعاده تقديم ممكن الدنيا تتعقد معاك

و بعدين اشمعني المانيا ؟ عندك كندا و امريكا و اهه علي الاقل انجليزي و السلام

فنصيحه لوجه الله
استني لحد ما الاحوال تستقر و انا عن نفسي عامل كده مع اني عايز اسافر النهارده قبل بكره بس خايف من موضوع رفض الفيزا ده

في نقطه تانيه
دلوقتي هل معاك فلوس باليورو ؟ اليورو = 8 جنيه و 75 قرش يعني حرام تحول فلوس مصري دلوقتي لاي عمله تانيه في ظل تعويم حبايبنا للجنيه

صدقني هتخسر كتير و انا شغلي واقف بسبب موضوع التحويل الزفت ده

حاليا ممكن تعمل ايه ؟؟؟؟؟؟؟؟؟؟؟؟؟؟؟؟؟؟
تاخد كورس الماني full range في مركز لغات معتمد مثلا زي اكسون
تتابع سعر العمله يوم بيوم و تسأل الناس اللي فاهمه في الموضوع ده

صدقني موضوع تحويل العمله ده مهم جدا و هيبقي فيه خساره فادحه في ظل تعويم الجنيه

**rafe3_dent** · 16-01-2013 06:20 AM

انا بالفعل فكرت في كندا وامريكا
بس بالنسبة لمجالي انا طب أسنان الموضوع مكلف جدا جدا جدا
عشان كده فكرت في المانيا ومشكلة اللغة دي سهلة

وبعدين حضرتك بتقول المانيا الفيزا صعبة .. يبقى امريكا اصعب واصعب مش كده ؟؟!!
ولا في سكة تانية ؟؟

وموضوع تعويم الجنيه عندك حق فعلا
والبلد فعلا في الناااازل لما الواحد معدش عارف آخرتها ايه
وده اللي مخليني افكر جديا في السفر

**mohamed_selim** · 16-01-2013 07:55 AM

يا باشا اى معلومات خدها من daad ده حاجه تابعه للسفاره و هيقولولك على نظام الفيزا و الكورسات والدراسه و كل حاجه

**ahmedkhairy** · 16-01-2013 10:25 AM

كده ممكن نفكر فعلا

**Nistelrooy** · 16-01-2013 12:33 PM

وشوف الجامعة الي عايز تروحها وترسل لك موافقة .. وفي جامعات الدراسة بالانجليزي ودي الحالة الوحيدة الي ممكن تسافر بدون الماني بس يفضل الماني ..

كنت متفق مع واحد صاحبي علي دراسة في المانيا بس جه موضوع الجيش واتاجل هو استغل الجيش وفاضلة ليفل واحد ويخلص الالماني كلة وانا هجرب بالانجليزي وربنا يسهل ..

**emicko88** · 17-01-2013 02:17 PM

أنا عندي خطة d: ونفسي احققها ..
هو حتي لو الدراسة في البلد بتكون بلغتها لكن ابشروا .. موجود في ألمانيا أو فرنسا دراسة بالانجليزي
أنا مهندس وناوي ادور علي ماجستير في ألمانيا او فرنسا .. الموضوع مش صعب للدرجة
زميلي عمل ماجستير في فرنسا بس كان بالفرنساوي
وزميل تاني ذاكر الماني واشتغل مهندس في المانيا

المصرايف مش كتيرة للدرجة ... ممكن السنة تكون ب 300 يورو مثلا ..
وفي شغل حتي لو مش في المجال .. بس لما الواحد يخلص دراسة من عندهم اكيد الشغل هايكون اسهل.

وانا اقترح موضوع daad :)