الموضوع: فك فانوس أمامى وأصلاح قاعدته ميجان 2(هام جداً جداً)

السلام عليكم

طبعا كلنا معرضين لحوادث وعربياتنا بتتخبط كتير.... لما حد بيخبط ميجان من قدام عندنا الاكسدام الأصلى بتاع العربية متين جدا وبيستحمل جامد وصعب يتكسر

الأكسدام مربوط فى العربية متحمل على الديفيندر الحديد اللى من قدام ومربوط من تحت بالمصفحة فى جسم العربية

ومن فوق متثبت فى جسم العربية بمسامير بلاستيك

ومن على الأجناب متثبت فى الرفارف

منطقة الفوانيس بقى منطقة وسط وبتشيل الأكسدام برضه من عند الفوانيس اللى بيمسك الأكسدام من عند الفوانيس

هى قاعدة الفانوس الأمامى لذلك لو لقيت الأكسدام مريح شوية لتحت من عند الفانوس الأمامى أعرف كويس إن دا بسبب خبطة حلوة أدت إلى كسر قاعدة الفانوس الأمامى تعالوا نشوف بالصور
مبدئيا دا فك الأكسدام ....http://www.nilemotors.net/Nile/330883-x_dam.html
دى صورة قاعدة الفوانيس اللى مشاور عليها بالسهم الأحمر وهى سليمة بعد ما لحمتها

طيب لحمتها أزاى ؟؟؟؟؟؟
هنبدأ بفك الفانوس نفسه
الفانوس متثبت ب 3 مسامير ألانكيه نجمة واحد من فوق واتنين من تحت هما لجوا شوية
أنا مشاور بالأسهم فى الصورة على أماكن المسامير اللى هنفكها
وعن قرب دى صورة المسمار اللى فوق فى الفانوس زى ما أحنا شايفين الحتة البلاستيك مكسورة

ودا المسمار التانى من تحت
ودا المسمار التالت من تحت

بكدا فكينا الفانوس بس لسة الفانوس ماسك بفيشتين نظام كلبسات بنضغط عليها فى حتة معينة ونفكها
زى ما فى الصورة كدا الفيشة الصغيرة بتاع الموتور فقط فيها 3 سلوك والفيشة الكبيرة فيها 5 سلوك خاصة بجميع لمبات الفانوس
طبعا أنا فكيت الفانوسين عشان ألحم الأجزاء المتكسرة دا منظر العربية بعد فك الفانوسين
شايفين الصورة دى قاعدة الفانوس ومكسور حتة منها
ودى الحتة المكسورة من القاعدة
ودى الحتة المكسورة اللى بتبقى ماسكة الفانوس فى جسم العربية من فوق المسمار اللى فوق بيركب فيها
نيجى بقى للحام ... أنا فكرت قلت ألحم ب 1 و 2 بس قلت مش هينفع لأنه هيتكسر تانى مع الحمل ومطبات و كدا وخاصة إنه مضروب مش أصلى
أستعملت فكرة رائعة جدا جدا وهى كالآتى
حتتين بلاستيك مكسورين مثلا وعايزين نلحمهم هعمل زى نظام كوبرى هجيب مسمار وأسخنه وأخرم خرم فى كل حتة منهم وخرم تانى فى الحتة المقابلة فى الحتة التانية المكسورة
وعديت نوع سلك معين رفيع قوى بس لما تجمع أكتر من سلك على بعض بيبقى متين وأبتدى ألف السلك وأربطه جامد وبعدين أجيب اللحام ال 1 و 2 وأغطى بيه السلوك دى

بيدى متانة فظيعة نفس فكرة الخرسانة كأن السلك دا الحديد وال 1 و2 دا الأسمنت
دى شوية صور للقاعدة والسلوك الملحومة بيها






ودى صورة الحتة البلاستيك ال صغيرة بعد ما لحمتها بالسلك وغطيتها باللحام ال 1 و2

ودى القاعدة بعد ما لحمتها وركبت الفانوس فى مكانه



تقريبا الباش مهندس هشام اشتكى من المشكلة دى لما جه يغير الفانوس لأن تقريبا الفانوس مش بيجى بالقاعدة دى