معلش يافندم الواحد مش بيتعلم ببلاش، كمان إنت عندك ميزة إن التيل بتاعك معاك فمخسرتش حاجة بس المشكلة إنهم بيستهبلو.
بص أنا في الأول كنت هقولك ماتسكتش وإعمل شكوى ... إلخ
بس بصراحة رجعت فكرت لو أنا مكانك وعملت شكوى وحقي مجاش دمي هيتحرق زيادة، وعلى إيه هو إحنا ناقصين مسببات الضغط والسكر تزيد علينا، صحتك بالدنيا.
أنا شايف إنك تتعلم من الموضوع ده وتحطهم إنت فدماغك وتتذاكا عليه بدل ما هو إللي يستهبل، زي ما بعض الناس قالتلك كمل بالتيل الجديد لحد ما يخلص وبعد كده عند أي ميكانيكي ركب التيل إللي معاك (أو ركب إللي معاك دلوقت وشيل الجديد) وكده إنت ع الأقل ما خسرتش فلوسك. وبعد كده لو فوجئت بيهم بيطلبو تغيير حاجة إسأل وغلس وأطلب تشوف القطعة أو التيل إللي عايزين يغيروه ولو حسيت بإستهبال أرفض التغير وقوله هاجي مره تانيه أغيره عشان تكسب وقت وتسأل أهل الخبرة أو ميكانيكي تاني لو كان اكلام صح.
طبعا لو حابب تمشي في سكت الشكوى معاك كل الحق وهو ده الصح، بس في بلد زي بلدنا في الظروف دي وبالعقليات دي، إنت إللي هتتعب مش الغلطان للأسف لو تعرف تطنش عشان متحرقش دمك أو تجيب حقك بطرق تانيه ده إللي بقى بيمشي دلوقت للأسف.
المفضلات