لسة جاي من إسكندرية إمبارح باليل و مش قادر أكتم غيظي بجد من منظر الشوارع هناك...بجد حرام دي تكون عروس البحر الأبيض. دي أخرها تبقى شبح شوارع البحر الأبيض.
أولاً كل 10 متر لازم تلاقي بلاعة نازلة لتحت...أو طالعة لفوق!
ثانيا لازم تلاقي مطب كل 300 متر كحد أقصى و المطب عبارة عن جبل و في أخره حفرة و ربنا معاك بقا.
ثالثاً الشوارع مش كلها مضائة ليلاً .
رابعاً حتى شارع الكورنيش فيه بلاعات ممكن تكسرلك جنوطك والله!
أنا كنت مرصص العربية و أنا رايح وكنت بجيب بيها 170 على طريق القاهرة-إسكندرية الزراعي "الدولي الجديد" و الله العربية مكنتش بترعش أبدا رغم إنها "فيرنا" و هي مشهورة برعشتها . و أنا جاي كنت يدوب بجيب ال120 تبدأ الرعشة!.
رحت لبتاع الترصيص و لاقينا التالي :
1- الفردتين الشمال اللي قدام و اللي ورا الجنط فيه عوجة!!
2- الفردة اليمين اللي قدام أترصصت .
3- الإكصدام اللي قدام فيه خبطة بسبب بلاعة أخدتها أول ما نزلت إسكندرية و طلعت على طريق الكورنيش اللي كنت فاكر إنه طريق عالمي لحد ما فوجئت بالعربية نزلت لتحت.
كل دا في 4 أيام بس في إسكندرية... امال ياترى اللي ساكنين فيها بيعملو أيه!!
و يا ترى سيادة المحافظ اللي عمال يرغي و يقول هتبقى مدينة عالمية ممكن نعرف إمتى هتبقى عالمية ؟
المفضلات