يوم عذاب

**shur3000** · 28-01-2013 11:36 PM

اول امبارح قال رايح المغسلة اعمل كار كير واظبط المهم لقيت الراجل عندة زحمة قالى خليها بكرة بس اللى لفت نظرى صوت العربية عالى غير ما انا متعود
المهم جنبى ميكانيكى ثقة بص عليها قالى دى بلية الدينامو او التكيف.
رحت للكهربائى حل بليىة التكيف لقيت الصوت راح قلت يبقى منها رحت جيبتها ب45ج وغيرتها وتمام ساعتين جيت اركن لقيت صوت جبار طالعمن العربية ويختفى لو ضغط دبرياج . رجعت للكهربائى قالى بلية دبرياج روح للعفشجى
رحت للعفشجى قالى نحل ويارب ماتكونش الديسك اتاكل المهم جيتلة تانى يوم بعد ما جيبت بلية وانا مروح وكان شايلها من طقم ب 70ج . وتانى يوم روحت حل طبعا البلية كانت قافشة بغباء بس للاسف الديسك اتاكل
المهم رحت جيبتلة اسطوانة فاليو ب 150 وقالى بلاش تجيب ديسك جديد عشان مضروب نجيب استيراد ب150 وفعلا جيبت واحد وعلية ختم فاليو ودايو وشكلة معقول.
ركب الباشا وطلعنا جربنا تمام بس الله يحرقة خد 170 مصنعية و10 ج دخان للصبيان بس الصراحة هو شغلة نظيف ودة اللى مخلينى مستحمل امة
بس عندى حاجة ان دواسة الدبرياج بقت مية يعنى بتغوص منى واول ما ركبت العربية بطلت منى قولتلة نعلى الدبرياج قالى بلاش عشان ما نضغطتش على الاسطوانة.
ربنا يكرم وتكمل على خير وبلاش مصاريف لانى اتنفخت

**darsh_darsh** · 29-01-2013 12:00 AM

الحمد لله انها عملت كده قريب من المكانيكى بتاعك
وليا استفسار هو انهى افضل لما الدبرياج يكون واطى شويه ولا عالى

**ashourashour** · 29-01-2013 12:32 AM

الدبرياج الواطي افضل بس بشرط سلاسه النقل (يكون بيفصل للاخر)

الدبرياج العالي ........ الدسك

يرجى انتقاء الالفاظ
م ع 6

**darsh_darsh** · 29-01-2013 12:57 AM

وهل العالى يقلل السحب والسرعه القصوى ولا مفيش علاقه وهل ده يخلى الاسطوانه تتاكل بسرعه ولا لا

**mostafa mahmod** · 29-01-2013 06:36 PM

الف مبروك يا باشا
هى مصنعيه تسقيط الفتيس و حل و تركيب الاسطوانه كده بتبقى غاليه
حتى لو ميكانيكى غالى شويه بس مريحك و شغله نضيف مش مشكله احسن ما يكون واحد رخيص و نص كم يركب غلط و ترجع تفك و تتعطل تانى

**kar!m** · 29-01-2013 09:34 PM

مش غالي أوي .. الناس في العادي بياخدوا ١٥٠ جنية

**darsh_darsh** · 29-01-2013 10:06 PM

المشاركة الأصلية كتبت بواسطة darsh_darsh

وهل العالى يقلل السحب والسرعه القصوى ولا مفيش علاقه وهل ده يخلى الاسطوانه تتاكل بسرعه ولا لا

منتظر رد توضيحي

**shur3000** · 30-01-2013 12:20 AM

واللهى انا قلتلة ان الدبرياج كدة واطى لدرجة ان العربية بطلت منى اول مرة قالى كدة احسن ولو علتهولك هياكل الديسك بدرى.
بس انا عايز اعرف الديسك الاستيراد احسن ولا الجديد لانى حاسس انه بيشتغلنى رغم سابق معرفتى بية وهو الصراحة صنايعى كويس ومش نصاب

**المعتصم 55** · 30-01-2013 01:15 AM

هو الاستيراد كويس بس المهم انت تكون رجلك حاسة بمشوار الدبرياج و متحملش علية يعيش معاك مبروك وربنا يحفظك
يارب احمي مصر وامنها وشعبها وارضها

**tarek_2005** · 30-01-2013 03:07 PM

اولاً الديسك الاصلي موجود بس غالي لان الطقم بيتباع كامل ديسك واسطوانة وبلية ب 650 جم اما المضروب من 350 جم الي 400 جم كل تاجر وسعره
الدبرياج العالي لو مش محمل علي الديسك مفيش منه مشكلة مشكلته لو حمل علي الديسك بياكل اسطوانة بسرعة ويبوظ الديسك وياثر علي العربية في ال top speed فقط ومعدل التسارع