بداية أعتذر عن تأخري في الكتابة في هذا الموضوع لأني فعلاً كنت قرفان من التوكيل جداً ومن حاجات تانية وسلبيات كتيرة للأسف
نخش في الموضوع:
أنا كنت حاجز قبل ماأروح بـ 9 أيام، يعني المفروض أروح وأمشي على طول صح؟ ماعلينا
رحت وسلمت العربية وكانت الساعة 8.45 صباحاً
ودخلت لموظفة الاستقبال (رويدا) وسألتها هايعملوا إيه بالظبط قالت صيانة كاملة وتغيير فلاتر وفحص شامل للعربية عشان دي الصيانة الكبيرة (على حد قولها)
ماشي ياحاجة
قعدت في الريسبشن السخيف بتاعهم
شوية وبعد 10 دقايق بالظبط لقيتها بتكلمني على الموبايل وبتقول التيل عايز يتغير . المهم روحتلها يهديكي يرضيكي التيل دا فيه شكوى جماعية منه قالت لأ دا استهلاك ، لما مالقتش فايدة قولتلها ماشي ودخلت للدكتور شوقي مدير المركز ، الراجل الحقيقة استقبلني بابتسامته الجميلة المعهودة :
- يادكتور في شكوى جماعية من التيل وصوت الصفارة.
- يابيه فين الكلام دا، أنا من شهر مارس ماجانيش أي شكوى من التيل
- يادكتور يعني أنا هاألف
- لأ بس أنا ليا اللي قدامي ودا إستهلاك ومش على الضمان
- يعني أنا دا جزائي إني استحملت صوت الصفارة دا 20 ألف
- طيب هاعمل إيه، أنا كنت امبارح مع مدير الجودة وقالي إن آخر تعديل هايتعمل في الاسبيرانزا الصغيرة هو تعديل التكييف ومجبليش سيرة التيل خالص
- طيب والشكوى العامة اناس كلها بتشتكي منه
- يابيه باقولك ماحدش اشتكى من شهر مارس
دا كان نص الحوار مع مدير المركز:
الراجل بيتحجج إن ماجاتلوش شكوى من التيل من شهر مارس من التيل
هنا أود تذكير حضراتكم بدعوتي لكم للاتصال هاتفياً بالتوكيل وعرض الشكاوى من التيل، ولكن لم يستجب أحد،
وعليه يبقى من حقهم يعملوا اللي هم عايزينه
http://www.nilemotors.net/Forum/viewtopic.php?t=3269
المهم خلاص سبته وكل شوية أسأل على العربية كنت معتقد إني هامشي على الساعة 12
طلعلى المهندس وليد وقال إن في عيب في الطارة وأنا طلبتلك واحدة وعلى بال ماتيجي هاظبطلك دي لأن ما يخلصنيش تمشي كده
قلت ماشي
الكلام دا قعد لغاية الساعة 6.15
ودفعت 740 جنيه (شامل تمن التيل 128 جنيه+ تركيبه 24) والباقي زيت وفلتر بنزين وفلتر هواء وفلتر زيت وخامات مستهلكة للورشه (14.75) وضريبة مبيعات (حوالي 68 جنيه)
بصراحة كان يوم زفت وآسف في اللفظ
على فكرة أنا ليا تعديل التكييف وحاجز قبلها بـ 9 أيام ومع كده قالولي خلص وحجزت تاني على يوم الأربعاء بعد القادم !!!!!!!!
مش قادر أشرح بالتفصيل بس اللي عنده استفسار يتفضل وأنا هاجاوبه