السلام عليكم ورحمة الله وبركاته
سابقاً استهلاك عربيتى الشاهين 1400 سى سى داخل المدينة زحام متوسط
حوالى من 140 الى 150 كم فى الصفيحة ( 20 لتر ) بنزين 80
وكنت مع كل تفويلة بحسبه فى الشهور الأخيره وكان ثابت على نفس الرينج تقريبا

كان عندى صوت تكتكه على طول من يوم ما اشتريت العربية من سنتين وكنت شايفها حاجه عادية
فى الصيف اللى فات كنت فى الأسكندرية وعرفت ان فيه هناك ميكانيكية هناك متخصصين فقط فى ضبط التاكيهات فقولت اضبطها هناك
روحت لميكانيكى تاكيهات ساب العربية تبرد وظبط التاكيها بصراحة اساتذه فعلاً فى الضبط
العربية صوتها هدى شوية ونعم شوية بس كان فيه بردو صوت تكتكه !!!
قالى يبقى انت عندك صباب معوج وهوه السبب واكيد العربية بتاكل بنزين منك
هل سير الكاتينه قطع منك قبل كده ؟
قولتله مقطعش منى بس يمكن يكون اتقطع من اللى اشتريته منه قبل كده
قالى المفروض تغير طقم صبابات هتلاقى الصوت اختفى واستهلاك البنزين اتعدل معاك
قولت فى عقل بالى شكله عاوز يفتح شغل لنفسه ومش هفتح وش السلندر علشان كده
وكده كده استهلاك العربية معقول وفى رنج الطبيعى بالنسبة لعربية كربراتير دفع خلفى على حسب اللى قريته فى المنتدى هنا
لما سير الكاتينه فلت من الترس مؤخرا والعملية باظت
 http://www.nilemotors.net/Nile/324619-a.html
قولت لعله خير ... الميكانيكى كان عاوز يغير الصبابين المعوجين بإتنين استيراد قولتله لا
هجيب طقم صبابات زيرو ونغيرهم كلهم بالمرة علشان صوت التكتكه ووقولت فى بالى انها فرصة لتحسين استهلاك البنزين كمان.
المهم طقم الصبابات اتغير بالكامل وكاوتش الصبابات وظبط الدنيا كلها
وروحت للميكانيكى فى طنطا ظبطلى التاكيهات طبعا لما شوفته بيظبطها طبعا بتاع اسكندرية متخصص التاكيهات دكتور بالمقارنة بيه
بس ماشى الحال ... صوت الماتور جميل جدا بالمقارنة بقبل كده
بعد كل ده صوت الماتور اختلف تماماً عن الأول
وبقى صوته ناعم جدا ... والسحب بقى اقوى بكتير من الأول
الأول لما كنت بحرق على الغيار وبجيب الـ RPM على 4000 كنت بحص بصوت عالى جدا من الماتور
دلوقتى بقيت بقرب من المنطقة الحمراء والصوت اهدى من الأول بكتير
ماشى مرة بجرب العربية بعد ما طلعت من عند الميكانيكى وبدوس جامد وبحرق ببص على عداد السرعة اتفزعت لما لاقيتها 140 كم/س وانا مش حاسس !!!
وروحت لبتاع الكربراتير فك الكربراتير ونظفة تمام وسألنى هل عندك استهلاك زيادة قولتله لا معنديش مشكلة استهلاك بنزين اعتقد انى فى رنج الطبيعى

خلاص ظبطت الدنيا وفولت العربية وصفرت العداد علشان احسب الاستهلاك فى سواقتى العادية بقى داخل البلد وقاعد بحلم انى هلاقى الاستهلاك بقى 200 كم فى الصفيحة ولا حاجه

اتفاجئت ان الصفيحة العشرين لتر عملت معايا 100 كم فقط
قولت اجرب تانى فولت تانى النهاردة لاقيت الصفيحة 20 لتر عملت معايا 113 كم
!!!!!

ايه الحكاية يا اخونا تنصحونى بإيه !!!
جزاكم الله خيرا