رينو لوجان أوتوماتيك بقت ب 90 ألف
ولا تعليق
أنا هسحب مقدم الحجز وحسبي الله ونعم الوكيل
عرض للطباعة
رينو لوجان أوتوماتيك بقت ب 90 ألف
ولا تعليق
أنا هسحب مقدم الحجز وحسبي الله ونعم الوكيل
ده سعر الوكيل و لا باوفر برايس ؟
سعر الوكيل من مصدرين مكلمهم بنفسي 16202 ومندوب المبيعات اللي أنا حاجز معاه في رينو الدقي ومش هقول غير حسبي الله
ايه المصدر لو سمحت؟
من موقعهم 81500 جنيه للوجان الاوتو مش معقول التمن ده
من 78 ل 90 فى شهر. ده إستهبال. و بعدين ممكن تغلى تانى بعد الحجز و يقولك هات الفرق. أنا كنت ناوى على لوجى . لو السعر كده يبقى خليها تصدى
الكلام لاسف مظبوط
الناس اللي حاجزين و لسة ماستلموش مقسومين نصين
النص الاول اللي حاجزين لحد شهر 10 هيستلموا بزيادة 2000 جنيه بس
النص الثاني اللي حاجزين بداية من شهر 11 هيستلمو بالسعر الجديد الي هو 90000
العربية نفس الشكل و مفيهاش اوبشن واحد يوحد ربه زيادة
لاااااااااااااااااااااااا ااااااااااااااا
حرام انا حاجز يوم 25-12-2012 اللوجان المانيوال لا اساس 72500 فول اوبشن هل ياترى برضو زادت ولا ايه ؟ اكيد حتزيد يعني هيا بنت البطه السوده انا حبدأ اشوف عربيه نوع تاني واغير من اللوجان لو حيحصل كدا
سبحان الله! أنا كنت حاجز يوم 25 برضه بس من التوكيل. ربنا يوفقك. أنا شخصيا لغيت الحجز خلاص. التوكيل اللي ميرضاش يقول سعر الزيادة من يوم 1 يناير لغاية يوم 17 وبعديها لما يقول يزود من 79.5 ل 90 ألف هو توكيل لا يحترم عملاءه وبيخسر الميزة الأساسية اللي كانت في العربية: السعر الاقتصادي اللي بقى غير اقتصادي. دول طلعو عين الناس اللي حاجزة بالناس الغريبة اللي معيننهم في 16202 كل حاجة "حضرتك تابع مع الفرع ومندوب الحجز" ؟! طيب إذا كان الفرع والمندوب مابيردوش أروح الإدارة الرئيسية مخصوص وأسأل مثلا؟ والله هزلت. ولا واحد فيهم كان يعرف حتى إن أوتوماك بادي النهاردة وهو ده الوقت اللي رينو هتتكرم وتعلن فيه قايمة الأسعار الجديدة. دي تجربتي مع رينو بنقلها كما حدثت وكل واحد أدرى بمصلحته وزي ما التوكيل بيدور على مصلحته وبيزود 10 تلاف في عربية مفيهاش عوامل أمان غير اتنين أيرباجز أنصح أي حد يفكر مرتين تلاتة قبل ما ياخد قراره أيا كان القرار
بصراحه قاعد بدور على عربيه مناسبه في سعر اللوجان ب73000 مش لاقي خالص غير حاجات مش مقنع بيها خالص طب ايه البديل ناهد المانيوال ب 82 ولا نعمل ايه
انا في قمة الذهول!!!!
٩٠٠٠٠ ده رقم هلامي!!
هي العربية فيها كام ١٠٠٠٠ جنيه على بعض علشان ينطوا النطة دي؟؟؟؟ ده كده سعرها زاد فوق ال ١٠٪ في شهر واحد....
اديني نهضة كمان و كمان!
