تغيير تابلوه ابيزا 1994

**kyrillos** · 20-01-2013 10:42 PM

متأسف جدا جدا على التأخير

أرجو من ادارة المنتدى حذف الموضوع الأخر لأنى هاكتب هنا التجربة كاملة

بس كنت مشغول جدا وغيرت شغلى فمكنتش فاضى اوى عشان أكمل القصة بس أنا حاسس انى استفدت شوية من اللى عملته ومش عايز حد يحصلوا كده تانى
بأختصار كده, أنا كان التابلوه بتاعى الهوايات فيه مكسره وبتدخل تراب وعفره والفريم اللى فى النص طبعا كان مكسور وكان التابلوه عامة بيرجرج ويتهز فى المطبات
ده غير ان العدادات كانت مش شغال فيها غير البنزين والحرارة وماكنش عندى ار بى ام (الموديل نازل كده) وأنا كنت محتاج ار بى ام وماكنتش الاشارات شغاله ومعظم اللمبات
المهم قعدت افكر شوية ولقيت انى لو غيرت العدادات هاجيب جديد بحوالى 200 جنية
والفريم اللى فى النص بحوالى 320 واصلا التابلوه مش متربط كويس
المهم قررت انى اجيب طابلوه جديد كامل وفعلا نزلت ولقيت طابلوه بولو 99 (شكل عداداته اجمل جدا من 94) وجبته ب 850 جنية
ومعرفتش أنزل نهائيا عن الرقم ده, كأن كل التجار اتفقوا على الرقم ده فى الحرفيين, بس أنا بشوف ناس بتقول انها جابت طابلوه كامل بالعدادات ب 650 - 750 جنيه - دى كده اول نقره
المهم روحت لكهربائى قالى روح رجع الطابلوه ده, مش هايركب, ده فيشة تانية خالص غير الابيزا 94 وسألت هنا فى المنتدى قالولى فكك منه وهايركب عادى بس شوف كهربائى نضيف
المهم الكهربائى الاولانى ده قالى انسى ولو عملته هاياخد منى يومين شغل كاملين وعايز مصنعية 1000 جنيه - دى تانى نقره
للأمانه يعنى, العداد ال 99 ده بالذات ليه فيشتين مش فيشة واحدة, ويركب طبعا على 94 بس تعبنى جدا ومش كل حاجه compatible (حته برمجه كده)
المهم أنا سألت واحد معرفه وقالى أنا هاوصفلك كهربائى معرفه بيفهم فى الالمانى وهايظبطك وبالفعل روحتله وقلتله هاينفع التابلوه ده يركب, قالى هاينفع وربنا يسهل
قلتله ربنا هايسهل, بس هاتعرف تعمله يعنى وتعمل وصلة ار بى ام
قالى ان شاء الله, المهم حاسيته مش مالى ايده, بس قلت احسن من البرنس الاولانى
المهم سبته يومين ورحتله اتفرج
لقيته مطلع علبة الفيوزات بره وعامل فرح سلوك
قلتله خلاص, قالى لسه, قلتله لسه ايه
قالى عداد السرعه مش شغال خالص وتقريبا ماكنة الكيلو متر بايظه, هاتلى واحدة جديدة واجربهالك
قلتله ايه كمان, قالى بس كده,
بس أنا اخدت بالى ان عداد البنزين مش شغال, قالى لأ ده العربية مافهاش بنزين بس
المهم فهمت ان كده ده اخره, هو مش عارف يعمله, بس هو قالى هاتهالى يا باشا كمان يومين وانا اظبط الحاجات الناقصة دى, وأنا مش راضى عن شغلى وبلاش تدفعلى المبلغ كله (300 جنيه)
أنا قلت ادفعله المبلغ كله عشان تبقى العربية فى رقبته
المهم كمان يومين جيت ارحله بقى, قالى انه مسافر تبع شغله اسبوع كامل
قعدت اسبوع ورحتله لقيته لسه مسافر ومش بيرد على الموبايل, فهمت اللى فيها
أنا بصراحة ماكنش مهم معايا عداد السرعة, اهم حاجة عداد البنزين, أنا ماشى على عمايا كده
نزلت الحرفيين أسأل على كهربائى نضيف, لقيت واحد بيقلى أنا يا باشا أظبطلك السرعة بس انسى البنزين, عشان طرمبة 94 عمرها ماهتشغل 99, لازم نغير طرمبة
قالى هاخد 400 جنيه عشان هافك التابلوه كله وهاقسم الفيشة من الأول واركب تانى
واى حاجة احتاجها هاتجيبهالى
المهم مارديتش عليه, سبته ومشيت وكرهت نفسى وكرهت العربية وكرهت الحرفيين

