الموضوع: بالصورة خش إعرف معنى فوكس Focus

صباح الفل على شباب نايل موتورز
جايبلكم النهاردة صورتين من نفس المكان والكادر واخدهم ورا بعض على طول بإختلاف حاجة واحدة بس وده لتوضيح معنى مصطلح فوكاس Focus

الفوكاس هو إنك تخلى الكاميرا تشوف أوبجكت على مسافة معينة ، طب يعنى إيه ؟

أى أوبجكت واقع فى مسافة الفوكاس هيطلع In Focus

أى أوبجكت فى مسافة أبعد أو أقرب من المسافة دى هيطلع Out Of Focus

طب نشوف إيه الفرق بين ظبط مسافة الفوكاس فى الصورتين اللى تحت :

فى الصورة الأولى حطيت الفوكاس على المأذنة بتاعت الجامع الأزهر فظهرت الوردتين اللى حواليه بيحتضنوا المأذنة وممسوحين Blurred مش شدين العين لأنهم خارج الفوكاس ، وأصبح العنصر الرئيسى فى الصورة هو المأذنة

فى الصورة الثانية ، حطيت الفوكاس على الزهرتين وبالتالى حصل تشويش وشبه إخفاء للمأذنة فى الخلفية وأصبح العنصر الرئيس فى الصورة هو الزهرة بوضوح تام


إزاى نقدر نستفيد من الفوكاس ؟
الفوكاس بيحدد تركيز الكاميرا يقع على أنهى أوبجكت ، وعن طريقه بتحدد العنصر الرئيسى فى الصورة بدون التشتيت من عناصر أخرى لا تحتاجها ، فى الصورة الأولى كان العنصر هو المأذنة فشتتنا الزهرة ولو كانت الزهرة واضحة لسرقت العين من المأذنة ، أما فى الصورة التانية كان الهدف هو الزهرة فعزلنا المأذنة حتى لا تترك العين الزهرة وتسأل عن المأذنة

دلوقتى أنا بطلب من حضراتكم تاخدوا صورتين بكاميراتكم وترفعوهم تورونا فرق الفوكاس بنفسكم
ياللا يا شباب مش عايزين كسل
وطبعاً الفوتوشوب ممنوع
ماحدش يقوللى ممكن أشيل الحاجة الى مش عايزها بالفوتوشوب
إحنا بنتكلم عن مهارات التصوير مش مهارات الكمبيوتر
مين هيرفع أول صورة ؟

المشاركة الأصلية كتبت بواسطة _hema

تمام الله ينور عليك
انتظر مني الصورتين ان شاء الله
بس اهم حاجة في العزل عموماً فتحة العدسة

و ينور عليك انت كمان و الله
واحب ضيف ان العزل كمان بيتحكم فيه الفوكال لينث او الزووم و المسافه مابين العدسه و الاوبجكت
يعني مثلا لو بتصور واحد و انت قريب جدا منه على f4 هيطلع عزل متوسط او لو ورده على وضع الماكرو اللي قريب منها بيتعزل
وبرضه لو كانت عامل زووم على الشخص و انت قريب عليه برضه اللي وراه هيتعزل

المشاركة الأصلية كتبت بواسطة hany63

و ينور عليك انت كمان و الله
واحب ضيف ان العزل كمان بيتحكم فيه الفوكال لينث او الزووم و المسافه مابين العدسه و الاوبجكت
يعني مثلا لو بتصور واحد و انت قريب جدا منه على f4 هيطلع عزل متوسط او لو ورده على وضع الماكرو اللي قريب منها بيتعزل
وبرضه لو كانت عامل زووم على الشخص و انت قريب عليه برضه اللي وراه هيتعزل

احنا بنتكلم على الفوكاس يا هانى
الديبث اوف فيلد لسة شوية

المشاركة الأصلية كتبت بواسطة _hema

تمام الله ينور عليك
انتظر مني الصورتين ان شاء الله
بس اهم حاجة في العزل عموماً فتحة العدسة

فى الانتظار يا باشا
بس خد بالك احنا بنتكلم على الفوكاس مش على depth of field
ان شاء الله اعمل موضوع عن العزل باستخدام الديبس اوف فيلد ، خلينا دلوقتى فى الفوكاس بس ونطلع واحدة واحدة عشان الناس كلها تبقا مستوى واحد
الصورتين دول كانوا على نفس الابارتشر فاحنا كدة بنتكلم على الفوكاس فقط

المشاركة الأصلية كتبت بواسطة mazagangee

ممتاز جدا و كلام واضح و سهل
بس اظبطه ازاي ؟ يعني اجيب ايه في المنيو بتاعة الكاميرا ؟
معايا كاميرا باناسونيك 14 ميجا بكسيل

الكلام ده سهل فى الكاميرات ال dslr لأن الكاميرات دى بتديك الكنترول على كل حاجة فى الكاميرا ممكن تقلب كل حاجة مانيوال
السيمى برو برضه ممكن
ماعرفش الكاميرا مع حضرتك ايه
فى حالة انها بوينت اند شوت يعنى كاميرا عادية صغيرة حضرتك ممكن تعمل الآتى
وجه الكاميرا على العنصر البعيد (زى المأذنة هنا) واضغط الشاتر نص دوسة عشان الكاميرا تاخد فوكاس على المسافة دى ، وبعدين وجه للزاوية بتاعة اللقطة وكمل الدوسة للآخر عشان تلقط
كرر تانى بس المرة دى وجه الكاميرا على العنصر القريب وخد الفوكاس بنص ضغطة وبعدين وجه على اتجاه اللقطة زى اول مرة وكمل الدوسة والقط

المشاركة الأصلية كتبت بواسطة MaZaGAngeE

الكاميرا : Panasonic DMC FH1
12 mega
5x optical zoom

جربت النص ضغطة و معملش حاجة معايا
ممكن تقولي اعمل كده ازاي ؟

دورت على الكاميرا بتاعتك هى مافيهاش مانيوال فوكاس
عموماً الكاميرات البوينت اند شوت اللى فيها مانيوال كنترول كامل محدودة شوية
عندك أمثلة فى اللينك ده
Top 10 Point-and-Shoot Cameras With Manual Controls | PCWorld
الطريقة بتاعت نص ضغطة ، انت بتحاول تخدع الكاميرا ، معظم الكاميرات دى بتعمل اتوفوكاس لما تدوس نص ضغطة وبعدين تلقط لما تكمل الزرار للآخر ، وفيه بعضها بتضغط ضغطة واحدة وهى تعمل الفوكاس وتسجل الصورة ورا بعض ما تقدرش تفصلهم عن بعض
لازم نعترف إن فيه حاجات من اللى هنتكلم فيها للأسف مش هينفع تتعمل غير بكاميرا DSLR أو كاميرا سيمى برو على الأقل
إن شاء الله هركز الفترة اللى جاية على مواضيع يقدر يستفيد منها كل الناس حتى اللى بيصور بموبايل