الموضوع: لانسر ولاااااا .....

شكراااا .. انا متابع كونتاكت ونازل السوق قريب ان شاء الله

تويوتا الجنوب أفريقى مانيوال عربية ممتازة جدا للعلم أنا من وجهة نظرى بعتبرها أفضل كورولا بأفضل أوبشن نزل ما سابوش حاجة كان فيها حتى بخاخات فوانيس
كان فيها 9 إيرباج ..... محرك 122 حصان مش فاكر عزمه قد إيه بالظبط .... للعلم أيام ما نزلت كانوا بيقولوا إن محركها 145 حصان !!! ... لكن اتضح إنه كلام مش صحيح بعدين زى ما نفس الكلام اتقال عن سيفيك الجيل التامن تقريبا

تويوتا الشكل اللى قبله ال 2007 الأكثر شهرة والأكثر مبيعا ولكن شكلها مش حلو زى الشكل الجديد من و جهة نظرى سعرها مستعمل مبالغ فيه جدا جدا يعنى المانيوال 1300 سى سى بحالة ممتازة معروضة هنا ب 97 ألف وكمان فيه أغلى من كدا !!!!! ولكن اشتهرت برضه بالاعتمادية وسهولة الصيانة

مازدا 3 عيبها الوحيد توكيلها السئ غبور أوتو دا من وجهة نظرى ... بس عامة قطع غيارها متوفرة برا التوكيل بأسعار أقل هو حد فيه دماغ للتوكيل ووجع قلبه ..... محرك 105 حصان ... محرك الكورولا الشكل الجديد أتوقع منه أ داء أعلى طبعا ... ثبات ممتاز وهى مبنية على فورد فوكاس للعلم يعنى الأصل فورد فوكاس والنسخة مازدا 3 .... بغض النظر عن فارق السعر ... هتلاقى مازدا 3 أغلى سوقيا من فوكاس

لانسر بومة الأشهر والأكثر بين كل عربية وعربية لانسر بومة .... ماسكة سعر أعادة بيع عالى ... سهولة الصيانة ... توافر قطع الغيار فى كل حتة بس المضروب كتير قوى برضه الأصلى بيبقى متوافر فى أماكن معينة ...... ثباتها كويس جدا برضه

من ناحية الشكل ... المازدا 3 أكثر شبابية ... كنبتها الخلفية ضيقة شوية
وأتوقع إن مازدا 3 مع فتيس أوتو مش هتبقى بتاع شد وتسارع زى ما انت متخيل لأنك كنت راكب عربية مانيوال كربراتير تقريبا
يعنى من الآخر أنا شايف أن الكورولا الجنوب أفريقى مانيوال أختيار وسط بين ال 3 .... محركها أقوى واحد فيهم
شكلها كويس برضه ولكن مش واسعة قوى برضه من جوا لكنها معقولة
أنتشار أكثر من المازدا وأقل من البومة
بعدها المازدا
وأخيرا لانسر بومة

المشاركة الأصلية كتبت بواسطة mostafa hashem

ان شاء الله بس يارب الاقى عربيه كويسه مش ماشيه كتير .. انا معايا 90 بالظبط

بس هو سمارت كار ده فين ؟؟ مع العلم انى مش من القاهره

مش مقياس أبدا المحرك شغال قد إيه

العربية بتختلف من شخص لشخص واستخدامه ومدى فهمه .... فيه عربيات عند ناس ما بيركبوهاش كتير ماشية قليل وحالتها زفت بسبب سوء الاستخدام

فيه عربيات ماشية كتير سفر مثلا وصاحبها مهتم بيها وفاهم وبيصينها اول بأول

فياريت متاخدش عداد الكيلو متر مقياس خاصة غن بيتلعب فيه ويغيروه باستيراد ... عشان كدا بنصحك تكشف فى التوكيل

ويفضل إنك تشترى عربية من واحد كان بيعملها صيانة توكيل أو مراكز معتمدة

أغلب اللى على كونتاكت كار تجار إحذر فيه نصب كتير وغش ما لانهاية

مفيش أحسن من إنك تشترى العربية من واحد معرفة أضمن حاجة فى اليومين دول بالذات

غير كدا كشف توكيل عشان متندمش

المشاركة الأصلية كتبت بواسطة medokassem

لو ثبات وغرز بغباء وجري وفرامل يبقي مازدا
كفاية اسمها بي ام اليباني
الانسر البومة تكنولوجيا قديمة من ٢٠٠٤ وهي اصلا استكمالا للمكوه ال ٢٠٠١ فخلاص راحت عليها المازدا هيا اقرب حاحة وهتكيفك لانها اعلي من الوبل اللي كانت معاك وعن تجربة
لكن شيل التويوتا عشان مش بتاعت ثبات واصحابي بيصوتوا منها في الشد رغم موتور الجنوب الافريقي الفاجر بس فرامل جيدة وثبات سئ في الغرز
وده كلامي وانا قده وهتحاسب عليه ياكبير