بعدها بكام يوم روحت لكهربائى فى الحرفيين بتاع جولف وابيزا بس بيفتح بالليل بس (بعد 12)
المهم حاكيتله القصة كلها, وهو فاهم جدا ومحترم جدا
قالى عداد السرعة هاشوفه (جبت ماكنة كيلو متر ب 50 جندى) بس البنزين دى صعبه جدا, عشان طرمبة البنزين فى بولو 99 فيها مقاومة غير المقاومة فى طرمبة 94 وقالى على رقمها وقالى انها نادرة وهاتعمل فى حدود 150 جنيه وقالى هو هايجبها واروحله كمان كام يوم - دى تالت نقره
المهم رحتله بعدها وجاب المقاومة فعلا من طرمبة بولو 99 كاملة
طبعا البرنس اللى ركب كان موصل كل الفيش غلط, الكهربائى ده بقى محترم, جايب مانيوال العدادات البولو 99 ووصلنا التوصيلات من الاول فى ساعتين وطلع اصلا ان فى لمبات كتير ماكنش البرنس القديم مركبها, بقت شغالة دلوقتى
الفحتة الكبيرة بقى, طلعنا طرمبة البنزين بتاعتى 94 وشلنا منها العوامة اللى راكبة ولحمنا فيها العوامة التانية بتاعة طرمبة 99 ووصلنا واشتغل عداد البنزين
دفعت بقى مصنعية 150 + 150 للعوامة دى يبقى كده 300 كمان
بعدها بكام يوم, لقيت عداد البنزين بيرقص, يطلع فوق قوى وينزل تحت قوى ومش بيثبت وبصراحة انا مش فاضى اروح الحرفيين تانى فى نص الليل وعندى شغل
بقيت كل كام يوم اروح احط ب30 جنيه 92
المصاريف كاملة 980 + 300 + 300 + 50 = 1500 جندى
التابلوه جميل جدا وثابت ومتربط حلو والعدادات جميلة والار بى ام بيساعد جدا بس الموضوع كتير عليه 1500, مش الفرق الشاسع يعنى, مابقيتش طيارة لما ركب فيها تابلوه 99
كان ممكن من الاول اجيب تابلوه 94 شكله وحش, بس هاشيل فيشه واحط فيشه
بس ماحدش بيتعلم ببلاش
اى حاجة تبوظ فى العربيات دى - عشان خاطر ربنا - بلاش تفتى وتقول اجيب الموديل الاحدث
هاتتعب جدا صدقنى - هات نفس الموديل ونفس كل حاجة
اللهم بلغت

أنا لسه عندى التابلوه القديم سليم بس فاضى (بدون فريم ولا هوايات)
وماكينة كيلومتر سليمة (لو حد عايز يشتريهم يقلى فى رسالة على الخاص - اقلل الخساير برضه )