بس في هبل مش طبيعي يا جماعة بيحصل
الدولار زاد 6% و سعر العربية زاد 13%
يعني لو الزيادة فعلا علشان الدولار يعني التوكيل بيعوض هامش الربح اللي خسرو ... يعني المفروض يعوض 6% بس
يعني المفروض الزيادة تبقى 4770 يعني سعر العربية يبقى 84270 مش 90000
باشا
مفيش أي علاقة بين الزيادة اللي حصلت وبين الوضع السياسي. ليه؟ لأن كل اللي زود من التوكيلات التانية زود في حدود 4 أو حتى 6 آلاف جنيه ودول أساسا فئات أعلى أقل عربية فيهم 100 ألف
فالزيادة العشرة تلاف بتوع رينو سببها رينو ورينو فقط
أنا بفكر جديا أبعت لرينو فرنسا أسألهم هم عارفين اللي بيحصل وعادي كده ولا موقفهم إيه من مهزلة توكيلهم في مصر أكبر سوق ليهم في الشرق الأوسط؟
و"حلاوة" رينو في الزيادة فين؟!!!
وأي هبل؟ ده المندوب بقوله أوكي أنا هلغي الحجز يقولي أوكي يافندم ومفيش حاجة هتتخصم من مبلغ الحجز!!! هههههههههههههههه أنا كنت ههزأه بس ده يدوب مندوب مبيعات غلبان بينفذ أوامر فاكتفيت أقوله ما هو طبيعي ميبقاش فيه تغيير
امال لو مفيش اتفاقيات جمارك بتاعت المغرب والكلام الكبير ده كانت وصلت كام معلش بس هى اللوجان اهم ميزة فيها انها عربية سعرها اقتصادى وهى بكدة فقدت اهم ميزها ليها للاسف العربية اصبحت خارج المنافسة موجود هنا فى الكويت ب ٣٠٠٠ دينار تقريبا يعنى ب ٧٠ الف جنية وانا ضارب فى ٢٣ اعلى سعر للدينار وللعلم العربية اوروبى بالكامل من مصنع رومانيا والمفروض فى مصر او الكويت العربيتن من غير جمارك يبقى لية فرق السعر الرهيب دة
لا - دي قلة ادب - الزيادات الغير مبررة دي لازم يبقى عليها رقيب
الكلام طلع صح ده الاتوماتيك بقت 90000 والمانيوال فول اوبشن بقت 82 الف يعنى زادت 10 الاف جنيه كدا كتير جدا بجد
خالد باشا ولا تزعل نفسك يا حبيبي ولازم تعرف اننا حاليا ف مصر اي شركه بتعمل اللي هيا عايزاه طالما مافيش رقابه ... المهم انا فضلت شهر ونص حاجز لوجان زيرو من معرض باوفر برايس وطول الشهر ونص وهما بيماطلو فيا ف ميعاد الاستلام مره بعد يومين ومره بعد اسبوع و ف الاخر لما حسيت بعدم احترام المواعيد لغيت الحجز واشتريت لوجان 2010 استعمال بحاله كويسه والحمد لله مستمتع بيها واشتريت دماغي ... نصيحتي اشتري واحده استعمال تكون حالتها كويسه ولو معجبتكش بيعها وهات اي نوع تاني
لا حول ولا قوة إلا بالله. معلش.
الواحد على كده يحمد ربنا إنه نفد.
بس مش عارف ليه أنا حاسس فيه حاجة غلط أو هيحصل تعديل للسعر تاني قريب.
أصل همه مش هبل عشان يعملو كده. ولا إيه؟
واحنا بنشتري بردوا
ربنا يرحم المواطن فظل الاسعار دي ..
