بسم الله الرحمن الرحيم

ده اول انطباعاتي عن العربية السيفيك الvti2009 العربية وارد الامارات اللون اسود والفرش بيج مخمل

اولا العربية دي بتنزل بمواصفات معينة غير الموجودة فمصر زي ال 8 ايرباج والشكل القديم للفوانيس الخلفية والاكصدام الامامي القديم واشارات فالمرايات والخامات الداخلية احسن من اللي بتنزل فمصر معرفش ايه السبب
الشكل الخارجي ده ازواق وانا بيعجبني من الياباني السيفيك والشارك بس

اولا عن اداء العربية :

العربية ماشاء الله موتورها قوي جدا لكن بعد ال 100 استجابته سريعة وتجميعه رهيب افضل من الشارك لكن مش بفرق ملحوظ والتوب السبيد اعلي من الشارك

استهلاك البنزين اقدر اقول عليه متوسط لاهو قليل ولا كتير ولكنه اكتر من الشارك

النقلات فالاول محسوسه لكن بعد كده بتبقي سلسة

الثبات هو افضل ما يميز العربية دي بجد ما شاء الله ثابته جدا جدا حتي عالسرعات العالية وعالملفات بسبب نظام ال VSA اثبت من الشارك بفرق ملحوظ

العربية فيها انسيابيه غير عادية تحس انها بتلتهم الطريق وهي بتجري

نيجي لنقطة بالنسبالي هي اهم نقطة وهي ال spirit of drive بمعني روح السواقة او متعة السواقة وهي من اكتر الحاجات اللي شداني فالعربية ليها طعم خاص زيها زي الشارك اللي كنت بحب متعة سواقتها جدا


ثانيا الخامات الداخلية ومساحة التخزين:

الخامات كويسة جدا افضل من الشارك والتقفيل عالي اوي والتابلوه عصري جدا

الكراسي قعدتها مريحة عالطرق السريعة واماكن التخزين كتير فالعربية اكتر من الشارك

ثالثا علو العربية:

اكتر نقطة مدايقاني من العربية لو انت محمل 3 او4 لازم تجنح عالمطب والا هتسلم عليه ده بالنسبة للمطبات الخيالية الموجودة عندنا ودي نقطة في صالح الشارك اللي مهما تحمل مش هتحك

اما العفشة فهي ناشفة وده عشان الثبات زي الشارك لكن الشارك اريح

رابعا طقم الصوت:
صوت سماعات العربية مش حلو خالص مقارنة بالشارك اللي كان فيها طقم ال RockFord Fosgate بالصب والجي ام وال 9 سماعات واللي يميز السيفيك الشاشة gps dvd bluetooth usb

عيوب العربية :
في حاجة مخوفاني جدا من العربية وهي ان قعدة الموتور اليمين وعلبة الدركسيون سمعت ان فيهم عيوب صناعة من كذا عضو فالمنتدي وانها بتبوظ بسرعة

العربية محتاجة معاملة من نوع خاص بمعني مش حمالة اسية او اعتماديتها اقل من الشارك

وده اول انطباعي عن العربية بعد اسبوع ونص من الاستخدام