**Ahmed_Gallant** · 20-01-2013 11:50 PM

قلبى عندك وربنا يجعلها اخر الاحزان
انا تقريبا كنت بفكر فى اللى انت عملته بالظبط بس الفرق ان انا عندى الاربى ام والكيلومتر والبنزين هم اللى فاصلين والفريم عملتله كسوه جلد مشيت بيها حالى بعد ما سمعت التمنميات اللى المفروض سعر التابلوه كامل قلت ليييييه بيسوق لوحده وكبرت دماغى وبدات اهتم بحاجات تانيه ونفضت للموضوع ده
وانا بقالى 6 سنين ماشى من غير مؤشر بنزين 3 عربيات ويطلعو كلهم مؤشر البنزين بايظ ومحدش عارف يظبهم وربنا ساترها وبحسب الاستهلاك وانا مش معايا تريب هتقولى ازاى هقولك تساهيل ربنا وبسافر كمان
خلاصه الكلام انا كنت اريح اشترى شاشه واركبها عندى 94 بس اللى فيها اربى ام العاديه يعنى مش تابلوه كامل شفته عن محل قطع غيار ب200 جنيه ونفس الفيشه البيضا المعفنه حبيبه الملايين بس كنت هشرط عليه لو الاربى ام والكيلومتر ماشتغلوش على الاقل (هسيبنى من مؤشر البنزين عشان ممكن يكون عوامه) مش هاخد العدادات لان لو ظل الوضع على ما هو عليه يبقى المشكله عندى كهربا ولازم تتحل وممكن يطلع العداد سليم
بالنسبه للفريم والهوايات انا معنديش تكييف وبصراحه مع ان الكسوه اللى عملتها مبقتشى زى الاول بس شغاله جدا وكان التابلوه مجرب مهما اغسل فيه رحت جايب علبه فازلين ب5 جنيه ورحت مظبطه بقى كانه فبريقه شيلت بقى من دماغى فكره تغيير التابلوه
انا بقى كنت عايز اسالك هلى الدرج اللى بيقفل على الفيوزات ده عندك فى التابلوه القديم ولو عندك يا ريت تبعتله سعره على الخاص لان انا عندى علبه الفيوزات ملعوب فيها البخت وعايزه تروح لرشاد فاخبيها بدل الفضايح
كنت عايز اجرب العداد بتاعك على العربيه عندى بس هتبقى جميله منك عشان بس احط ايدى على عيب مجننى

**mahmoud ghanem** · 21-01-2013 10:04 AM

قدر الله ومشاء فعل ... والف مبروك على التجديد
ومتفكرش كتير فى اللى حصل علشان متتعبش نفسك .. انت جددت التابلوه بتاعك الافضل انك تستمتع به

**ehab_mansour** · 21-01-2013 10:35 AM

الحمد لله و قدر الله و ما شاء فعل
لكن موضوعات التعديل دي ليها ناسها و مينفعش اي كهربائي يعملها لازم واحد متخصص و بيفهم و عارف خريطة توزيع العربيات دي عشان يعرف هيعمل ايه فين و ازاي

و كمان مينفعش تركب تابلوه كان راكب علي عربية بمكونات و ضفيره مختلفة تماما عن عربيتك لأن :-
1- عداد الكيلومتر عشان يشتغل لازم يكون ليه حساس (بيسموه ماكينة السرعه) بيقابله متوافق مع العدادات كهربيا و سلوك بينهما للتوصيل تخيل ان عربيتك مافيهاش لا حساس ولا سلوك توصيل هيشتغل منين ؟؟
2- مؤشر البنزين ... كل موديل له عوامه بمقاومه متغيره بقيمة معينة تتناسب مع العدادات ايضا !!! طيب اللي عندك مختلف هتشتغل منين و ازاي ؟

و هكذا .......
كان من الأفضل انك تجيب نفس التابلوه و لكن بحالة افضل و تركبه عشان تريح نفسك

انا لا افضل ابدا موضوعات التعديل دي نهائيا إلا في حالة واحده و هي انك هتسقط موتور جديد وقتها بتشتري نص كامل و تغير كل حاجه فيه و تحطها في عربيتك (موتور + فتيسه + كنتروله + ضفيرته + ادوات تغذيته + طلمبة البنزين بالعوامه + علبة الفيوزات + التابلوه بمشتملاته + طقم الدوارة بالايموبلايزر بالطاره + دورة التكييف بالباور + العفشة الامامية كاملة بالمساعدين ) في الوقت ده تبقي جددت العربية كاملة و كل حاجه بفيشتها و ضفيرتها