خلوها تصدي. أنا ال90 ألف لو صرفتها تاكسيات وطيران حتى وأقسم بالله هيبقى أوفر من اللوجان. وخلي بالكو ال90 ألف والزيادة اللي فيها معناها التأمين هيزيد وكذلك الترخيص ده غير تكاليف الصيانة وقطع الغيار اللي أكيد مغلينها بحجة الدولار + البنزين اللي هيغلى. يعني انت بتتكلم في عربية قربت على ال100 ألف ومن جوا فاضية.... خلوها تصدي
ﻷاسف الموضوع صحيح ايه الهبل ده كده العربيه هتفقد ميزتها التنافسيه احنا لازم نشوف حل ده اسمه سرقه
انا لسه قافل مع المبيعات و الراجل بقى مش عارف يقول ايه و قالى بالحرف الواحد ان ميزتها التنافسيه فقدت لله الأمر من قبل و من بعد
حسبنا الله و نعم الوكيل .
الحل مقاطعة الشراء لفتره حتي يقل الطلب و بالتالي يبقوا مضطرين ينزلوا السعر
بال 90 الف دول الواحد يشتري بيهم عربيات احسن من اللوجان بكتير . هيا كانت ميزتها سعرها ودلوقتي فقدت الميزه دي .. بس فعلا فيه حاجه غلط ف النطه الجامده دي ف الاسعار
الفلوانس كمان زادت 23 الف جنية مرة واحدة ويدوب غيروا الاكصدام الامامى والفتيس يعنى الحاجات اللى غيروها ما تسويش 2 او 3 الاف جنية
الالنترا فيه كلام انها زادت 17 الف جنية
الظاهر ان مش العربيات بس اللى حتغلى
العربيات هى البداية
ربنا يستر علينا وعلى البلد
اعتقد اللى عايز يشترى عربية يلحق يشترى حاجة من اللى لسه ما غليتشى
شوفوا الصنى اهى على الاقل زادت 2000 جنية بس ولا البروتون
عادي جدا لما العربيات دي تغلي 17000 و 23000 جنيه مره واحده اصل احنا بنلاقي الفلوس ف الشارع فعادي يعني متاخدوش ف بالكو
ياجماعه كل العربيات زادت زياده جنونيه مش اللوجان بس والناس مش هتعرف تشترى عربيات لان ف ناس كتير محتاجنها
أنا مقدر جدا والله إحساس خالد صاحب الموضوع بس أنا عايزه يبقى موضوعي وميخليش نرفزته تسيطر عليه.
ياخالد إنت كنت مقتنع بالعربية وحاجزها وبقالك فترة بنتواصل كلنا في القسم سوا والحياة جميلة. حصلت مشكلة الزيادة وبالتالي الدنيا إختلفت وأنا لو مكنك كنت بأمانه هسحب الحجز وأفكر في الصني الجديدة أو أرجع أدور على لانسر إستعمال زي ما كنت قبل الإستقرار على اللوجان ... بس ده ميخليش العربية فجأه "هي أصلا أكتر من ثمنها" و "عاصرين على نفسنا لمونة" و "عربية من جوه فاضية".
لو هي كده من الأول طب كنت هتشتريها ليه؟ الواقع مش كده بالعكس الكل عارف إنها فيها كل الأوبشنز المتوقعة والغير متوقعة في الفئة دي ( بتكلم عن الفئة النظرية مش السعرية، الحالية ) ومواصات أمان مش موجودة في عربيات كتير في نفس الفئة السعرية السابقة وحتي الحالية على فكرة.
كل المشكلة إنها بالسعر ده الواحد هيفكر إنه لو زود 5 ولا 10 عنده إختيارات تانيه أو يوفر الفلوس ويجيب مستعمل حاجة عاليه.
إللي بيحصل ده هبل في الأسعار أنا معاك تماما ولو مكانك هفكر في حاجة تانيه. بس تعالو هنا .. هو بالأسعار الجديدة لكل العربيات، 90 يجيبو إيه دلوقت؟ طبعا غير أفيو وفيرنا برضه.
