الموضوع: لوجان أوتوماتيك السعر الجديد

انا حاجز ستيب واى من بداية شهر 12

واللى حصل كالأتى :

1- زادت أسعار سيارات رينو حوالى 10 الاف جنية لكل طرارز مما يعنى زيادة مقدارها 14 % من ثمن السيارة فى حين ان زيادة الدولار بلغت 7 % فقط

2- تميزت السيارة لوجان والسانديرو وستيب واى بميزة رائعة وهى المنافسه السعرية مع مثيلاتها فحين تتفقد اسعار السيارات من 70000 الف جنية الى 80000 الف جنية ستجد نفسك اما لانوس وفيرنا ولوجان وسانديرو وبالطبع فلا نقاش فى الاختيار فالجودة والأسم لصالح رينو مع الأخذ فى الاعتبار اسعار قطع غيار رينو مرتفعة مقارنة بالفيرنا وااللانوس واعادة البيع

ومنذ الأمس فقدت لوجان وسانديرو ميزتها الاهم وهو سعرها فقد قفزت الى حاجز ما فوق 90000 الف جنية
ويضاف اليها عيبوها السابقة ارتفاع اسعار قطع غيارها مقارنة بالانوس والفيرنا واعادة البيع مقارنه بهم ايضا

ما هى كم المزايا التى تمتلكها اللوجان والستيب واى الأن حتى تعوض الفرق فى ثلاث عيوب قاتلة ( ارتفاع سعرها + قطع غيار مرتفعة نسبيا + اعادة البيع )

3- قرارى الشخصى انى سوف اقوم بأذن الله بسحب مقدم حجز السيارة رينو ستيب واى من التوكيل وحتى اشعار اخر

المشاركة الأصلية كتبت بواسطة khaled online

شكرا جزيلا لمشاعرك النبيلة.

أنا ماكنتش عايز أدخل في مناقشة من النوع ده والدليل إن لما حد بيتكلم عن لوجان من بعيد كده في أي قسم تاني شوف ردودي عاملة ازاي، لكن بما إنك شايفني (غير موضوعي ونرفزتي مسيطرة) عليا حسب تعبيرك وده مش صحيح بالمرة وأبعد ما يكون عن الواقع فأنا هتكلم

لوجان فعلا زي ما أنا قولت: قابلين بيها رغم عيوبها لأنها أفضل سيارة في فئتها أو أحسن الوحشين ولكن...
التقفيل عامة وخاصة الداخلي على غير المستوى + وكذلك الدهان الخارجي بعد فترة بيحصل depreciation بrate أسرع من اللي في لانوس وفيرنا + وصاجها لو ركنت عليه محتاج سمكرة + الكاوتشات الأربعة محتاجين يتغيروا في أقرب فرصة عشان الفرامل تمسك ودي مش محتاجة قوالة وزميلنا porche عمل حادثة بسبب الموضوع ده

البوابة\الايدل اللي بتأثر على الآر بي إم وتبطل العربية منك وكتير حصلهم الكلام ده لكن بتتغير في الضمان فمش هعتبرها عيب

عوامل الأمان في العربية مش abs ولا حتى اتنين airbags على الرغم إن على موقعهم كاتبين الكلام ده لأ وسادة هوائية واحدة

ده مش كلام واحد بيتفرج من بعيد على لوجان وجربها كام مرة وخلاص. لأ. ده تجربة اللي اشتروها سواء زمايلنا في القسم هنا أو على صفحة رينو على الفيس بوك ودور وهتلاقي الكلام مكتوب في تقاريرهم المفيدة جدا ومشاركاتهم

يعني وانت بتشتريها تعمل حسابك على أربع فرد كاوتش جداد بألفين وفرش داخلي في حدود 700-1000 يعني زود تلات تلاف على تمنها من قبل ما تطلع من المعرض