و بالتوفيق للجميع

**kyrillos** · 21-01-2013 10:48 PM

المشاركة الأصلية كتبت بواسطة ahmed_gallant

قلبى عندك وربنا يجعلها اخر الاحزان
انا تقريبا كنت بفكر فى اللى انت عملته بالظبط بس الفرق ان انا عندى الاربى ام والكيلومتر والبنزين هم اللى فاصلين والفريم عملتله كسوه جلد مشيت بيها حالى بعد ما سمعت التمنميات اللى المفروض سعر التابلوه كامل قلت ليييييه بيسوق لوحده وكبرت دماغى وبدات اهتم بحاجات تانيه ونفضت للموضوع ده
وانا بقالى 6 سنين ماشى من غير مؤشر بنزين 3 عربيات ويطلعو كلهم مؤشر البنزين بايظ ومحدش عارف يظبهم وربنا ساترها وبحسب الاستهلاك وانا مش معايا تريب هتقولى ازاى هقولك تساهيل ربنا وبسافر كمان
خلاصه الكلام انا كنت اريح اشترى شاشه واركبها عندى 94 بس اللى فيها اربى ام العاديه يعنى مش تابلوه كامل شفته عن محل قطع غيار ب200 جنيه ونفس الفيشه البيضا المعفنه حبيبه الملايين بس كنت هشرط عليه لو الاربى ام والكيلومتر ماشتغلوش على الاقل (هسيبنى من مؤشر البنزين عشان ممكن يكون عوامه) مش هاخد العدادات لان لو ظل الوضع على ما هو عليه يبقى المشكله عندى كهربا ولازم تتحل وممكن يطلع العداد سليم
بالنسبه للفريم والهوايات انا معنديش تكييف وبصراحه مع ان الكسوه اللى عملتها مبقتشى زى الاول بس شغاله جدا وكان التابلوه مجرب مهما اغسل فيه رحت جايب علبه فازلين ب5 جنيه ورحت مظبطه بقى كانه فبريقه شيلت بقى من دماغى فكره تغيير التابلوه
انا بقى كنت عايز اسالك هلى الدرج اللى بيقفل على الفيوزات ده عندك فى التابلوه القديم ولو عندك يا ريت تبعتله سعره على الخاص لان انا عندى علبه الفيوزات ملعوب فيها البخت وعايزه تروح لرشاد فاخبيها بدل الفضايح
كنت عايز اجرب العداد بتاعك على العربيه عندى بس هتبقى جميله منك عشان بس احط ايدى على عيب مجننى

الحمد لله على كل شىء وبرافو عليك, أعتقد اللى انت عملته ده جنبك حوارات كتيره
بالنسبة للدرج وكده يا باشا أنا بحاول الاقى بيعه مرة واحدة للتابلوه كله عشان أخلص منه
معلش

**kyrillos** · 21-01-2013 10:51 PM

المشاركة الأصلية كتبت بواسطة ehab_mansour

الحمد لله و قدر الله و ما شاء فعل
لكن موضوعات التعديل دي ليها ناسها و مينفعش اي كهربائي يعملها لازم واحد متخصص و بيفهم و عارف خريطة توزيع العربيات دي عشان يعرف هيعمل ايه فين و ازاي

و كمان مينفعش تركب تابلوه كان راكب علي عربية بمكونات و ضفيره مختلفة تماما عن عربيتك لأن :-
1- عداد الكيلومتر عشان يشتغل لازم يكون ليه حساس (بيسموه ماكينة السرعه) بيقابله متوافق مع العدادات كهربيا و سلوك بينهما للتوصيل تخيل ان عربيتك مافيهاش لا حساس ولا سلوك توصيل هيشتغل منين ؟؟
2- مؤشر البنزين ... كل موديل له عوامه بمقاومه متغيره بقيمة معينة تتناسب مع العدادات ايضا !!! طيب اللي عندك مختلف هتشتغل منين و ازاي ؟

و هكذا .......
كان من الأفضل انك تجيب نفس التابلوه و لكن بحالة افضل و تركبه عشان تريح نفسك

انا لا افضل ابدا موضوعات التعديل دي نهائيا إلا في حالة واحده و هي انك هتسقط موتور جديد وقتها بتشتري نص كامل و تغير كل حاجه فيه و تحطها في عربيتك (موتور + فتيسه + كنتروله + ضفيرته + ادوات تغذيته + طلمبة البنزين بالعوامه + علبة الفيوزات + التابلوه بمشتملاته + طقم الدوارة بالايموبلايزر بالطاره + دورة التكييف بالباور + العفشة الامامية كاملة بالمساعدين ) في الوقت ده تبقي جددت العربية كاملة و كل حاجه بفيشتها و ضفيرتها

و بالتوفيق للجميع

كلام سليم 100 100
بس زى ماقلت الواحد مش بيتعلم ببلاش, دى أول عربية ليا والحمد لله انها جت على كده