متفهمنيش غلط ياخالد أنا مش بهاجمك والله، أنا عارف ممكن كلامي يتفهم غلط بس بجد بكلمك زي أخويا. هي اللوجان سعرها كده بقى غير مغري خالص وممكن تلاقي بدائل أحسن بس لازم تزود على ال 90 شويه. بس مش معنى كده إنها كانت عربية حلوه قبل الزياده ووحشة بعد الزيادة. أنا كل إللي بعلق عليه إنك بدأت تعترض على العربية نفسها مش السعر بس. زي فيلم عادل إمام السفارة في العمارة لما الناس هتفت شرف خيري رمز الصمود، وبعدين هتفو شريف خيري الخائن العميل ههههه.
إوعى تزعل مني ياخالد، والله قصدي بس أعدل دفة النقاش شوية عشان حاسس إنها بدأت تبعد عن الموضوع الأساسي أو عن النقطة إللي المفروض نركز عليها. الله يكون فعونك ويارب يجد في الأمور أمور ويسهللك الحال وربنا يوفقك في حاجة تعوض صبرك خير.
وفي الآخر بقي، إحنا كمنتدى وأعضائه وملاك للوجان مفيش حاجة ممكن نعملها عشان نوصل موقف رسمي للوكيل إنه كده غلط والموضوع وسع منهم؟ أنا لا أقصد إعتصامات طبعا ولا جمع توقيعات والكلام إللي مبياكلش ده، أنا قصدي مثلا زي ما الناس المسؤولة عن أقسام العربيات بتجيب عروض تخفيضات أو دعوات تيست درايف أو عمل تقارير عن العربيات، مش ممكن الناس دي تحاول توصل الرستلة لمسؤولي التسويق والمبيعات في التوكيل مثلا؟؟؟؟
يالهويييييي!!! إيه الرغي ده كله!
على فكرة يا جماعة كل اسعار المستورد حتزيد الدولار دلوقتي في السوق السودا 7.20 و لسة مكمل زي المرة اللي فاتت لما كانوا مثبتين سعر الصرف 3.4 و لما عوموة طلع لقيمتة الحقيقية وقتها 6.1 و ثبتوة و دلوقتي عوموة تاني و حيوصل 9 او 10 ج فكل السلع حتزيد حوالي 30% او 40% ربنا يستر علينا و على البلد و يخلصنا من الاخوان عن قريب ان شاء الله
طيب يا جماعه ايه الحلول البديله انتو بتقولو ان الصني انها بديل عن اللوجان ازاي وسعرها عامل 97 الف المانيوال والاوتو 102 الف.
هل في عربيه سعرها الاوتو المانيوال ب82 الف ؟ مفتكرش يعني برضو فيث نظر الناس ان سعرها اقل حاجه ف السوق . ولا انا بتكلم غلط
دلوقتي انا دافع مقدم حجز 5 الاف عند السبع وكطل مكلمه عن السعر زاد ولا لا يقول معرفش والمفروض استلم اخر الشهر دا هل لو سحبت الحجز اشتري ايه بديل عن اللوجان ؟ وايه الممكن مستعمل يكون فئه عاليه ب70 الف ؟.دلوني على حلول عمليه
شكرا جزيلا لمشاعرك النبيلة.
أنا ماكنتش عايز أدخل في مناقشة من النوع ده والدليل إن لما حد بيتكلم عن لوجان من بعيد كده في أي قسم تاني شوف ردودي عاملة ازاي، لكن بما إنك شايفني (غير موضوعي ونرفزتي مسيطرة) عليا حسب تعبيرك وده مش صحيح بالمرة وأبعد ما يكون عن الواقع فأنا هتكلم
لوجان فعلا زي ما أنا قولت: قابلين بيها رغم عيوبها لأنها أفضل سيارة في فئتها أو أحسن الوحشين ولكن...