مازدا 3 حلوة لكن فيكترا لا تقل عنها فى شئ جايز يكون فيكترا سى تسارعها مش عالى مقارنة بفيكترا بى مانيوال ولكن ثباتها رائع وفخمة من برا وفتيس إيزى ترونيك مانيوال بدبرياج كهرباء يعنى كتكنولوجى أعلى من مازدا 3 وتقريبا محرك بيطلع 105 حصان لكل منهما ... بغض النظر عن نتشة الفتيس اللى بيقولوا عنها

بس أعتقد إن فيكترا سى تقيلة شوية زى الأوكتافيا كدا

شوف يا باشا لو هتتكلم عن لانسر بالمبلغ دا يبقى شارك مايفيك 1500 سى سى العربية سحبها أعلى من بومة ال 1600وموتورها بيطلع 109 حصان تقريبا
شكلها جديد طبعا فى الهاى لاين منها تقريبا بينزل الفانوس البروجيكتور اللى بيديك أضاءة لف الدركسيون بزاوية عشان تشوف كويس
عفشة مالتى لنك Multi link يعنى الثبات الأعلى شكلها رياضى أكثر بينزل فى الهاى لاين منها عربية بيتسقطلها مواتير وبتقبل تعديلات محترمة

وعايزك تدخل معاك فى المقارنة هوندا سيفيك الجيل التامن دى فاكهة اليابانى بالنسبة لى بصراحة بس عيبها انخفاضها ع الارض

المشاركة الأصلية كتبت بواسطة medokassem

بقلك ايه الله يسترك الراجل محدد ٣ انواع
شوية تقوله تويوتا مانيوال وهو عايز حاحة فيها ثبات ازاي بعد مركب الاوبل هيركب التويوتا وشوية وتقوله القرش وهو مكنش طارحها اصلا الراجل عايز يشتري ومش ناقص لخبطة الله يسترك ههههههههههههههه
لو كل واحد دخل وقاله اشتري كذا احسن غير اللي هوا كاتبه مش هنشوفه علي المنتدي تاني. ^_^
تحياتي

هو حضرتك محسسنى أنى هيتجوز 3 وبيستشيرنا دى عربيات أوبشن يا باشا مش حاجة أساسية

انا بحط نفسى مكانه كل واحد فينا بيبقى عايز يجيب الأحسن بأحسن سعر

وبعدين يعرف أكتر عشان يبقى مختار وهو مرتاح فى العجلة الندامة والصابرين بخير

يعنى بذمتك ينفع نحط لانسر بومة مع لانسر شارك مايفيك 1500 وبنفس السعر ممكن أجيب الاتنين ؟؟ حلال يا عمرى ولا حرام ؟؟

وبما إن صاحب الموضوع كان راكب أوروبى وواتكلم بشكل عام وقال برضه إنه عايز الثبات والجرى

أنا ممكن أقول لحضرته

ليه متفكرش فى فيات برافو تى جيت T-jet أوو فيات لينيا تربو T-jet لو بيحب السيدان
أظن دى عربيات من الآخر يعنى
لما فيات بتطلعلى من موتور 1400 سى سى مع فتيس مانيوال 150 حصان وعزم جبار أصحابها بيشدوا مع الفئة الخامسة وكفاية إنها مبتنزلش فتيسات أوتو ..... بتنزل الإيزى ترونيك والدوال كلتش وما شابه ذلك عشان الأداء الرياضى اللى معظم الشباب عايزينه
دا لو هنتكلم عن متطلبات صاحب الموضوع يعنى

فلنفرض إن واحد قال لك عايز عربية ثابتة وقوية وكذا وكذا وقال لك بفكر فى فيرنا ولانوس هتقوله إيه ؟؟ هنقول مينفعش نخرج برا الاتنين ... ننسى الجزء المهم من السؤال ؟؟