فأيوة يا أحمد. كنت هشتريها على عيوبها واقتناعي بيها على إنها أحسن الوحشين ومازلت موضوعي زي ما أنا

مش عشان العربية معاك تبقى pure ومن غير عيوب

وبعدين انت متزعلش. اللي اشترى عربيته من قبل الزيادة مصلحة لأنه لما يبيع ممكن ياخد فيها اللي دفعه أو أقل حاجة بسيطة

لكن اللي هيشتري جديد .... هو حر

أكيد إنت حر ياخالد .. أنا مش بحاول أقنعك باللوجان بالعكس بقولك لو أنا مكانك هسحب الحجز وهفكر في الصني الجديده. خلاص ياسيدي إعتبرني مقولتش حاجة.

المشاركة الأصلية كتبت بواسطة khaled online

صني من 99 ل 104
لوجان من 79.5 لـ 90

1. رينو استغلت زيادة الدولار بشكل بشع وماحترمتش عملاءها وخبت الزيادة أكتر من أسبوعين
2. الصني أحسن وتوكيلهم غير مستغل. مقدرش أقول الكلام ده على رينو
3. الفرق لما كان 20 ألف بين الاتنين الصني تكسب لو معاك العشرين
الفرق دلوقتي 14 ألف مع الاختلاف في الإمكانيات وعوامل الأمان لصالح الصني
الواحد يدفع ال14 الزيادة عن طيب خاطر لصني بدل لوي الدراع ومماطلة رينو
وده برضه كلام موضوعي عشان منقولش غضب وبتاع!

وده إللي أنا قولته برضه .. فيه بدائل أحسن بس لازم تزود شوية وفيه ناس متقدرش تزود وبالعافية ممكن تدبر الزيادة إللي حصلت في اللوجان لو لسه عايزينها وإلا هيضطرو ينزلو للمستعمل.

لو تقدر تحط الغرق بتاع الصني توكل على الله.

المشاركة الأصلية كتبت بواسطة amor777

الي بيقول خليك موضوعي ده اعتقد ان من اهم مميزات اللوجان كان سعرها ولما تفقد الميزه دي مش هقعد اكلم بقي عن مميزات فرعيه هيه فعلا فيها عيوب والواحد كان بالعها عشان سعرها الاقتصادي منافسا للفيرنا واللانوس لكن دلوقتي هنكلم ونقول ايه عن مميزاتها مقابل السعر ده انته عايزني وانا بكلم عن عربيه افصل سعرها عن امكانيتها انته بتكلم ازاي اكيد الاتنين مرتبطين ببعض ولما يبقي سعرها مش متماشي مع امكانيتها تبقي شكرا واعتقد ده كان هيبقي رايك لو كان قالولك استلم بالسعر الجديد ولو كل العربيات سعرها زاد يبقي كلهم بالنسبه لسعرهم مش متناسبين و بلااااااااااااااها عربيات خالص المترو زي الفل اصلا

واضح إنك قريت أول سطرين بس من تعليقي. هي موضوعي دي شتيمة؟ خلاص ياجماعة أنا إللي مش موضوعي وستين مش موضوعي كمان.

لا حول ولا قوة إلا بالله
أنا آسف فعلا يا أستاذ خالد، حقك عليا وأنا غلطان.
ياريني مادخلت الموضوع ولا علقت.

أنا على فكرة بتكلم بود وحاولت أكتر من مره أوضح إللي عايز أقولهولك عشان متاخدش كلامي بمعنى غلط ومع ذلك أنا بعتذكر لو كلامي وصلك بشكل خاطئ. بس بجد حاجة بقت تضايق إننا مستعدين ندخل في بعض شمال لأقل سبب ولو الواحد حب يلم الموضوع ويريح إللي قدامه، يتفهم العكس ونتمادي.

تاني بعتذر لو أستاذ خالد أو أي حد شاف في كلامي أي خطأ أو إهانه غير مقصوده لا سمح الله.