التقفيل عامة وخاصة الداخلي على غير المستوى + وكذلك الدهان الخارجي بعد فترة بيحصل depreciation بrate أسرع من اللي في لانوس وفيرنا + وصاجها لو ركنت عليه محتاج سمكرة + الكاوتشات الأربعة محتاجين يتغيروا في أقرب فرصة عشان الفرامل تمسك ودي مش محتاجة قوالة وزميلنا Porche عمل حادثة بسبب الموضوع ده
البوابة\الايدل اللي بتأثر على الآر بي إم وتبطل العربية منك وكتير حصلهم الكلام ده لكن بتتغير في الضمان فمش هعتبرها عيب
عوامل الأمان في العربية مش abs ولا حتى اتنين airbags على الرغم إن على موقعهم كاتبين الكلام ده لأ وسادة هوائية واحدة
ده مش كلام واحد بيتفرج من بعيد على لوجان وجربها كام مرة وخلاص. لأ. ده تجربة اللي اشتروها سواء زمايلنا في القسم هنا أو على صفحة رينو على الفيس بوك ودور وهتلاقي الكلام مكتوب في تقاريرهم المفيدة جدا ومشاركاتهم
يعني وانت بتشتريها تعمل حسابك على أربع فرد كاوتش جداد بألفين وفرش داخلي في حدود 700-1000 يعني زود تلات تلاف على تمنها من قبل ما تطلع من المعرض
فأيوة يا أحمد. كنت هشتريها على عيوبها واقتناعي بيها على إنها أحسن الوحشين ومازلت موضوعي زي ما أنا
مش عشان العربية معاك تبقى pure ومن غير عيوب
وبعدين انت متزعلش. اللي اشترى عربيته من قبل الزيادة مصلحة لأنه لما يبيع ممكن ياخد فيها اللي دفعه أو أقل حاجة بسيطة
لكن اللي هيشتري جديد .... هو حر
برضو محدش قال ايه الحلول البديله يا جماعه
يا جماعه العربيات كلها سعرها زاد بسبب الدولار فقط ومش لاى زياده فى امكانياتها و الزيادات تتراوح من الفين جنيه للتجميع المحلى الى ٢٥ الف جنيه للفلوانس حسب المكان اللى بيستوردوه منها و مدى استغلال المستورد. يبقى اللى كان عايز يشترى عربيه معينه مش هيبقى قدامه غيرها برضه لكن بالسعر الجديد و مثال صغير لموضوع الصنى و اللوجان : اللوجان الاتوماتيك بقت ب ٩٠ الف و الصنى الاتوماتيك ب ١٠٤ الف يعنى هناك ١٤ الف جنيه لسه فرق فى السعر و بالتالى اللى كان ناوى على لوجان يا أما هيشتريها بسعرها او يستنى و صعب قوى يدفع الفلوس الزياده لمجرد ان الفارق قرب شويه لان الفارق مازال الاف الجنيهات مش ثمن كيس شيبسى عليه عرض :) و بالتالى مفيش حاجه اتغيرت الموضوع عباره عن الكلمه المستفزه بتاعه وزير الصحه اللى هى انه حصل تحريك او ازاحه للأسعار و كل ما يكون سعر العربيه كان غالى اصلا هيخللى الناس تثبت على قراراتها اكتر يعنى حتى فى حاله الفلوانس زادت ٢٥ الف جنيه بس ما حدش هيسيبها و يروح يجيب منافس ليها علشان ٥ او ١٠ الاف جنيه توفير
صني من 99 ل 104
لوجان من 79.5 لـ 90
1. رينو استغلت زيادة الدولار بشكل بشع وماحترمتش عملاءها وخبت الزيادة أكتر من أسبوعين
2. الصني أحسن وتوكيلهم غير مستغل. مقدرش أقول الكلام ده على رينو
3. الفرق لما كان 20 ألف بين الاتنين الصني تكسب لو معاك العشرين
الفرق دلوقتي 14 ألف مع الاختلاف في الإمكانيات وعوامل الأمان لصالح الصني
الواحد يدفع ال14 الزيادة عن طيب خاطر لصني بدل لوي الدراع ومماطلة رينو
وده برضه كلام موضوعي عشان منقولش غضب وبتاع!